KHAGAHTE – (PART – 1)

0

“Kei a grepgui ka hi a, nou a hiangte na hi uh. Kuapeuh keimah a om gige a, keileng amah a ka om gige na, huai mah tampi in a gah hi; keimah lou in bangmah na hih theikei uhi… Hiaiziakin tampi a na gah chiang un ka Pa pahtawi in a om hi, huchi in ka nungzuite na hi ding uhi.” – Johan 15:5,8.

Johan 15na tuh tanchinhoih gospelte lak a gen nei mahmah leh a sim mahmah leng anuam pen in a theihtheih hi. I Toupa Jesu lou a bangmah hilou i hih dan uh chiang takin a hon hilh hi. Amah toh om gige a, Amah a zungkai i hihchiang in khagah tuamtuamte’ i neithei pan uhi.

“Kha gah ahihleh, itna, kipahna, lemna, thuaktheihna, migitna, hoihna, muanhuaina, Nunnemna, kidektheihnate a hizaw uhi; huchibang kalh lam in danthupiak himhim a omkei hi.” – Galatiate 5:22-23.

I Toupa Jesu’n Amah lou a bangmah hih theilou ding i hih dan uh chih ahon hilh hi zenpi mahni a thil hih utna abaih lam mahmah hi. Eimah hih theihnate suang in banghiam sepsuah tupna a om sek hi. Pilvang ding i kichih hun natan unleng Toupa deihdan a om ding, Amah a om gige ding chih mangngilh hun hong om thei hi. Hiai bang a i om khak chiang un khagahte neih abaihlam kei hial a, tuate sang in siatna leh buainate i maituah hun uh ahong om zel hi. Khagahte neihnak sang in lungkhamna leh haksatnate’n ahon bawm sek hi. Bangkim i hih na uah, aneu pen hi’n alian pen tan a Toupa a kikepbitsak gige a, Amah a om gige apoimoh lel hilou in, ei gingtu te adia alou theilou ahi chih theih taktak a poimoh mahmah hi. Toupa toh i hunte zang a Amah a zungkai a i om chiang un tua khagah tuamtuamte i neithei pan ding uhi. Tua khagahte saulou chik in i gen ding.

ITNA:

I Laisiangthou a i muh mahbang un amasa pen ah itna a kigelh masa hi. A thu kivualh dan mai in itna poimoh hinatel e chih a kilang tuanse hi. Hiai a itna kigen tuh mihingte ngaihdan/lungsim a om hongsuak lel hilou, bang hiam a kinga leng hilou (unconditional love) itna neihna ahi zaw hi. I Toupa Jesu gen bang in ‘Mihing in a lawm adia a hinna a piak sang a itna thupizaw kuama’n a neikei hi.’ – Johan 15:13. I Toupa Jesu eite adia a hong sihna itna hilou i chi theikei hial hi. Hiai bang itna dang koimah a muhding a om keihi. Mihingte khelhna tengteng la mang dia a hong thuaknate leh ahong kipiakkhiatnate lel leng a thupi lua hi. Mihingte ngaihtuah nasang mah in atak a athuaknate muthei a thei hi mai zenleng mihing ading in haksa leh et hak hinatel in chia. Hiaite itna ziak hilou ahi i chithei zenzen diam!  I Toupa hon itnate theisiam hileng zaw kipahthu genna ding a om den hi. Hiai bang a itna eite’n i neitheihna ding un Amah a om gige apoimoh a, pianthakna taktak Amah ah neih apoimoh penpen hi. Hiai bang a i om chiang un Khasiangthou ompihna toh i mihingpihte tung mahmah ahleng itna i neithei ding uhi.

Mi tamtakte’ Pathian thu-awi kahi kichi sek mahlehang i mihingpihte uh lak ah itna lahna atawm mahmah mai hi. Mahni angmasialna, midangte khotuahlouhna leh mahni kia ki-itna toh hinkhua i zang sek uhi. I Toupa Jesu hon itna theisiam zou taktak lou i hi di uam? Ahihkeileh i pianthaknate uh, Pathian thu-awi kahi i kichihnate uh bang ki-et thakthak a poimoh diam hichi bang a i om theihlailai uh chih ngaihtuah tham a ching mahmah hi. Toupa a kimuh chetna taktak neilou a, Amah a i omlouh chiang un hiai khagah itna neih theih ding vual ahikei hi. A dikdik in genleng mihingte ki-itnate atam zaw banghiam a kinga ahisek hi, miteng i huchi uh i chi zenzen kei himahleh mi tamtakte’ melhoihna ziak bang, ki-etlahna ziak bang, sum-le-pai ziak bang leh thildangdang ah a itna uh akinga sak uhi. Hiai bang itna te i Laisiangthou a i muh uh itna toh a kibang keihial hi chih thei thakthak leng a deih huai hi.

KIPAHNA:

Banghiam thil a kinga hilou i Toupa Jesu Khrist tungtawn a kipahna ahi. Mihingte’ kipaktak a om gige ding chih thil haksapi leng ahi. Banghiam buainate haksatnate i tuah chiang un i kipahna uh adau mahmah mai hi. Lusuunna hun bang ah kipaktak a om sang in theihsiam a haksa mahmah zaw lai hi. Himahleh i kipahna uh Toupa’ ah a om thei gige hi. Amah a kinga mi hi a, Amah a i lam-etnate uh i ngak chiang un kipahtheihna, lungkim theihnate i neithei gige uhi. Grapes in hiangtampi nei a gah a suang bang in Toupa  ah kinga in Amah ah om gige leng kipahna i neithei gige ding uhi.

LEMNA(LUNGMUANNA):
Tawmchik in genleng buaina omlouhna ah lemna a om hi. Hiai khagah lemna (lungmuan theihna) tuh i niteng khosakna ua a poimoh mahmah ahi nawn hi. I mihingpihte toh kilem tak a om gige chih bang thil haksa pi ahong hi nawn hi. Mite toh kilem tak a om thei mahmah lou chih bang le mahni hihna ki-et thakthak apoimoh mahmah hi. Khenkhat te sepna vai toh kisai bang ah lungmuangtak aom thil haksa pi ahi mawk hi. Bangtan i sepna om ding ahia chi a lungnoplouhna bang aom thei hi. Hiai te lou in thildang ah lungmuangtak a om theihlouhna a om thei hi, himahleh Toupa Jesu a kinga mite ading in i maituah ding uh haksatna leh buainate om zel mah leh lemna leh lungmuanna Amah tungtawn in i neithei gige uhi. Bangkim i hihna uah Toupa a kinga teitei leng Amah a lemna leh lungmuanna i neithei ding uhi.

Khagah dangte maban i Weekly Inspiration ah hon ki suzom ding hi.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

14th July, 2021 | Weekly-Inspiration – 78

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment