Kiselna Haihuaite Nungngat San Ni

“….kinakna haihuaite, khangthu sutte, kiselnate, dan thu a kinaknate zaw nungngat san in; huaite lah phatuamlou leh bang mahlou ahi ngal a”Tita 3:9

Mi khenkhat te’n Pathian thu bang kisel na ding khong, midangte toh ki hou theihlouh na ding bang in I zang thei uhi. Khenkhat leuleu lah Saptuam tuam ziak a ki mudah bang I om uhi. Tua te ka ngaihtuah chiangin Pathian thu I ginna, ei apen diklou deuh a diam? Eilam le ki et thak na di om a diam chih khong ngaihtuah in om hi. Pathian Thu Siangthou midangte sel na ding hiam; mitoh ki hou theihlouh nadia I zat mawk Pathian deih dan le hi lou thei hi. Tua bangte sang in, I ki houpih te’n nihvei thumvei I genpih nung a apom theih kei ua leh kisel sese hiam, ki muhdahna di zen a omlou leh ki na sese lou in, aw nem toh ki khakhia in I thumna ah phok in thumpih zaw leng phatuam zaw ding hi. Tua Toupa deihdan leng hizaw diing hi, I Laisiangthou changteel bangin tuate zaw nungngat sanni, phatuam lou leh bangmahlou hi.

Tulai’n I pilta ua, laisiam leng I tam ta mahmah uhi, tua ahih khomkhom in Biakna I lim sak di bang a I lim saklouh khak ding leng alauh huai mahmah khat ahi. Pathian lam enlou a I mihinglam a hong hat a midangte’ kua hiam ziak hiam, bang hiam ziak a Biakna I limsaklouh di lauh huai hi.

# Midangte toh ki hou theihlouh ziak.
# Pilna sang deuhdeuh ta, Saptuam dan dik kim sa zoulou lua. (Huchi deuh leh chi a, duhthusam tam ta…)
# Damsung a thupi na ding leh minthang na ding deih (Min hoih leh/status ngai thupi)
# etc etc chini.

Hiai te thil om thei ana hi gige hi. Khris a ki bulphuh te I hihziakin ki etchet gige apoimoh hi. I theihlouh kal a i lungsim a leng khial thei gige a ki hih ziak in.

“…huai hun in, Toupa tuh leitung pumpi a kumpipa ahi diing a, michih in Pathian bang in a beding ua, huai Min mah in a thei diing uhi” -Zek 14:9

Toupa deihdan bang hihiam chihte awlmoh in, theihsiamna leh Kha lam vakna honpe thei tu Toupa kiang ah ngen ni. Khalam a tuipai a om a, hunteng a I sep I bawl te Amah adia pomtak ahih theih na ding in ki lan siangthou gige ni.

– Thangginom Hangshing



Leave a Reply

Your email address will not be published.

*
*
*

× Direct Appointment