KIPAHTHEIHNA

Khovel haksatak mai, thu tuamtuam buaina leh sihna mi tamtak te’n a tuah lai un kei leh nang hindam a om te’n kipahthu genna ding kammal khat bek niteng i nei thei diam? I tung a bangteng hongtung hita lehleng kipahthu gen ding i neithei diam?

Tulai hun in mahni buai ah i buai mahmah ta ua, ei-leh-ei iki sikhop ta uhi. I nek muh na ding uh, nop isak na ding uh leh i maban ding uh khual na in i hih theihtheih i hih ta ua, niteng a i hindan uh a ngeingei hileh ki lawm in tuate mah buaipih in i khosa uhi. Huchi ahihlai in midang awlmoh na ding hun leng i nei thei taktak nawn kei uhi. I insung mite hi in, i lawm i vualte leh i-kiim-i-kiang a omte toh ki houlim a, i kipahna i dahna leh lungkhamnate ki gen tuah na ding hun i pe nawn kei uhi. Tua bang hunte tuh Electronic Media, Social Media tuamtuam ah i zang bei zaw ta uhi. Hiai khong ziak a diam tulai a i khotang ua sihna te’n khentuam neilou a i hinna uh i ki lak nak uh. Panpihtu ding omlou kisakna, ahih keileh midang te’n itung a ahaksatna te uh gen khiat theih na ding a atam zaw ki omlou adiam? ahih keileh bang ziak a tua bang itung ua a hongtung sek chih te lungsim ah om mahmah hi. Hiai lam toh kisai gen sawm ihi kei a, tulai a i khotang ua thiltung te’n lungsim hon thomhau sak mahmah ahihziakin mahni a i ki ngaihsutna uh hileh cia thumapi a i gen ahi.

Awle, Sawltak Paul tangthu i theichiat uh a, suangkulh a tan lai in bang chi bang haksatna soisakna te atuak dia. Haksatna a tuah dingte ngaihsutna in le a gen ban kei hi, himahleh tua bang hunte tuh amah ading in thathak lakna, midangte adia lam-etna tungtu, Pathian toh ki houlim na in a azang zaw hi. “…Unaute aw, tuin ka tung a thil hongtungte, Tanchinhoih a khanna dia hongtung ahi uh chih na theih uh ka deih hi” – Philippite 1:12

Rome khua a sungkulh sung a omlai inleng Pathian phatin, bangkim atuah te tung ah kipahthu agen hi. Ephesate te kiang a alaikhak ah leng hi chi’n i mu hi. “Phatna late, Pathian late, khalam late a kihoupih chiat a Toupa kiang a na lungtang tengteng ua ging kilawm bawl leh lasa in, I Toupa Jesu Khrist min a, Pathian, Pa ngei kiang a bangkim tung a kipahthu gen gige in.” – Ephesate 5:19-20

Hiai ah i ngaihtuah na saulou pe zual leng, huai hun lai a suangkulh om dingdan toh tulai hun a te ki bang lou ding hi. Thilsui mi leh Laisiangthou zilte apan i theih bang in Sawltak Paul mahleng tua sung a kolbut a om hiding in a gingtak huai mahmah mai hi. Tua bang haksatna atuah te gen sang in kipahthu genna in adim zaw hi. Sawltak Paul in kipahthu agen pen kumkhat ading hiam, ahunbi nei a gen ahi kei hi. Hunteng a agen ahih bang ah, athiltuah te tungtawn a agen hi zaw hi. Bangteng a tung ah tung mahleh kipahthu bangkim in a gen hi. Sawltak Paul in Ephesate a hanthon bang in ei te’n le hiai ah zil ding leh sinding tampi i mu hi. Khovel hamsiatna a om ihih ziakin, nuamsa den ding a om ihi kei hi. I maban ah haksa tampi i tuahding aom thei a, i na maituah sa leng tampi aom ding, himahleh hiai te ziakin kipahthu gen in, Pathian i naihsem na un zang thei leng Sawltak Paul mah bang in hunteng ah kipaktakin i om thei ding hi.

Nidanglai hun in phak natna (leprosy) chu natna lau huai mahmah ahi a, adamdoi dingle om lou in tua bang natna nei kha te a khosung uah omthei lou uh a, kho puak a akoih khe zel uhi. Jesu leitung ahongpai lai in phak sawm ahih dam na thu (Luke 17:11-19) sung ah i mu hi. Tua phak sawm te hih dam ahih lai un mikhat kia kipahthu gending in akiknawn hi. “Huchi in Jesu’n, “Mi sawm hong siangta hilou na hi umaw? Kuate koi ah?” chi in a dong hi. Pathian phat ding a kiknawn, hiai theihlouhmi kia loungal kuamah muh a omlou uhia?” a chi hi.”v17,18
Tulai hun inleng kipahthu gen ding tampi i-kiim-i-kiang a a omlai in kipahthu gen ding i nei tawm mahmah uhi. Tua kia leng hilou in thumna neih hun ding leng i nei tawm mahmah uh kasa hi. Vualzawlna tampi i muh te uh a hi di mong i sak khak ziak ua leng kipahthu ki genlou hi khathei hi. Tua bang ahi kei, hiai te tuh Pathian a vualzawlna i dong uh ahi zaw hi. Hiai te ziakin leng kipahthu gengen ni.

“Pathian thei ngal in Pathian bang in a pahtawi kei ua. A kipahthu leng a gensam kei uhi; thil thulimlou a ngaihtuah zawta ua, a lungtang hai uh a hong mialta hi.” – Romte 1:21

Kipahtheih louh na, kipahthu genna ding nasan theihlouh na te zaw Pathian deihlouh dan ahi a, khelhna chikhat ahi chileng leng ikhial kei ding hi. Pathian neite’n zaw kipahna ding nei teitei uh ahih ziakin. “Kipahthugen a Toupa pahtawi in lasa unla” – Sam 17:7a; “…kipahna dan leng thei un.” – Kolosate 3:15b.

Kipahthu genna ding haute zaw Pathian tate ahih dan uh hon theisak hi. Kipahthu gending i theih louhtawp in leng i kiim i kiang enleng Pathian thilsiamte thupi lua hilou maw, tua te maimai in leng kipahthu genna ding tampi a om khin hi. Pathian kiang a ngetna sang a kipahthu lam i gen tam chiangin ei mahmah ah leng kipahna ding imuh beh a om gige hi. I tung a thiltung aki bang vek kei ding, khenkhat te haksatna tuah toh midang khat a ki bang vek lou ding mah hi. Himahleh hiai te tungtawn akipahna neithei ding leh kipahthu gen thei gige ding in simtute Toupa’n hon ompihin hon vualzawl hen!

Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
June 24, 2020. | Weekly-Inspiration – 25)



One Comment

Avatar
Lalhmangaih Hauzel
June 24, 2020 at 7:58 am24

Amen. Kipahhuai leh kipahna di thu/thil te I zon a, Pathian kiang a I genkhiat pahpah leh nuam lua maw. Thil neu ahihkeileh hou chik kanasak te, a hi ding mah a kana koih te, a vualzawlna a tang dia kikoihna, a hon hehpih ding mah a kana kikoihna te Toupa kiang ah ngaihdam ngetna leh kipahthu genna te in kana zang theita hi. Kipahthu genna di thil/thu te hon phawk khe sak in chi in ka thum zel a, a hong suah khiat hunhun in ka thum pah ngal sek hi. Hichia I hih leh Bible in hun teng in thum un achih kizui kha dek sim pan ana hi. Ngetna lam sang a kipahthugenna a hausa hih ding leh hih touh zel di ka lamet leh ka thumna ahi.

Reply

Leave a Reply

Your email address will not be published.

*
*
*

× Direct Appointment