Hatlai tate mi hat khut a thaltangte bang ahi uhi. – Sam 127:4.
Nu leh Pa te hi’n, Upa lam deuhte hileh a tuailai nite uh a ngailou om ding un a gingtak huai kei hi. Tua bang ahih kei lehleng a ngaihtuah khak hun uh om sam ding in a gingtak huai hi. I Laisiangthou tangteel a I sim bang in, I hatlai nite chu I tuailai nite ahi a, I utteng I hih theih hun uh leh I paallun lai hun uh ahi hi. Hiai Tuailai lai hun a I omdan, I gamtat dan in maban a I khosak na ding leng ahon bawl hi. Mi tamtakte’n hiai hatlai nite ah Toupa phawk in, Pathian khut a ki nga uh a, Pathian lau in bangkim ahih na uah Amah toh ton uhi; tua ziak mah in a upat nung unleng kisiik na ding leh ki bawl hoih na ding tam nei ding un I gingta kei hi. Huchi ahih lai’n, mi tamtakte mah hiai hatlai ni hunte zang khial in mahni utna leh deihteel na te a I pai khak ziak un agah I upat nung un I thuak toutou uh a, tu inleng I lou tou lellel uhi. Mihingte’n i nnasep gahmah at I hi uh chih i sang a upa zaw te’ leh midangte hinkhua te ah chiang takin I mu thei hi.
I tangteel simthak leng, ‘Hatlai tate (Tuailaite) mi hat khut a thaltangte’ bang ahi uhi’ a kichi a. Hiai a I gen ut thu thum (3) a om hi. Huaite tuh, Hatlai Tate, Mihat Khut leh Thaltang ahi hi. Thaltang (arrows) kichi a kap kha nai hetlou I om lotham ding in ka gingta hi, tua te lak a kei leng kahi hi. Himahleh hiai thaltang kichi a theilou om ding in I ki gingta kei a, atak a mu nailou I om lehleng alim bek a mu kha dingin I ki gingta hi. Hiai thal zang siamte’n hiai tungtawn in a utte uh hoihtak a ngim in akap chetchet thei uh a, tua thaltang a leng tuh khauh mahmah leh lauh huai pi leng ahi hi.
Awle, I gen ut hiai pen tak ahi kei a, bang ziak a Hatlai tate (Tuailaite) hiai thaltang toh teh khak a om I hia chih ahi zaw hi. Hatlai tuh I tuailai nite, hiai hunte a I hindan te chileng I khial kei ding hi. Hiai hatlai nite in hih moh ding I nei kei uh a, I tha uh hat in, I lungsim uh leng ahat mahmah a bangkim hih theih na hunlem I nei chiat uhi. Hiai hatlai tuailai hun tuh Toupa’n Amah gam na I sep theih pen hun, A Tanchinhoih I puang zak na ding ua hun hoih leh Amah Min I tawisang a Amah deih na bang a hinkhua zang ding a hon deih hun ahi hi. Huchi ahih lai in hiai hunlai mah tuh melma Satan in leng hun hoih a la in, mi tamtakte’ lampi hoihlou a khem in ahi lou a hinkhua zatna leh khelhna in ana pi hi. Tua ahihziakin hiai I tuailai nite uh tuh Toupa toh tonlou a eimah utna a I pai khak ding uh aluah huai mahmah hi. Chihleh I hatlai hunte uah bang chibang in khelhna leh lampi diklou a I ki veng hoih thei dia? chih I en nawn ding.
I tangteel ah lut nawn leng Thaltang I chih chiang in a kapna a ‘Thal’ om lou in ki kap mawk theilou hi. Tua mah bang in hiai ‘Thal’ kichi tuh I Nu leh Pa te hiam, I sang a upa zawte, Pathian deihna bang a hinkhua ana zangte toh I teh khak thei hi. Tulai hun in Nu-le-Pa te’ thulak nawnlou, mahni utna leh mahni a dik kisa in mitam tak te’n hinkhua I zang uhi. Nu-le-Pa te I leitung Pathian ahihlam uh leng phawk zou lou leng hi nawnlou in hiai ding ale ngaihtuahna lungsim nei nawnlou tamtak I om uhi. Khovel pilna a pil kisak na in mi tamtak I om uh a, Nu-le-Pa te leh Upa deuhte bang thulak nawn lou kisa in, thusim bawllou khong in om uhi. A poi nawn mahmah lah khovel in hon puak khiat nawn ahih leh Nu-le-Pa te toh a tate uh kal khang (generation) hong ki lam dang mahmah hi. Niteng hindan, tawndan te thakhat a hong kikhek mah a bang zou hial hi. Ta te’ pilna leh siamnate’ sang lo mahmah ta a, Nu-le-Pa te’n thei ban nawn lou in, Tate’n leng Nu-le-Pa te haisakna leh mawl sakna in khovel hong om hi. Hiai bang a khang hong ki lamdang na tuh mitamte’ noptalna hun, Nu-le-Pa te khem theih chiteng a I khem theih na hun uh a hong suak ta hi. Khovel theih leh mite theih in pil in, mi tung a leng in, mi te theih in siam mah lenleng I leitung Pathian I Nu-le-Pa te deihna bang ahinkhua I zat tuan kei a, amau sulungkham tu I hih leh zaw mi lohching I hi thei ngeikei ding hi. Hiai tuh Pathian deihdan leng hi lou ahih man in I maban zaw hamsiatna leh khelhna a ki bual toutou ding mah I hi zaw hi. “Ka tapa, na pa hilhna za in, na nu dan mangngilh ken” – Paunakte 1:8. Nu-le-Pa te’ deih dan bang hi a, amau apan zillai I lak a, Pathian bang chituk a ana zah uh hiam chih I dot ding ahi hi. Amaute I leitung Nu-le-Pa ahih man un I theihna uh leh I pilna te uh ki khe mah leh bangkim amau I hilh a, amau thu a I om ding ahi. Hiai tuh Toupa deihdan ahi a, hiai bang a I om chiang in mi lohching I hong hi ding a, Pathian mi zat, Amah ading a mi muanhuai Nu, mi muanhuai Pa I hong hithei ding hi. I hatlai ni te un I Nu-le-Pa te mah toh kalsuan I suang thak ding leh thathak la thak zel ding in I ki ngen hi.
A tawpna ding in I tangteel a “Mihat Khut” ki chi bang hi a kua hi hiam chih theimai ding in I ki gingta hi. I Toupa Pathian lou a bangmah hilou leh bangmah hih thei lou I hih dan I ki phok thakthak uh angai hi. Mihingte hinna a manphat dan I thei uh a, second khat lel leng I hinna uh I hih sauthei kei hi. Hunteng a hinna hon pia I Toupa a ki ngak gige apoimoh dan hiai ah leng chiangtak in I theithei hi. I tangteel ua ‘thaltang’ a ki gen bang in I Tuailai nite uh I hatlai ni te in Toupa’n Amah adia hinding, Amah a dia mi muan huai te hiding in a hong zang ut hi. Pilna siamna leh thilhihtheihna a hongpiak te Amah ading mah a zang ding in a hong deih hi. Hiai khovel noptalna te a ki zang mailou a, I hunte uh leh hihtheihna I neihte uh Pathian ading a zang khe ding in thathak la in ki langkhe thak chiat ni. Kei hiai gelhtu pa leng ki langkhe thak in. Simtute tengteng Toupa’n hon vualzawl in hon ompih hen. Amen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
2nd September, 2020 | Weekly-Inspiration – 35.