Michih in Jesu Khirst i hondampa dia i sang ni ua pan in kipumpiakna khat i bawl uhi. I khelhnate uh ziak a Jesu hong sihna i pom uh a, i Hondampa ding in Amah i sang uhi. Tua ahih toh kiton in i hihna bangbang ua Toupa mai a kipiak khiatna, Amah deihna bang a hing kheta ding, thil hoihlou leh hinkho luite taisan ding in i kipekhia uhi. Tua bang ahihlai in, hiai ni a i kipiak khiatna pen uh tamtakte’n hun kisa adiam chih ngaihtuah tham a ching mahmah hi. I kipiak khiatna uh hiai hun a hunsak lel i hih khakding uh lauhhuai hi. Hiai kipiak khiatna in hunbi tawpni neilou a, leitung a i damsung ua ding ahih dan kitheih a poimoh mahmah hi.
Toupa mai a i kipiak khiatna uh houchik a ngai a, hun bangtan hiam hongpai nung a i hinkho lui dan ua khosa nawn zel a, angeimah i bat kikzel ding uh alauh huai mahmah hi. Midangte’n i gingtu hihna uh i hinkhua ua ahon muh theih uh apoimoh hi. Tua bang ahihlai’n gingtu khat kahi kichi ngal a, Pathian mel liahtu, midangte adia bahna tungsaktu apang khak ding alauh huai mahmah hi. Pathian deihna bang in hinkhua ka zang na hia? Ka omdan te ka hunzat dante Amah deihna bang ahi hia? chia hunteng a ki-et a mahni a kidot thakthak gingtute ading in apoimoh hi. Leitung buainate leh siattheihnate lak a khosa lai i hihziak un Toupa deihna bang a om dia i kipiakkhiat ni ua pan hoih bukim den ding leh Amah deihna bang a om zou dending chih kuaman i genthei kei uhi. Ut hun a khial thei i hi uh chih zalenna nei i hi kei uh a, himahleh khelhna apuk theihna omlai ahi chih i theih uh apoimoh hi. Khial kahi, ka omdan diklou ahi chih i theih hun un Toupa kiang i zuan kik pahpah na hia chih tuh dotna poimoh mahmah ahong hi nawn hi. Pathian a kinga mi taktakte zaw ana khial khamahle uhleng a khelhnate ua pan thathak la in Amah ading in kizang semsem thei uhi.
Niteng a gingtu hinkhua a i zat lai un khatveivei lungkhiatna leh lungkhamna i maituah ding uh hong om theizel hi. Kipak gige a, maitai gige ding chimahlehang hon dahsak thei ding leh hon thadah sak thei ding hong om thei gige hi. Hiai bang hunte ah theihsiam haksa sak hun bang hong om thei a Toupa ah kikembit sak in, Amah ah i muannate uh ngak sawm tinten leng ei adia hon zohsak zohlouh ding omlou a, hon panpih in honpii gige ding hi. “Na omdan ding Toupa tung ah nga inla; amah muang in, aman ahihvek ding.” – Sam 37:5
Khovel thupina neih-le-lamte’n hon zoulua ahihziakin kipahna leh lungmuannate hiaite a ngak khak abaihlam mahmah hi. Mi englou kichi mahlehang, mi neih bangbang neihlouh ding bang lauh pen in i neita uhi. Hiaite sia chipah keimahlehang gingtu khat i hihna uah Pathian toh i kizopna uh hon sukha mahmah hi. I hih ding ua omte michih in i mohpuaknate uh thadahtak a sem mai hilou a, thanuam tak in sem in tuate chih taktakna toh sem in om peuhleng Toupa’n ngawl a hon koihlou ding a, i hihna bangbang uleh i neih bangbang ua lungkimna honpia lai mahmah ding hi. Midangte tung a engna neihneih chih bangle Toupa ah i muang zou taktak kei ua hi khathei ding hi. Khelhna hiam Toupa deihlouhdan a ana khosa kha i na hihkhaktak a ahihlehleng kisikin i hihna bangbang toh Amah kiang zuan pahpah leng Aman hon panpih ding a, a hon pii ding hi. Lungkham mangbang a i om hun unleng Toupa mah belhpen in nei gige ni. Amah ah tawldamna bukim a om a, i haksatnate uleh i buainate uh honpuak sak ding in mansa in a om gige hi. I mangbat nate uh Amah kiang ah nga ni, i Toupa Jesu Khrist hakkol puak a zang hi. “Ka hakkol a nuam a, ka puak leng a zang hi” a chi hi.” – Matthai 11:30
Toupa mai a i kipiak khiatna uleh, Amah deihna bang a khosa ding a i kichiamnate uh i damsung ua ding ahi chih i theita uhi. Tua ahihziakin nuamtak aom thei gige lou ding i hi uhi, himahleh lungkhe lou in Toupa adia i hih te uh, i sep-i-bawlte uh khawllou in semzom toutouni. Tua haksa i sakte uh, i gimthuaknate uh denchiang a thonlou ding a, agah i muhding uh om gige ahi chih mangngilh keini. “Huchi in thil hoih hih chimtak keini; i lungkiak kei leh a huntak ah i at ngei ding uhi.” – Galatiate 6:9
Tukal adia saulou chik a i thugelhte ngaihtuah a nei a, Toupa adia i kipiak khiatnate uh phawk thatkhak a nei in kihihhang ni. Lungke lou in nna hoihte, Amah adia hoih leh phatuam peuhmahte hih zom in hahpan sem in pang ni hang. Tua bangte i hih chiang’n, Sawltak Paul bang in khatvei nichiang in kitaitehna katai zouta i chithei chiat ding uhi, tua ding in simtute Toupa’n hon ompihin hon vualzawl hen.
“Douna hoih ka dou khinta a, ki taitehna ka tai khinta, ginna ka lenkip paisuakta hi. 8Tun ah zaw diktatna lallukhu kei ading in koih in a omta, Toupa vaihawmpa diktat in huai ni chiang in kei a honpe ding, kei kiang kia hilou in a kilakna it peuhmahte kiang ah a pesam ding hi.” – 2 Timothi 4:7-8.
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; theihna bukim louh ziak a i gen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
16th June, 2021 | Weekly-Inspiration – 74