KHASIANGTHOU’ THEIHSAKNA

Tulai in khelhna chih i gen khak chiang un hiam, thugen mite’n a hon gen chiang un mohpaih a om kisakna, vaihawm khum a om kisakna dan in i na la kha sek uhi. Kei hinkhua ka thu ahi chi ut hileh kilawm in khelhna te i gen chiang un a zak leng i za ngap kei uhi. Thugen mite’ adia le khelhna chih tangtak a gen khiat ngam di hi nawnlou ding khop in tulai khovel a hong om ta hi.  Huchi dinmun a om ta himahlehang, ei gingtute’ lak a khelhna thu i gengen ding uleh, i dik louh nate uh i hoih na ding ua i ki tai hilhhilh utuh apoimoh penpen ahong hi zaw ta hi.

Pathian in Amah toh hunteng a om khawm gige ding, Amah toh tonkhawm gige ding in a hon deih a, tua ziak mah in banghiam thilhoihlou i Kha adia siattheih na leh Pathian toh i ki kal hon buaisak thei ding i hih khak dek hiam, i maituah chiang in theihtheih na a honpia sek hi. Hiai a theihtheih na tuh siamlouh kitanna, hoih lou ahi chih theihtheih na lungsim khat a hong om gige hi. Hiai pen Khasiangthou nasep, Khasiangthou hon theihsak ahi chih i theih uh apoimoh hi. Pathian thu gingta a, tua te theisiam mai hilou a Khasiangthou ompihna toh i ton kei leh zaw hatlouh hun leh bahhun atam mahmah kha ding hi.

Johan 16:13 na a “…Thutak Kha a hongtun chiang in thutak tengteng ah nou a honpi ding…” achih mah bang in i tung uah Kha siangthou nasep theihtheihna in thutak, lampi dik ah ahon pi hi. Tua te tuh i Laisiangthou mah ah leng i mu hi. Johan 16:8, “Amah a hongtun chiang in, khelhna, diktatna, leh vaihawmna thu ah khovel a siamlouh dan a theisak ding hi.”

Khelhnate, siatna te leh diktatlouhnate i gen chiang ua i lungsim ua hong om masa sek tuh mite muh a khelhna i hih khak te khelhna vuak in i ngaisek uhi. Mite’ hon theihpih hilou, a guk a i thlhihkhelh te uh, i muanhuai louh dan te uleh i siatdan te uh kuaman hon theihpih kei mahleh hiai te tuh khelhna thupi zaw ahi chih i theih uh apoimoh hi.

Pathian deihlouh dan thil hoihlou, siat theihna ding te i hih khak dek chiang un theihtelna, hiai zaw hoih lou ahi chi a, lungnoplouh theihna leh  hon nial thei om leh tua te i hihlouh a i tawp uh apoimoh mahmah hi. Pianthak sate’ bel khelh utna sal a tang ut nawnlouh ahih ziak un hiai bang a va khelh theih na ding a tawm hiai-hiai hi, amaute Khasiangthou in sungluah ta ahihziakin. Pianthak nailou te’  bel huchi om nailou ahih ziak in, hiai bang a theihtel in pianthak na lampi ah ahonpi thei hi. Eimah utna leh nopsaknate tel zaw a ki bawl hoih sawm tuanlou a i om sawm lailai le zaw denchiang in hong kikhel kha thei ding hi.

I hotdamna Jesu Khrist kia a om ahi chih thei in, tu ahunlai in Toupa kiang zuan ni. “Na pianthak ngeingei ding ahi k’on chih lamdang sa ken. Huih a utna na ah a nung a, a ging na za hi, himahleh koi a kipan hongpai ahia, koi ah ahia a hoh ding chih na thei ngalkei a; kuapeuh Kha a piang huchibang mah in a om hi” a chi hi. – Johan 3:7-8.

Huih a utna na a nung a, aging ki za a himahleh koi a kipan a hongpai a chih i theihlouh mah bang un Khasiangthou nasepna le tua bang ahi hi. Bang chibang a i tung a nasem hiam chih i theikei a, Amah nasep ei deihdan leh utdan a i lak theih leng ahi kei hi. A houpihna aw te za a, i hih na bangbang toh khial i hi chih ki pom a Jesu Khrist i hondampa dia sang a, ki bawl hoih zel a Toupa deihdan a hinkhua zatding tuh hiai leitung a i hingsan ahi hi.

Midang i kiim i kiang aomte’n hiai pa hiai nu zaw Pathian thu awi lua hi ve aw hon chihtheih di tan ua i om theih ding ahi zaw mah a, huai hon chih nasan mah ua dembei a i om ding ahi hi. Sawltak Paul mah bang a Toupa deihdan a om a, sia leh pha siangtak nei ding a iki bawl hoih gige uh apoimoh. (Nasepte 24:16) Hichi bang a i om chiang un niteng, hunteng in Khalam a pichinna in hon zui toutou ding a, tua in Pathian batna, Amah a siangthou bang a siangthou na in hon zui ding a, niteng hunteng in Amah toh ton in siangthou tak in i om thei ding uhi.

“Tua ziak in Pathian leh mihing tung a hihkhiallou ding in sialehpha siangtak nei ding in ka kibawl gige hi.” – Nasepte 24:16

Tuni’n Kha Siangthou houpihna aw te za a hiai zaw hoih lou ahi, hiai zaw kei adia sianglou ahi, Pathian toh kakal uh buaithei ahi chih lungsim leh theihtheihna i neih omte nungngat san kisin ni. Hiate ngai neu kei ni Toupa hon houpih na, Amah deihdan a i om na dia a lampi hon bawl saksak ahi chih phawk ni. Hinkhua kikhek, Toupa deihdan a hing khe theichiat ding in kisa ni, I lametna, i ginna te Jesu Khrist ah nga in i hih na bangbang toh Amah kiang a ki pekhe thei gige ding in kisa chiat ni.

“Amah a Pathian diktatna i hong hih theihna ding in khelhna himhim theilou amah Pathian in eite ziak in khelhna in a bawl hi.” – 2 Korinthte 5:21.

Amen.

Toupa’n i thugelhte tungtawn in theihsiamna leh Khamuanna i tangchiat uah honpiak i ngen a; theihna bukim louh ziak a igen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 03rd February, 2021 | Weekly-Inspiration – 56)

Leave a Reply

× Direct Appointment