KISIK A NGAIHDAM NGETNA

0

“…. Na hotdamna a kipan a kipahna hong tung, honpe nawn inla, na thu man hon kilawpsak in” – Sam 51:12

Sam 51 sung a David ngaihdam ngetna a thupi mahmah hi. A pianni a pan khial ahi chih aki thei a, a thil hih te, a khelhna apat kisikna taktak nei in Pathian kiang ah ngaihdamna angen hi. Khial i hi chih mahni a i ki phawk louh chiang un ahi i khelhsem nak uh. I pianni ua kipan a ahoihlousa mah i hi ua, nute gilsung a pai a i omlai ua pat khial sa i hi uhi. Tua te ngaihtuah a nei kha mengmeng lou in hoih huntawk kisakna leh dik kisakna in i na om kha sek uhi. Tua bang a om loute’n lah kisikna nei i kichi ua, i kisikna un sawt daihtuan lou in a ngeingei, ama a khelhna i na hih sa te uah i lut kik zel uhi. Mihingte’n khelh kisikna nei ka hi i chih chiang un gentehna nih a om thei hi. Tua te tuh khovel dan a kisikna (lungtang a kisikna taktak omlou) leh kisikna taktak nei a lungtang ngaihtuahna a ki khek na taktak chih a om hi. Hiai tegel in i gingtu hinkhua ua Toupa nung i zuihna uh hon sukha mahmah hi.

“… Pathian deihlama lungkhamna in hotdamna ding in, kisikna a bawl a, kisikhuai thil a tun kei; khovel lungkhamna in bel sihna a tunzaw hi.” – 2 Korinthte 7:10.

I kisikna uh khovel dan a kisiknate a hong hih khak chiang in hoih in ki lang mah leh mahni hinkhua ah kikhekna taktak aom thei kei a, hiai in i niteng hunzatna ah Toupa i Biakna te ahon sukha mahmah hi. Mite’ hon theih pen thutuam ahi a, tua bang dinmun a i om khak chiang in ei mahmah leng bit kisak zohlouhna leh mahni hinkhua a bang hiam haksatna i tuah uh a om toutou a, hiai te’n sihna lampi ah ahon pi zaw ding hi. Hiai bang dinmun a i na om khak leh Toupa kiang ah ki lankhe thak ni, i kisikna leh i ngaihdam ngetna ana dik zoulou hi khathei ahihziak in. Khovel dan hilou a Pathian deihdan a kisikna taktak, lungtang a kikhekna lungsim i neih chiang un bangkim i hih na uah, i thilhih nate uah a hon siang sak a, lungkhamna ding leh ki sik tuntun na ding a om nawn kei hi. “… Pathian deihlama lungkhamna in bangchibang chihtakna, bangchibang kihahsiang nopna, bangchibang kiawilouhna, bangchibang patauhna, bangchibang lunggulhna, bangchibang phattuamngaihna, bangchibang gawtna ahia nou adia hontut tak. Bangkim ah huai thu ah na siang uh chih na kihihlang ta uhi.” – 2 Korinthte 7:11

“….Kua peuh Khris a a-om leh, thilsiam thak ahong hi a, thil luite tuh amangta ua, en un, thilteng ahong thakta hi” – 2 Korinthte 5:17. Hiai a i sim bang in kisikna taktak ei a hong om chiang in thilsiam thak bang i hong hi ding hi. Chihleh kisik aa hun lel di adiam? Bang ziak a ki sik i hia? Kisik a ngaihdamna i ngetna kua kiang a? Kua a i khelhnate apat hon siangthak thei a, hon siamthak thei? chihte i theih a i chian apoimoh mahmah hi. Hon ngaidam theitu i Hondampa, i Toupa leng phawk lou a kisik na tan a hunsa i hih khak ding alauh mahmah hi.

“… Huan nou na tatleknate uleh na khelhnate uh jiak a si na hihlai un, Aman hon hihhing hi” – Ephesate 2:1.

Hiai a i sim bang in taksa a khelhna te ah ana si himahle hang, i Hondampa Jesu Khris ziak in i Kha hihhing in a om hi.  Khelhna lohtak lah sihna ahi ngal a (Romte 6:23) I khelhnte uh ziak a sihna tang ding lai Jesu Khris i Toupa tungtawn in taangtawn hinna i tang ta uhi. Thupi in manpha lua maw, i Hondampa i khelhna tengteng pua a i tang a ahong sihna houh ngai kei ni. “… i khelhnate jiak in thah in aom a, siam i tanna ding in kaihthoh in aomta hi” – Romte 4:14.

Hiai Laisiangthou chang sim thak thak in, Toupa kakipak, Toupa Kakipak chini. Kipahthu genna inle i hunte uh zang tam in Toupa toh i hun neihte uh atam thei pen zang thei ding inleng kisak thak ni.

Pathian deihlouh dan a gamtang khalou i om kei ding uhi, thil sianglou i va hih khak uh bang, ahih keileh khelhna hilou cia khelhna a i va ki bual khak na uh a om ding hi. Tua bang a i om khak chiang in ei ah ki theih telna, khial leh thil diklou hih i hi chih ki theihna i nei pahpah hi. Tua bang hun in Toupa kiang ah ngaihdam ngen in, tua te hih nawnlou ding in thumni. Hiai mah tuh David thumna leng ahi, akhelhna te lungsim aom den ahih ziakin ngaihdam a aomtheih na ding in Toupa kiang athum hi. “…. Ka hoihlouhna tengteng silsiang inla, ka khelhna a kipan hon sawpsiang in” – Sam 51:2

A tawpna ah, Toupa ompihna ngen gige ni. I Weekly Inspiration te a i na gensek mah bang in lungtang a le khial thei gige i hih ziak un Toupa Khasiangthou ompihna i poimoh den uhi. David in Toupa kiang a a nget, “…. Pathian aw, keimah ah lungtang siangthou tak siam inla; ka sung ah kha diktak siam thak nawn in.” – Sam 51:10 bang in eite’n leng lungtang siangthou i neihtheih gige na ding un honpe thei pa i Toupa kiang ah ngen in thum gige ni. Sihna in ei hon ngak lou a, i ma a om gige ahi ziakin Toupa ah ki hih siangthou gige in, Amah ah i bit zoh nailouh a ahih lehleng a Khamuanna ngenni. Hon panpih ding  a i Toupa om gige ahi chih mangngilh kei ni.

“…Hun kipahhuai ah k’on ngaikhia a, hotdamna ni ah k’on panpih” a chi ngal a. Ngai un, tu hun kipahuai ahi a; ngai un, tu hotdamna ni ahi” – 2 Korinthe 6:2

Toupa’n saulou chik a i thugelhte i tanchiat ua ding in hon vualzawl sak henla, theihna bukim louh ziak a gen kim louh hiam, gelhkhelh omte a hon ngaihdamna i ngen a. I gen dik sun omte a sim khempeuh ading a thathak lakna, Toupa’ deihdan a kipiak semna ahong hihtheihna ding in a vualzawlna i ngen ahi.

Toupa’n simtute hon ompihin hon vualzawl chiat hen! Amen.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
2nd December, 2020 | Weekly-Inspiration – 48

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment