“K’ON NA THUMPIH DING”

0

“K’on na thumpih ding, K’on na thumpih ding uh, Honna thumpih gige ka hi” chih kammal mi chih in zang kha chiat ding in a ging tak huai hi. Mi tengteng ki bang kim vek lou I hih ziak un, hiai bang kammal te pau vantang a va neih khak ding baihlam kasa mahmah mawk hi. Mi thumpih ding cia i va gente a khonung a phawk pih nawn lou, thumpih kha nawn lou chih bang thil om thei ahih ziak in pilvang na ding om hi in i thei hi. Mi khem i hi kei a, eimah I thuchiam a ki khem hi zaw i na hisek hi.

Tulai in Social Media group khong ah leh personal a midang te toh i ki thuzakna ah, thumpih ding i muh a om gige hi. Ei mahmah a ding ale thum zoulou te i hih lai un midangte I awlmoh na uh thupi kasa mahmah hi. Hiai in Gingtu i hih na uh hon lang sak a, Khris a i ki itna uh, i ki lainatna uh midangte tung ah hon langsak hi. Huchi a hih khomkhom in, ei lam a leng a ki sam om gige ahih ziakin ei mahmah bang leng thumna ah kilan khe thakthak thei gige leng i niteng hunzatna ua hon panpih mahmah dingin ka gingta hi. Mahni poimohte leng thumna a phawk thei pahpah loute i hih ziak un mi thumpih ding i chih te uh leng hunteng in i phawk zou gige kei uhi. Hiai in thumna hun zat tam a poimoh dan, i paukam leh i thuchiam te a pilvang a poimoh hon sinsak hi.

Awle tuni’n Sawltak Johan thumna saulou i sut theih om bangbang in sut leng i chi hi. “Deihtak aw, na khalam hinkhua alamzang chih ka thei a, thil bangkim hoihtak a apai theih na ding leh chidam a na om theih na di’n ka thum hi.” – 3 Johan 1:2. Hiai a Johan thumna sim thakthak leng a thupi mahmah hi, a thumna te khenpi thum a khen in tua te sau loulou in I gen ding.

  1. Thil Bangkim Hoihtak a Apai Theih Na Ding
  2. Chidam Na Ding
  3. Khalam Hinkhua Alamzang

Hiai te tuh leitung a i hinsung ua dia a poimoh mahmah leh i sihnung a i Kha koi a pai ding ahia chih tan a thumna a ngetna poimoh mahmah tak ahi.

Thil bangkim hoihtak a apai theih na ding: Tulai in mi tamtakte’n lohchinna i gente uh aki lamdang thei mahmah ta hi. Hauhsakna sum-le-pai, neih-le-lam, inn-leh-lou in i ki dem uh a hiai te i hon neih chiang un mi lohchinte, mi thupite in i ki koih uhi. Tua dinmun a om zoulou te’n leng tua bang a omte mi lohchin leh mi thupi bang i hisak uh a, mah ni a zawng kisakna, mi pha zoulou kisakna banah lohsam kisakna in i dim uhi. Himahleh hiai bang a lohchinna i neihte uh zaw lohchinna gah ahi kim vek kei lotel hi. Mi khenkhat a dingin lohchinna ziak a tua bang dinmun in om mah le uh mi’ lohchin tengteng tua bang dinmun a om ding chih ahi sese kei hi.

Hiai a Sawltak Johan thumna “Thil bangkim hoihtak a apai theih na ding” chih tuh i lohchinna ding a lampi hon sal vak tu, lohchinna ding a honpi tu ding thumna thupi tak ahi hi. Mi chih in leitung a I hinsung un i sepding uh i zil ding uh leh i bawlding uh I mohpuak uh a om hi. Hiai te a hi bangbang a hongpai theihlouh chiang in mahni a ki ngaihsiatna, lungkhamna bang, mi dangte eng na hon tut hun a om sek hi. Tua bang hilou a I thil hih peuh ua Toupa ompihnate mu a, a vualzawlna I dongte uh tungtawn a I hih ding uh, i sep ding uh leh i bawl ding uh a hunhun a I zoh theih te uh chu lohchinna thupi tak ahi zaw hi. Tua ahihziakin thil bangkim a kipaktak leh lungkim tak a om a, i hih peuh uh leh I sep peuh ua lohchinna i neih theih na ding un thumna a nget gige apoimoh mahmah hi. lohchinna tak leh kipaktak a i zohtheih na ding un Toupa a ki nga a, Amah a ki bulphuhna hoihtak neih a poimoh pen mah hi.

Chidamna Ding: I niteng hunzatna ding ua poimoh mahmah tuh chidamna ahi. Damlouhna neuchik i taksa tung a hong om chiang in i hih peuh a lunglutna taktak a om theikei hi. Dam theihna tuh goumanpha thupitak ahi. Johan thumna a chidamna a nget tuh, Toupa’n thahatna damna hon piak a, tua te tungtawn a Amah min thupi na ding a hin a, hinkhua i zat theih na ding ua thumna hiding hi. Hiai ah ngaihtuahna dang om nawn ahihleh mi dam thei hetlou te’n Toupa’ thupina mu theilou ding uh adiam? Ahihkeileh Toupa gawtna ahi diam chih ngaihtuahna a om thei hi. A hi zenzen kei, damlouhna i tuahte uh zaw Toupa’ thilhihtheihna i tung ua aki latsem na ding, Amah i muhsem na ding uh, a vualzawlna i theih chian sem na ding uh ana hizaw hi.

Tua khenpi nih I gente tuh leitung a i hinsung ua a poimoh mahmah ahi. Hiai te i neihlouh chiang un i hin ding bang un i hingthei kei ua, siatna, haksatna leh sihna tanpha hon tung sek hi. Tua bang hilou a, i thil hih na peuh ua kipahna, lungkimna leh ahi bangbang i bawl ding uh I septheih na ding un thumna a nget apoimoh gige hi. Tua banah, damna thahatna Toupa kiang a nget apoimoh gige hi, eimah hatna a bangmah i hih theih omlou ahihziakin Toupa kiang a thumna I neih mun apoimoh hi.

Khalam Hinkhua Alamzang Na Ding: Khenpi tawp na leh apoimoh mahmah tuh i Khalam dinmun ahi. Leitung a i hinsan bang ahia, bang ding a hiai a om i hia chih I ki theih a, i phawk kik thakthak apoimoh hi. Tua bang ahih louh chiang in i omna san mangngilh in, eimah utna in i na om khasek uhi. A tung a khenpi nih i gente bang a i hong khosak theihchiang in, hiai te’n i Khalam hinkhua a ding in nna thupi tak hon sem sak hi. Bang peuh i hihna a lohchinna, Toupa ompihna i muh chiang in tua te’n Toupa belhsem na, Amah a ki ngaksem na hon tung hi. Tua mah bang in chidam a i om chiang in i hunte Toupa ading in i pia thei a, Amah nna i sem thei a hiai te’n i Khalam Hinkhua a Toupa toh i ki zopna hon bawl hoih hi. Huai ziakin tunia pat thumna nei tamni, Toupa ompihna ngen gige ni, bangkim ah Amah a kinga ni. Midangte ading a i thumna te leng Johan thumna bang hisak ni. Simtute Toupa’n hon vualzawl in hon ompih hen. Amen!

“Deihtak aw, na khalam hinkhua alamzang chih ka thei a, thil bangkim hoihtak a apai theih na ding leh chidam a na om theih na di’n ka thum hi.” – 3 Johan 1:2

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
21st October, 2020 | Weekly-Inspiration – 42.

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment