JESU, HUNLUI KHELHNATE NUNGNGATSAN THEIHNA

“…Thil khat ka hih; nunglama omte mangngilh in malama ompen ka delh hi; Khrist Jesu a Pathian sapna sang kipahman mu ding in phak chiamna ka delh hi.” – Philippite 3:13b-14.

Sawltak Paul (Saul kichi masa) in I tangtel a agen tuh a piangthak mah a ana gamtat khakna khelhnate ahi hi. Theihlouh ziak in Pathian deihlouh dan in vai ana hawm a, gingtu tampi tak ana gawt hi. Amah makaihna in thugen Stephen khua a kipan a delhkhia ua, suang in a denglum uhi. “…a theihpihte’n tangval khat a min Saul khebul ah a puante uh a koihkhawm chiat uhi.”  – Nasepte 7:58.

Hiai bang a agamtat khak nate tuh Khrist Jesu a Pathian sapna a sang mateng a ngaihtuahna a om den hi ding hi.  “Saul in Toupa nungzuite vau leh thah a tupthu a gen lailai man in siampu lianpen kiang ah a vahoh hi. Damaska khua a kikhopnain tengteng a mite kiang a piak ding in lai a ngen a, hiai Lampi zuimi kuapeuh a muh leh, numei leh pasal leng, hen a Jerusalem a honpi theihna ding in.” – Nasepte 9:1-2

Huan ken, Toupa kikhopnain teng a nang gingta peuhmah ka hentasak a, ka vuak zel dan a thei uhi. Huan na thu theihpihpa Stephen sisan a suahlai un kei leng a kiang uah ka ding a, a sihding lem ka nasa a, a hihlumte puante leng ka nakem hi, ka chi hi” – Nasepte 9:1-2.

Hichi bang khelhna hih in Pathian deihlouh dan in ana gamtang kha mah leh Paul in Pathian zahngaihna a muh apan in hinkhua kikhek leh Jesu, Pathian Tapa a hih danthu tangkoupih pa leh gingtu muanhuai ahong hizaw ta hi. “Tuma lam in Pathian gensepa leh sawipa leh hihsepa na hita mah leng; gingtaloupi leh theilou a hih ka hih ziak in ahi zahngaihna ka na muh tak. Huan i Toupa hehpihna ginna leh Khrist Jesu a itna in nakpitak in a dimletta hi. Khrist Jesu khialte hondam ding in khovel ah a hongpai chih a taksanhuai in a laktuak mahmah hi. A lak ua khialpen ka hi; Himahleh hiaiziakin ahi zahngaihna ka na muh: Jesu Khrist in a dohzohna kim a khialpen keimah a a latsak theihna ding ahi, tuban siah tangtawn hinna muhna ding a Amah hon gingta dingte adia etsakna hi ding in.” – I Timothi 1:13 – 16

Paul hinkhua lui bang a gamtat ding tuh thil haksa pi ahi. Eite’n leng Paul bang in I ngaihtuahnate uah gingtute gawtlou I ki chi maithei uh a, Toupa deihdan a hinkhua zang I ki chi pahpah kha thei hi. Himahleh I hinsung un khelhna leh gitlouhna tuamtuam I na hih khak uh a om hi, hiai te’n ei hinna vuak hon sukha hilou in I mihingpih te’ hinna leng a sukha hi. Tualthahna, guktakna, kisuamna,  thagum a mi sualna (rape), nekgukna, khamtheih chihte leh thildangdangte in I na ki bual uhi. Hiai te tuh Pathian deihlouh thil ngen ahihziakin Amah toh hong omkhawm sak theilou te ahi. I thil hoihlou hih te uh muhtheih in ki langkhe thei pah kei  lehleng a hong ki latkhiat hun a om teitei ding hi. Hiai te’n I hinkhua ah nna a hon sem ding a, eimah hinna hon buaisak ding a, I innsung, I pawlpi leh I khotang ah buai na hon tung lai ding hi. Kipahna ei ah om nawn lou in, tua thil hoihlou I hih te mah ngaihtuahna a nei in, lunggimna leh haksatna toh hinkhua I zang toutou ding hi. Hiai thil hoihlou te apat lunghei a, Pathian sapna aw te za a Jesu Khris hotdamna I sang tuh apoimoh pen ahi. Sawltak Paul bang a hinkhua kikhek tuh I niteng hunzatna ua I poimoh pen uh ahi.

Pathian in ngaihdam zohlouh neilou ahihziakin, I khelhnate uh lian mahleh Pathian tapa Jesu ah ngaihdam in I om thei hi. Khenkhat te’n Pathian ngaihdamna a sang pen nuam sa mah lenleng, mahni khelhnate ki ngaidam thei hetlou leng I om uhi. Hunlui a I na gamtat khak khelhnate mah buaipih in I Toupa hon itna leh a ngaihdamna tang kim zoulou in buaitak in I om  sek uhi. Thil I na hih khelh omsate hih dik thak leh bawl hoih thei nawn lou I hihziakin, a ki khek thei a I hih dik theih tuh I lungsim I ngaihtuah nate ahi zaw hi. Jesu Khris hotdamna I sang chiang in, Amah tungtawn in tua I ngaihtuahna te I khek thei a, Amah ading in i hing thei ding hi.

Khenkhatte I buaina nawn uh ahihleh tua hotdamna I sang zoh chiang ua I hinkhua mandan uh ahi hi. Tua hotdamna I sang vuak uh hun I sa uh a, niteng a Jesu nungzui I hih dan uh I phok nawn kei uhi. Hotdamna sang sa mitamtakte phuk na tuh a nungzuihna a I mohpuakna uh I zohlouh ziak uh ahi sek hi. Hun a sawt deuhdeuh chiang in Amah ading a I hun piak dan uh tawm deuhdeuh in, I Khalam ading  a phatuam lou hong subuai thei ding thilte I awlmoh zaw kha sek uhi. I ut dandan ua om in, I theihlouh kal un I hinkhua lui lampi te mah tawn in a bul ah I kik sek zel uhi. Gingtu taktak leh Jesu nungzui taktak te om ding dan zaw hiai bang ahi kei hi. Jesu a  hotdamna I sang vuak a hun kei a, niteng a (leitung a i sihma tan/Jesu hongpai matan) Amah a I ki bulphuh a ngai gige hi. Tua ahihziakin, thathak la in Toupa ading in I hunzat dante uh ki vel thak in, ei ah ki khek a ngai omte kikhek in Amah ton in I hunte zang ni. Nunglam a om I na hih khelh omsate nungngatsan a Jesu a ngaihdam a I om mah bang in i mailam a om Toupa hoihna I muh dingte delh in I hunte uh, I nasepte uh, I hih te uh, I paukam te uleh I thugente uh Amah ading hong hi henla, Amah Khrist Jesu a Pathian sapna sang kipahman mu ding in phak chiamna hangsan tak in delh chiat ni. Amen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
26th August, 2020 | Weekly-Inspiration – 34.



Leave a Reply

Your email address will not be published.

*
*
*

× Direct Appointment