JESU NUNGZUI HITHEI KEI DING

Text: LUKE 14:25-35

Thumapi:  Hotdamna ei lampang ah a man bei a  piak in i om a, hon Petu ading in bel a manpiak tam mahmah hi. Nungzuihna ahihleh a man bei ahikei a i piak ding a man tampi om ahi chih thei gige ni. Huanah Hotdamna leh nungzuihna a tuam tuak a pai a kikhenthei hi mawk lou a, nupa ki-it te bang a kitonkhawm helhel ahi. Sawltak Paul in, Lau leh ling kawm in na hotdamna chiat uh semkhia un; (PHILIPPITE 2:12b) achih bang a hotdamna hinkhua selguk theih himawk lou a, hotdam i hi chih min i kampau, nnasep leh i omdan a amuh ding uh ahihlai in muhthei ding Hotdamna leh pianthakna hinkhua nei in na kithei hia? Mi tampite Jesu nungzui akisak lai un nungzui taktak lou ana hikha thei uhi. Jesu nungzui taktak i hihleh i hihlouh Jesu thugen apan in i na kisui chiat ding uh. Jesu’n, Ka nungzui a hithei kei uh achih kuate ahia?

Nungzui teng Nungzui taktak hilou

Luke 14:25 Huan mipi thupitakte a kiang ah a hohsam ua

Luke Bung 14 bul ah I Toupa Jesu Khrist khawlni in Pharisai vaihawmmi khat inn a an ne ding in a hoh a, huai inn ah dantheimi leh Pharisaite’n a enkhia ua, a hihkhelh a chang den uhi. Hiaite pawl bangle agenda tuampi nei  a Jesu nungzuihna apibawl mahmah khat hi uhi. Jesu hoh nateng bang a muh in om mahle uh, Jesu’n na paktak lou hi. Eilak ah Pharisai leh dantheimi te bang a Jesu nungzui tampi ki-om kha ding hi. Midangte mohsakna ding leh hihkhelh kia zong a tha-it mahmah pawl, mahni kidiksak, kihoihsak leh kiletsakna ngen a dim, nel huai hetlou, mi bang sukawt gagaih, kipilsak leh a theipen bang a om leh Jesu nungzui pen dan a om mahleh Jesu’n a nungzui dan in simlou hi. Khrist toh kizopna hoih neiloupi a A nungzui kichi zaw a lemching ana kihi nuam mahmah eive. Jesu toh kizopna hoih neite zaw Ama(Jesu) neihte leh hihnate gah khe ding hi hang a maw. Hiai a mipi thupitakte’n Jesu nung a zuih dan i mu uhi. Jesu thillamdang hih mu ut in mipi tampi in zui uhi. Salam a damna kia deih a zui om uhi. Salam ah i lamet bang in damna mu kei leng Jesu nung i zui diam? Thumna i neih chiang bang in khalam sang in salam thil i ngen tam zaw gige uhi. Jesu thugen leh a thillamdang hihte ziak in a ngaisang le tampi om uhi. Hiai ah Jesu nungzui leh a ngaisang/fans kichi kibang lou a, Jesu theih leh neih kal akigamlat bang in kigamla mahmah hi. Khalam thil sang a salam thil ding kia a Jesu nungzui. A demand sang lolou leh man piak ding nuam hunlel tan khawng i utlam ana hisek hi. Mipi tampi, salam thilte kia a metna zongte ziak a Jesu thanuam tettet hiallou a mipite hihna thei lua ahihman in nungzuihna in a ngiat (demand) hiai bang ahi ana chi hi.

 

1. Thildang tengteng sang a Jesu Khrist Itpen a neih ding.

 “Kuapeuh ka kiang a hongpai in, a pa, a nu, a zi, a tate, a unau a sanggamnu, a huat kei leh ka nungzui ahi theikei ding. (14:26a)

Innkuante huat kei leh chih in hon kiguihsak zezen hi. Mundang alah nu leh pa zahtak ding leh innkuante it ding gen a hiai mun ah huat kei leh chih in a thugen amah leh amah kikalh a bang hi. Hiai a I Toupa’n a gen tup pen ahihleh Amah amasapen leh asunggilpen a luah ding genna ahi. Innkuante toh teh a Amah i itna a let zawk, a san zawk ding ahi. Amah a dia akhatna reserved ahi a, adangte anihna hong pang ding chih adeihna ahi. Kuapeuh a nu hiam, a pa hiam, kei sang a it zaw tuh ka mi hitak ahi kei; kuapeuh a tanu hiam a tapa hiam kei sang a it zaw leng, ka mi hitak ahi kei (MATTHAI 10:37). Ka lawmte khat (Hindu sahkhua apan) a pianthak in a nulepa’n a kiang ah na Jesu sang in kou na nulepa non it zaw hiam?  chih dotna haksapi ana dong uhi. Aman Jesu ka it zaw achih ziak in inn apan hawlkhiak in ana om hi. Nungzuih man a piak tam kasa mahmah hi. Gingtu hinkhua ah nungzuihna man i piak ding tampi ana om hi. I utna te Pathian thu toh a kituah keileh i taisan a ngai a, i duhte Pathian thu toh akituah keileh i nek/dawn louh a ngai a, i deihte Pathian thu toh kituaklou ahihleh neihlouh ngam le angai hi. I it leh ingaihte bang in Pathian toh kal hon su thawmhau sak leh hon gamlasak a itheihleh i taisan ngam le angai hi. A taisan ngamte’n Toupa thupina mu uhi. Peter in, “Ngai in, kou bangkim nusia in k’on zui uh” a chi hi.  Aman a kiang uah, “Chihtaktak in k’on hilh ahi, Kuapeuh Pathian gam ziak a, inn hiam, zi hiam, unaute hiam, nu le pa hiam, tate hiam paisan photphot, Tu damsung mahmah in a sang a tamzaw mulou ding kuamah a omkei, hunhong tunglai ding a tangtawn hinna toh” a chi hi.  (LUKE 18:28-30)

Amah hinna nangawn a huat kei leh Ka nungzui a hithei kei ding (t.26b) Jesu Khrist sang a ei leh ei ikingaih poimoh lai teng Ama nungzui taktak kihi theilou ding hi. Ei kinak ngaihtuah lua in i gim leh tawlna di ahihleh kuankhe peihlou, sem peihlou a om. Ei deihdan a thil hong omlouh chiang bang a tawp di lunggel pah. Mahni kitawisang ut ziak bang a Pathian min thupina ding in kon gen di, hih di bang chisim zezen, Pathian in thupina tang kha mahmah lou. Pathian a dia I kizatna ah I min gen dawk khak hiam, miphawk khak hiam a om louh chiang bang a nuak thei maimah. Kikhop ding chiang bang a puan silh di ahihkeileh puan teen di hoih neih keileh kikhom lou top. Khopi bang a kikhopna mun gamlapipi ahihna ah a lampai mahmah bangle a tawlhuai ban ah sum senna ahih ziak in khenkhat gim utlouh leh seeng ngap louh ziak in kikhom ngei lou uhi. Hiai te khawng bangle Jesu sang a mahni kikoih thupina leh kingaih poimoh zawkna hilou hiam kachi hi. Jesu’n a nungzuite kiangah, ” kuapeuh in Ka nung a hon zuih nopleh amah gimthuak khawksa lou in, a kros pua in hon zui hen” (MATHAI 16:24).

 

2. Kuapeuh a kros pua a hon zuilou ka nungzui ahi theikei ding. (14:27)

Jesu nungzuihna kros puak ding chih in a gen tuh sihna ahi. Khelhna hih dia si, Pathian thumang dia hing ihih lam mangngilh kei ni. Sa deihdan zaw Pathian douna a hih ziak in. Sawltak Paul in, Sa dan leh pumpi thilhihte Kha a na hihlup zel uleh na hing ding uhi, ana chi hi (ROMTE 8:7, 13). Noumau a leilam thildeihna omte that un, kingaihna, nitna, hukna, utna gilou, huaihamna; huaihamna milim biakna ahi.

(KOLOSATE 3:5). Jesu khrist nung izuihna ah a salam thil i thahlouh tampi ana om sek hi. Aguuk agaal a ina hih sekte bangle phoulak hun hong tung ding hi. Thanglou ding a im bangmah a omkei a, theihlouh ding leh langlou ding a selguk bangmah a omsam kei hi (LUKE 8:17). Sawltak Paul in, Khrist toh kilhden in ka omta; himahleh ka hing ahi; keimah pen ka hita kei a, Khrist keimah ah a hing ahizaw; tua sa a ka hin bel ginna a hing ka hi; Pathian Tapa, hon it a ka sik a kipepa pen ginna ah (GALATIATE 2:20). Khrist toh kilhden in i om taktak hia? I om a ahihleh bang gim hong nam nam lai ahia? Bang hong dawk dawk lai ahia?

Kamsang Samuel in Kumpi Saul kiang ah, “Tua belam ham ka bil a honglut leh bawng ham ka zakte bangchidan ahi dia le?” a chi hi. (1 SAMUEL 15:14).

Pathian in Kumpi Saul kianga  a melmate thah vek ding thu a piak lai a Kumpi Agag a hawi a, belam leh bawngtal hoihhoih, a thauthau, belamnoute, a hoih tengteng a thah louh bang in enIeng i thah nuam louh i hing hawi bang bang om a?

Kros lampi ah Jesu nung na zuih ngai hi. Kros lam zaw kho-ul, khitui leh sisan luanna ahi. Nawlkhiin leh ngaihsak a omlouhna, zahlakna, lohsapna leh mualphouna i sih tanpha a paw ding leng hithei i hi. Hiai bang thil i tuah chiang in khasia in kingaise kei ni. I Toupa’n Jerusalem khosung ah mualphoutakna telzaw a kros mipi muh dia pua a Kalvary mual ah kikilh den in sihpih lai ahi chih phawk ni. Na lawm hoih khat le muh ding omlou a, na innkuante muh ding a omlouh hun in le khasia in kingaise ke’n, Toupa khekhap zui kha nahihlam phawk in kipak zaw in. Pukse ding dinmun a om in, gim leh tawl tak a maban suan zou nonlou a i om hun in i gintak leh i kinep pen te apan panpihna leh kithuahpihna i muhlouh hun in leng lunglel in kingaisia kei ni I Toupa khekhap zui kha ihihlam phawk in Toupa ah kipakni. Apoimohleh  Joseph Arimathai bang a khual gam apan zong panpihtu ding Pathian in hon pethei ahi chih mangngilh kei ni. Sawltak Paul in, Gim tampi thuak in Pathian gam i lut ding ahi him ahi, chi in, nungzuite lungsim a hihkip ua, ginna a om gige ding in a hanthawn uhi

(NASEPTE 14:22). Kros pokhalou pi a nungzui thei, gim thuakloupi a nungzui thei i chih zaw khovel toh kilem ana hi a, amah ah thutakna a om kei a, nungzui taklou chihna ahi. Jesu Khrist nungzuihna ah senna ding, gimna ding, thuakna ding a om chiang a kihemkhe gige i hihleh vangam ah i tan ding bangmah omlou ding hi. Sawltak Paul in, ka pumpi ah Jesu chiamtehnate ka pu ngal a (GALATIATE 6:17) achih mahmah thupi kasa hi. Nang leh ke’n i pumpi uah Khrist chiamtehna i pu kha hia kingaihtuahna.

 

3. Khrist nung na zuih ma in a man piak ding om ahi chih ngaihtuah masa in.

Nou lak a kuapeuh in insang lam tum le uchin, amasa in tuin, lam zohna khop sum na neih uleh neih louh thei ding in, aman ding dan kua ahia sut lou ding? Huchilou in zaw, suangphum khin phot a, a lamzoh theihkei leh, a en peuh in, ‘Hiai min gel napi in a zou thei ngalkei chi in, a nuihsan ding uh.’ (14:28-30)

Khopi leh mun khenkhat ah inn kilamkhinlou, kikoih app gawp, a kim a kiang alah inn nalh pipi om kimusek hi. Hiai bang inn kilamkhinlou omte a kim a kiang leh khosung adia dongkholh tampi om ding a gingta kahi. Nikhat lawmte toh amusement park khat a hoh hive ung aw, cable car te a va tuang a nuai lam i et leh inntung khawng leh singkung kimu zihziah hive aw lawmpa le dai dide a nuam salua hi’nteh i chihleh lau lolam ana hi, ka tuanma ka ngai  tung dek nai lou hia chi vung vung mai dan ahi. Hiai a inn lamzohlouh thu leh ka lawmpa apan in sinlai  i lak theih tuh noptuak sa lua, kipan ek mawk a tawp leh zohma tung manlou a buaisia hita.  Sapte thupil in na tawm ma in na tukna mun ding en masa in ana chih bang in Khrist nungzuihna ah eilam pang a commitment leh kipumpiakna omloupi a  pawng kipat khiaklouh a hoih ding chih ahi. A sawt zui peih dile hilou, midangte subuaitu, subahtu leh nawngkai saktu khawng a va pan khak theih banah minuihsan di lel, leh Khrist mualphousaktu di lel a pan khak theih ahi. A bul tung bang hisim hehu, tak sim mahmah a tawp lam a dau deuhdeuh in nektak nawnlouh chih om thei ahi. Huaiziak i kipatma in Toupa nungzuihna a man i piak ding ngaihtuah masa ni.

A nopna tan lel a Khrist nungzuih khak theih a, nekna ding leh dawnna ding tan lel ale A nungzuih khak theih ahi. Mi’n ah hiai mipi hiai minu le nidang a zaw a khamimi toh tua hong bangchi maimah ahia? Nidang a zaw Pathian Thu gengen i sak leh politics lam ah hong kihei mawk a? chi a gentheih ding om chiang in zumna leh mualphouna khat suak a Khrist mel suhemtu suak uhi.

 

4. I neih I lamte sang a Jesu it zawk ding ahi.

Nou lak ah kuapeuh a neih tengteng paisanlou ka nungzui ahi theikei ding hi. (14:33)

Hiai hial zaw hitheilou, leh extreme lodeuh isa mai thei. Himahleh i Toupa Jesu’n a gen tuh a gen taktak ahi. MATHAI 6:19-20 ah Jesu’n hichi’n ana gen hi, “Lei ah, leikha leh tuiek in a neksiatna ah, gutate’n a phenvang ua a gukna uah, noumau a dingin gou kikhol kei un. Himahleh, leikha leh tuiek in a neksiat louhna, gutate’n a phenvang ua a guk louhna uh van ah nou adingin gou kikhol zaw un.”  Jesu nungzui dia kisa Tangval mihausapa kiangah Jesu’n, “na neih tengteng zuakkhia inla, migentheite kiangah pia in, huchiin van gamah gou na nei ding; huan nang hong pai inla hon zui in,” ana chi hi(LUKE 18:22). Gingtu masate’n a  thilneihte uh leh a gou tengteng uh a zuak ua, amau lak a tasamte a pia uhi(NASEPTE 2:45). Gingtu masate hih dan leh I Toupa Jesu deih dan in A nung i zui ngam taktak diam? Khatvei Mihausa CT Studd in Pathian gam nnasep nadi’n a neih leh a gou tengteng phial ana pia a, tawm chik $ 9,588 a zi neihna a zat ding in ana siit hi. A zi ding in Studd kiang ah Jesu’n tangval hausapa kiang a agen bang in a vek in pia in a chi hi. Studd inle sum a siit om lai tengteng Missions nnasepna di’n ana pia hi. Siahkhon Zakkai a hong pianthak in a neih tengteng kimkhat mizawngte kiah pia hi. Dikloutak a ana lakkhakte aleh li(4) a din ding ahih dan a kam mahmah ah a puang khia hi. I neih- i lamte Khrist nung i zuihna a hon sutuailuai a apan uh leh i koih khiak ngam poimoh hi. Mosi in Pharo tapa hihsang in Pathian mite toh hih gentheih a tel zaw. HEBRUTE 11:24-26, Ginna in Mosi in a hong pichin nung in Pharo tanu tapa a kiloh a utkei a; Sawtlou kal a dia khelhna nopna kipahpih sang in Pathian mite toh sukgentheih thuak a tel zawta hi. Khrist a muhsitna uh Aigupta gam goute sang a hauhsakna thupizaw in a ngai a; kipahman piakding a et zel ziak in.

Sawltak Paul in, A hihi hitaleh, thil kei adia punna peuhmah Khrist ziak in manna in ka simta hi. Hitaktak hi, ka Toupa theihna manpha ziak in thil tengteng ka tanta hi. Khrist ka tan theihna ding in thil tengteng ninneng bang phet in ka sim hi  (PHILIPPITE 3:7-8).

Nang bang paisan in Jesu nung na zui a? Paisan malak ah ala tampen leh a nei tampen leh a haupen hihsawm a buai a buai maimah i hi hia? I hihna toh kituakloupi a government scheme teng, a thawn a sum muh theihna ding teng tan sawm vek. Zuau gen bangle poisakna nei lou khop a duhgawl i hihleh Khrist nungzui hihthei lou ding hi.

 

5. Jesu nungzuihlouh man i piak ding tam zaw

“Chi a hoih a, himahleh chi a pen khit in, bang in a hih al nawn ding a? Lei ading in a hoihkei; ekvum ding in leng a hoih sam kei; min a paikhia uhi. Kuapeuh zakna ding a bilnei in za hen” a chi hi. (14:34-35)

Jesu’n, Lei chi na hi uh: himahleh chi peng leh, bang in ahia a hih al nawn ding? Paihkhiak a mihingte chilgawp loungal ding in, bangmah din a phatuam kei hi (MATTHAI 5:13). Jesu’n chi a hoih a achi bang in chi hoihna toh kisai gen ding tampi om hi. Romte hun in manphatak in a zang diak ua, sepaihte loh ding in chi pia uhi. Nisa chihlouh chi sang a manpha zaw omlou achi hial uhi. Hiai chi te ahihleh tuiluang piau lak leh tui taw apan kilakhia ahi a, a khenchiang in mineral dang toh kihelkhom kha hi. Tua bang a akihelkhom khak chiang in a alna dau a bei zou hi. Chi ading in a alna pen a manphatna leh ahihna ahi. A alna om keileh zatna bei suak ding a, paihkhiak a mihingte chilgawp loungal ding in, bangmah di’n a phatuam kei hi. Gingtute khovel chi ihihna ah, khovel segawp dia kisa, mihingte khelhna ziak a muat dia kisate kembit tu ding in Pathian in mohpuakna hon pia ahihlai in khovel toh tokpolh a om gawp in gingtu hihleh hihlouh kithei khenlou tampi ki-om ta hi. Gingtute hiai dan hong om theihna ahihleh- 1) Khovel toh kilawmtakna ziak. Nou angkawm hatte aw, khovel lawm hihna Pathian melma hihna ahi chih na theikei ua hia? Huchi in kuapeuh khovel lawm hih ut Pathian melma in a kibawl nak hi(JAKOB 4:4). 2) Khovel itzawkna ziak. ‍Khovel it kei unla, khovel a thil omte leng it sam kei un. Mi kuapeuh in khovel a it leh Pa itna amah ah a omkei hi(1 JOHAN 2:15). 3) Khovel dan bang a om ziak. Gingtute chituamna muh ding om lou. khovel dan bang in omkei un (ROMTE 12:2a).

Chi a alna mansuah zatna bei kia hilou thil dang a dia lauhuai hi. Huan(garden) hiam lou(field) hiam a chi akipaih chiang in haite’n thuaklou ua si uhi. Huchimah bang in gingtu Jesu nungzui ngamlou tuh midangte adia lauhuai ahi uh. Midangte Jesu khebul api sang in a hawlkhia zaw in pang uhi. Saptuam sung bang a thilhoih lou leh khelhna kipahpihte ahi uh a, a poluttu bang in pang zomah uhi. Hichibang gingtute ziak in Mahatma Gandhi in hiai bang kampau ana nei ngei chi uhi, “I like your Christ, I do not like your Christians. Your Christians are so unlike your Christ.”

Hichibang gingtu Jesu nungzui ngamloute’n nungzuihlouh man a piak ding uh tam zaw hi. Pathian lungtang suna uh ahihman in Pathian thuhilhna, thununna leh gawtna mu uhi. Toupa’n gamlat ziak in lungkimna nei lou uhi a thawmhauna leh hawmna khat nei gige uhi.  Enna, huatna, kinakna, kisaktheihna leh ki-otsakna in a khalam hinkhua uh neksiat in om gawp hi. Jesu nungzuih louhna hinkhua in kingaihsiatna, lungkhamna, leh mualphouna leh zum na a tun hi.

 

Thukhitna: I Toupa’n a nungzui ding in a kimkhat kipiakna nei a, a hun awl kia a Jesu nungzuite a zong kei a, salam metna di kia zong a Jesu nungzuite leng a zong kei a, a man pe ngaplou Jesu nungzuite leng a zong kei hi. Thildang tengteng sang a Jesu it zawte a zong a, a hinkhua a Jesu akhatna luahsakte a zong a, kipumpiakna nei a, a nuam ahaksa, kho-ul, khitui leh sisan luang lele poisalou a zui ngapte a zong hi. Niteng a a kros pua a mahni kimangngilh a zui utte a zong hi. Nang bang dinmun ah na om a? I Toupa Jesu in a nungzui taktak in hon sim diam? Kisa thakni. Laa in, _Kuan hon zui lou zong, Jesu ka zui ding, kik nawn lou ding. Jesu muh dong ka khros ka pua ding_… . Khrist nungzui, chi bang a al a, midangte a dia damna, bitna leh Kalvari a hinna tui hing duhsaktu hiding in Toupa’n hon vualzawl hen.

Pastor M. Thangkhenmung

22nd October, 2020



Leave a Reply

Your email address will not be published.

*
*
*

× Direct Appointment