Jesu’n Baptisna atang ni apat kum thum val vingveng leitung ah Kumpigam thu gen hi. Tua hun tawmchik sung Amah tanchin za kha a, Amah mu a, damna ngah leh Amah gingta mi tampi a om hi. Tua bang ahihlai in a gingta nuamlou leh angaihsak utlou mi tampi a om hi. Pharisai te bang in I Hondampa Jesu pen mi hausa khat sung a hongpiang ding bang sa uh a, a Kumpi hihna, a Lalna leh Thilhih theihna thupi taktak toh leitung ah hongpai ding a, vai honghawm ding bang a sa uhi. Amau lam-et hetlouh bang in hong om zaw a, Jesu a hongpiang in khualbuk a a taklouh ziak un gan anpiakna ah a sial zaw uhi. Ki ngai niam tak a gan-ann piak na a honglum I Hondampa gingta nuam lou in singkhuam ah a kilhden uhi. Huchi ahihlai in Samari Numei hampha hi na lawmlawm e maw, Jesu aw a zak ni apat Amah gingta a tangtawn hinna mu. Amah leh Jesu apan sinlai i gentheih te saulou in I sut ding.
Toupa Laisiangthou I sim ding: Huan, Samari numei khat tui tawiin a hongkuan a, Jesun a kiangah, Dawnding honpia in, a chi a. A nungjuite lah nek ding leiin khua ah a hohta ngal ua. Huchiin, Samari numeiin a kiangah, Nang Juda mi na hi a, kei Samari numei ka hi ngala, bangchidan ahia ka kianga dawn ding non nget? a chi a. Judaten Samari mite bangmahin a zang ngei ngal kei ua.
Huan, Jesun a dawnga, a kiangah, Pathian thilpiak leh, Dawn ding honpia in, na kianga chi pa thei le tehjaw, nang a kianga ngen zota ding china, huchia aman tui hing honpe ta ding hi a, a chi a. Huan, Jesun a dawnga, a kiangah, Kuapeuh hiai tui dawn a dangtak nawn ding uh; Kuapeuh a kianga ka piak ding tui dawn bel, a dangtak ngei kei ding; ken a kiang a tui ka piak ding tuh amah ah tuinak a honghi dinga, khantawn hin phain a kikhohtou ding, a chi a. Huan, numeiin a kiangah, Pu, huai tui honpe ve, ka dangtak nawn louhna ding leh, hiai tantana tui tawi dinga ka hongkuan louhna din, a chi a. Huan, Jesun a kiangah, Na pasal va sam inla, hiaiah hongkik nawn in, a chi a. Huan, numeiin a kiangah, Pasal ka nei sama, a chi a, a dawnga, Jesun a kiangah, Pasal ka nei sama, na chih jaw, na chi dik ve; Pasal nga na neita a, tu a na neihpa na pasal ahi kei him ahi, hiai thu na chi dik ve, a chi a. Numeiin a kiangah, Pu, jawlnei na hi chih ka theita. Kou piputen hiai tangah Pathian a be jel ua; himahleh, nou bel, Mihingin Pathian a biakna mun ding uh Jerusalem khua ah a om, na chi sese ua, a chi a. Huan, Jesun a kiangah, Numei, ka thuhilh gingta in, hiai tangah chitchiat lou leng, Jerusalem khua chitchiat ah lou leng Pa na biak hun uh a tung dekta. Nou na theih louhpi uh na be nak ua; kou jaw ka theih uh ka bia uhi. Hotdamna Judate kianga kipan ahi ngala. Himahleh a hun a tung dekta, tuin leng a tungkhin lel, huai hun chiangin Pathian be taktakten kha leh thutaka Pa be ding uh ahi, Pan huchibang mi a bemi dingin a zong hi. Pathian jaw Kha ahi; a bemiten kha leh thutaka a biak ngeingei ding uh ahi, a chi a. Huan, numeiin a kiangah, Messia, (Kris a chih uh) a hongpai ding chih ka thei, amah a hongpai chiangin bangkim a honhilh ding, a chi a. Huan, Jesun a kiangah, Keimah nang honhoupihpa, huai amah ka hi, a chi a. Huan, numeiin a tuibel a paisana, khua ah a vapaia, mite kiangah, Ka thil hih peuh hon hilh jelpa mi khat a oma, hong unla, en dih uh; Kris a hih theih tuak hiam? a chi a. – (Johan 4:7-10, 13-26, 28-29).
Atung a Laisiangthou I sim a I theih bang in bangziak a Samari Numei in hongpai ding Toupa tuh Jesu mah ahihlam bang chi theih hiam chih I sut nawn ding.
I Hondampa Jesu leh Samari Numei aki hou masak un Samari Numei in nial pah in Nang Juda mi na hi a, kei Samari numei ka hi ngala, bangchidan ahia ka kianga dawn ding non nget? chi in dawtna bawl ngal hi. Himahleh Jesu’ bangtan hiam apau zoh nung in ahoupih pa tuh mi maimai leh mi vantang ahihlouh dan thei in Pu (Heutupa) chi in asam zaw ta hi. Jesu’n hiai thu, Kuapeuh hiai tui dawn a dangtak nawn ding uh; Kuapeuh a kianga ka piak ding tui dawn bel, a dangtak ngei kei ding; ken a kiang a tui ka piak ding tuh amah ah tuinak a honghi dinga, khantawn hin phain a kikhohtou ding chih a’ gen zoh tan in Amah tuh mi kua hiam hiding in agingta nawn a, thilhihtheihna nei leh mi vantang ahihlouh dan a chian semsem hi. Huchi’n Jesu’n Samari Numei hihna tak hongen hi, ‘Pasal nga na neita a, tu a na neihpa na pasal ahi kei him ahi’ Hiai thu hon gentakin lamdang sakna in adim a, hiai bang a thil guuk thei kua mah om lou ahi chi in Jawlnei Jesu hi ding a gingta hi. Huchi bang a omlai in a lungbuaina hiai a hon dong nawn hi, Hiai tang ah hia Pathian biak ding ahihkeileh Jerusalem a Pathian biak ding chih. Jesu’n ‘hiai tangah chitchiat lou leng, Jerusalem khua chitchiat ah lou leng Pa na biak hun uh a tung dekta’ …. ‘Pathian be taktakten kha leh thutaka Pa be ding uh ahi, Pan huchibang mi a bemi dingin a zong hi. Pathian jaw Kha ahi; a bemiten kha leh thutaka a biak ngeingei ding uh ahi’. Hiai a gen zawh in Samari Numei in Jesu ahihlam a chian mahmah ta hi. Hiai ah bangziak a theichian hiam I chih leh Samari Numei a ki ngaihniam na, ama hihna mah sel lou in ki pom hi. A hih na bangbang toh Jesu aw ngaikhia a, a buaina te Jesu’ kiang hilh hi. Tua ziakin Jesu mah in a buaina pen genchiansak in, Pathian biak dingdan tak leng hilh ngal hi. Hiai ah sinlai I muh nawn ahihleh, eite’n I khelhna te kisik a Pathian I belh chiang in, I buaina te Amah kiang ki tung a huai te apat suahtakna Toupa a om ahih dan I theithei hi. Pathian biak I ki chih chiang inleng amin maimai a bia hilou a lungtang tawn apan kisikna toh, Kha leh thutaka Pathian I biak ding uh ahihdan I mu thei hi, huchi bang mi tuh Pathian in a zong ahih ziakin. Huan, Jesun Samari Numei kiangah, Keimah nang honhoupihpa, huai amah ka hi, a chi hi. Hiai hun in Samari Numei tuh kipahna in adim a Jesu mah ahi chih a chian mahmah mai hi. Huchi’n hiai thuhoih puangzak ding in a khua ua pai in va hilh hi. Hiai muntak a i theih nawn ding a hoih ahihleh, eite’ leng I khelhnate apan kisik a I Hondampa dia Jesu I sang chiang in, I Hotdamna thu, I kipahnate leh Pathian hoihna, a thupina I dongte midang kiang a I puang zak ding ahi. Tua te tungtawn in midangte’n Toupa hoihna mu in, midangte Khalam ah I thathousak ding ua, Jesu kiang I tung thei uhi.
Hun nanung ah I om ta uh a, thudik hia thudik lou chihte theihhaksa sakna leh thillamdang taktak te a hongtung ta hi. Huchi bang dinmun a I omlai un lamdang sakna mai a hunsa a, Pathian lam I etlouh ding uh alauh huai mahmah hi. Ahihkeileh tua bang thu-le-la te om na lak ah, I hunte uh bang chi in I zang bei uh a? Samari Numei bang a Pathian aw ngaihkhiatna ding hun I pia man hia? Thutak ahi na hia, Laisiangthou thu toh akituak na hia chi a Pathian thu te I suut a huai te a iki ngak ding ahi.
Jesu’n “Na kiang ua thu gen ding tampi ka nei laia, himahleh tuin jaw na chin tadih kei ding uh. Himahleh, amah, Thutak Kha a hongtun chiangin, thutak tengteng ah nou a honpi ding; amah phuahtawmin thu a gen dek ngal keia; a jak peuhmah a gen zo ding, thil hongtung dingte leng nou a hontheisak ding.” – (Johan 16:12-13).
Samari Numei bang a eite’ leng khelhna tampi nei ihi ua Pathian mai a selguk zoh ding khatleng I nei kei hi. I khelhna te kisik a Toupa I belh chiang in suahtak theihna Jesu ah I nei hi. Hiai Hotdamna manpha I tante uh hamphat huai mahmah in kipahhuai lotel hi. I khelhna te Pathian kiang tung a, tua bang te hih nawn lou ding in thathak la ni. Jesu’ a hinna thak nei thei gige I hih dan uh ki phok thak ni. I khelhna te thupha tawi in Pathian kiang tung ni, Amah kiang hatna, dohzohna, khamuanna leh lungmuanna te ngen ni.
“Ngen un, piak in na om ding uhi; zong un, na mu ding uh; kiu un, a hon honsak ding uhi; Kuapeuh a ngen in a mu a; kuapeuh a zong in a mu a; kuapeuh a kiu honsak in a om ding hi.
Toupa’n i thugelhte theisiam thei a, hiai te tungtawn a Khalam tuipai sem thei ding in hon ompih in hon Khamuan chiat hen!
-Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
July 22, 2020. | Weekly-Inspiration – 29