IITNA PATHIAN IN MIHINGTE GIMTHUAK A PHAL

Eden’ Khelhna ziak a Pathian’ hamsiat leh taangtawn Meidiil a Kah-leh-Hagawina mun a mohpaihsa mihingte ihi uhi. I khelhna un Pathian toh hon khen kia hilou in, gentheihna leh gimthuakna simsenlouh leeng hon tun hi.
I Pathian uh iitna Pathian ahi chih 1 Johan 4:8 ah i mu hi. Ama’n iittak (hawmthohtak) in A hon siam a, A iitna sung a bittak a, Amah toh kizopna hoihtak nei dia A hon siam ihi uhi. Khelhna ziak in Amah kibukmangsan mah le’ng le, A hon iitna bei ana hizenzen lou a, ei peen A iitna akipat a ei deihteelna (freewill) zang a khelhna teelzawte ana kihi lim hi.
I Pathian Siangthou peen a kikhek ngeilou Pathian ahi hi (Hebrute 13:8). Eden a khelhna a luut ma a, Ahon iitdaan leh khelhna a luut nung a, hon iitdaan leh tuni a hon iitdaan kibang den hi. Khelhna ahong luutnung in bel, iiplah toh hon thuah a hiven. Ahi, hon iiplah leh leng, a zahngaihna ziak in, poimoh asak tan kaan hon thuak saklou hizomah lai hi. Toupa Pathian, iitna Pathian ahihziak in, Amah mah omtheilou a, hon kitheihmohbawl zoulou in, iki gawm nawn theih na diing un, Amah mah in pan hong la hi. A iitna mah pansan in Amah toh kilem diing in Jesu Khris tungtawn in lem Ahong geel sak ta hi. Eilam a i sep leh suan diing ana omlouh daan chu! (Ephesate 2:8 & 9). En Amah pan laakna ziak a, pan lathei lel kihi eive. Pan i laaktheihna diing a leeng, vanzat bukim toh hon thopsa kihi zomah lai hi (Ephesate 1:3).
Huchi in, A iitna in ‘KISIIKNA’ a hon tun a, A hehpihna ziakin A Hotdamna huangsung ah hon piisuak ngal hi. Hotdam ihih nungin leeng huai ‘kisiikna’ peen mah ‘niteng kisiikna’ in hong kikhek a, huai tungtawn a ‘ngaihdamna’ i tante ziak mahin ei-lam ah, hihtheihtawp suah utna leh suahtheihna hon peta hi. Ama’ hon iitna peen geenzoh vuallouh leh i phawkkhak ngeilouh thil lamdang, lungkimna, kipahna leh khamuanna hon tuntu ahih manin, i thuk uut sam ta hi. “I thuk theih daan sunsun lah hi, a tawpkhawk leh thupi peen lah hi” chi in, I hinkhua a Kumpi diing in ina saang ta hi. “Toupa na deihna bang in hon zang in” chi in Amah’ Adi’n iki ‘pumpiak’ sam ta hi.
Apoi mahmah khat chu, mi tamzaw te’n Jesu Khris peen i Hondampa diing a saan ana kithalawp mahmah hinapi in, Kumpi diing a pom taktak utlou ana kihi’n ka thei hi. Kumpi diing a Jesu Khris i saan nung a chu, Amah thuthu a omtaak diing chihna hita a, lampi zuih diing leh zuih diingdaan khat chauh omta chihna hita mai hi. Huai ahih leh, ei kingaihsak lou a, niteng a i Khros ki puak a, A’ nung zuih, ahi (Luka:9:23). Huai lampi i zuih diing peen, i sa-pum leh lungsim in a phawk, utna (desire) chituamtuamte’ lehlam ngen a om ahihziak in, zuih haksa kisa mahmah hi. Huaidaan a ei ki ngaihsaklouh peen gimhuai leh haksa kisa mahmah sek hi. Ahia lah, Pathian’ Thuman ziak a gimthuakna chih khong A manphat daan chu, i sia-leh-pha theihna (conscience) lah hon kam diing omlou a, Khalam’ Tha hon guantu lah hong hi, i Toupa Jesu dungsuun diing a khanhoih a hon khangsak seemseem zomah lai. Manpha lua hi. Pathian’ thumang kisiik chih himhim omlou hiveh.
Awle, Khelhna ziakin Sa, Lungsim leh Kha ah hihsiat in i om uhi. Jesu Khris’ Hotdamna i saan nungin leeng, hiaite peen thakhatin hong kikhek guih gige kei hi. Mi tamzawte i hih leh, Kikhek-utna leh tupguhna lungsim, leh Amah a muanna ngakawma a kalsuan pan diing in A Khasiangthou’ thilhihtheihna toh thop in i hong omta uhi. Huai akipat in I deihteelna leh Khasiangthou’ pilna leh Pathian’ haatna zang in, thil hoih(Pathian) teelzaw gige a, Ama’ khekhaap zui a, Amah suun deuhdeuh diing in sap in i hong omta uhi.
Iitna a hon siam, iitna a hon zong muh, iitna pe diing leh saang diing a hon siam ihih ziakin, iitna in hon hiip mahmah hi. Hiai iitna tungtawn kia a Amah lam zuan thei diing ihihlam uh Toupa’n thei mahmah hi. Huaiziakin, ei mihingte’n i theihsiam leh poimoh mahmah uh iitna pansan in A’ Tapa Jesu Khris a hon sawl ta hi. Mihingte’n i poimohte hon Siamtu’ Pa Pathian in naak theih lua! Huaiziak in Amah muang kisin ni hang. Hiai kaan a lungmuan-huai leh tawldam-huai mihing hinkhua ah om mahmah lou ahihziak in.
Khelhna ziaka gimthuakna hong om ahi chih i theih kawmkawm a, theih dia poimoh khat ahih leh, gim-gentheihna i thuak peen uh, Pathian thangpaihna leh gawtna ana hi zawlou a, sawina leh sinsakna leh thil thupi leh lamdang Ahon muhsak uut ziak ana hizo sek hi. MIHINGTE HI’N, A THILSIAMTE HITALEH A THANGPAIHNA THUAK ZOU DIING KUAMAH KI OMLOU AHI CHIH THEI NI. I pianthaknung in, khial nawn hetlou a omthei diing bang hita zenzen le’ng le, Job bang a mi diktat, Pathian in Ama’ thupina langsaktu hi diing a Setan’ gawt diing a leng hon pekhe thei hilai hi, chih i theih poimoh hi (Job 1:1-21). 
1 Peter 3:14 na ah, “Himahleh, diktatna ziak a na thuakta bang na hih uh leh, na hampha diing uhi. A kihtaakhuaina uh kihta kei un”, chih i mu hi. Jesu Khris’ nung zui a, diktatna ngiim kawm a pai sawm ihih leh chu, mi khenkhat tungtawn a Setan’ poi i khoihkhaakna hong kilang di inchin, huaite tungtawn a gimthuakna hong om pah diing chihna ahi. Job ginna thupi daan chu maw….? Pathian muang inchin, ngoh leng ngoh hetlou zomah lai eitelvoi (Job 1: 21-22).
A lamdang leh thupi mahmah chu, hotdamsa i hihnung a I gimthuakna te a thawn khat le omlou hitel hi. Thupi lua, Toupa ka kipaak! Halleluiah! Amen! A hehpihna ziak a, I lei gimthuaknate athawn a hon koihsak lou a, Van ah, i Lal-lukhu diing a hon bawlsak himai zeen hia! Kipahhuai dan lawmlawm! ( Romte 8:18; James 1:12) 
Huai kia hilou in, Isai 62:3 a i muh daan in, “Toupa khut a kilawmna lal-lukhu leh i Pathian khut a thupina lukhu na hi ding,” chih hi zomah lai hi. Lamdang eive, i Toupa lemgeel siamdaan.
Gimthuakna i chih chiangin niteng hinkhua a haksatna i tuahte ahimai hi. Hiai gimthuakna pen zau deuh in chi thum (3) in khen leng:
1) Mimal’ deihteelna ziak a piangkhia gimthuakna. (The Consequential suffering due to our willful choices)
2)Teel/hih tei tei di sa hang a, i utlouh pipi hiam tuplouh a i teel/hih khaakte ziak a gimthuakna. (The consequential suffering due to our stupidity or mistakes)
3) Mimal deihtelna in a thuneihkhum theihlouh gimthuakna. (The consequential suffering due to situations we have no control over)
*1) Mimal deihteelna ziak a piangkhia gimthuakna* ichih chiang in ei mimal deihteelna zang a, i uut leh uutlouh, poimoh i sak leh saklouh daan a thil i hihte ahi.
Etsakna: Mi khat in ama deihtelna zang in mi sum va gu hen la, mat in omta leh, atung a thu-tanna dungzui a gimthuakna a tuah peen ama deihteelna’ a zatkhelh ziak a, a thuak chihna ahi. A gimthuakna ziak in Pathian in a iit kei i chi thei diam? Chi theilou e. Johan 3:16 leh Johan 15:13 ah Pathian in hon itdaan i mu hi. Pathian in a iitna-tawplou (Jeremia 31:3) a iit hinazenpi in, mipa’n a deihteelna a zatkhelh ziak a thuak hizo hi.
I theih dia poimoh mahmah khat ahih leh, deihtelna zat diklouh ziak a, i gimthuakna peen chu, Pathian adia i thuak hilou chih chian mahmah hi chih, 1 Peter 4:15 ah i mu hi.
“Himahleh, na lak uah kuamah in tualthatmi a hih ziak in hiam, midangte thil hih gensakmi a hih ziak in hiam thuak kei hen.”
Ahia lah, i Pathian Hing leh Siangthou in Hehpihna leh Zahngaihna hau lua ahihman in, ei mimal deihteelna ziaka khial a, i khelhna ziak a gimthuakna i tuah chiang a leeng, hon hihdam a, hon hunkhe zel lai hi. Kisik a Amah lam i zot nak leh zaw, hon na nawlkhin ngei mahmah lou hi. Itna lamdang! Halleluiah! (Psalm 86:5)
*2) Teel/hih teitei diing sa hang a, i uutlouh pipi hiam tuplouh a i teel/hih khak thilte ziak a gimthuakna* ichih chiang in, ngaihtuah sau/man khollou, i theihlouh ziak hiam, tuplouh a mi hon sawl-luih ziak khong a, i va hihkhak phutte ahi uhi. I theih diing ua poimoh khat chu, mi phuutluih ziak a thilhoihlou va hih ngai hetlou, chih ahi. Utlouh bilbel theih ahi chih gen sawnsawn lai ni (Tita 2:12).
Etsakna: Khopi khawng a omte adia bang, ‘Prasad’ khong hon piak chiang ua, laak di lah nuamsa lou, laaklouh di lah nial ngamlou. Phuutluih ziak a ki awi khollou pipi a neek khak chih bang omthei maw? I huchih leh, ginglou mite’n “Khristiante a huchihim diing” daan a hon koih diing uhi. Huai kia hilou in, i neeklai bang gingtu dang in hon na mukha/ ana theikha le uh, etsakna hoihlou kisuak kha thei lai hi. Huailou in leeng, asuanlam ua bang hon zang kha thei uhi (1 Korinthte 10:31-32). Huchi ahih leh, anuam hetlou mihing a kipat leh Pathian in A phal, i thuak diing omzek diing chihna ahi. I gen uut chu, Toupa iitna, Jesu Khris Sisan ziak in, i tung ah luang den mah leh, ei hai man a thuak khaak theih lua ahi chih ahi. Pathian iitna in ei deihteelna (freewill) peen sawl-lui hetlou a, hileh leeng, Amah teelzaw diing in huai ei deihteelna peen hanthawn hizaw hi.
Khelhman om gige ahi chih theih poimoh hi.
Galatiate 6:7
Khem in om kei un; Pathian zaw zekheem a mawkbawl vual ahi kei; mi’n a tuh peuh uh huaimah a aat nawn ngei diing ahih ziak in.
*3) Mimal deihteelna in a thuneihkhum(control) theihlouh gimthuaknate* ahih leh ei teel leh teel louh, uut leh uutlouh in thu pawlou a, i tuahte ahi uh hi.
Etsakna: Natnate, sihnate, Ei mohna panghetlou a midangte bawlsiatna i tuah simmohna, gensiatna leh dikloutak a ngohnate khong ahi uhi.
Natna bang ei mimal deihtelna zattheih hileh kiteel hetlou diing hia maw? Innsungmi khat tung a natna ahong tun leh bang chu innkuan a ki thuak mai. A damlou te’n le thuak, innkuanpih dangte’n le thuak. Ahia lah, natnate tungtawng a, i gimthuak ziak ua Pathian hon iitna pen a bei hituanlou hi. I gimthuaknate ziak a i ngaihtuahna hong buai inchin, Ama’n hon iitlou khong kisa kha chih thu ahi. Hiai daan a, ei mimal deihtelna i zatkhum theihlouh gimthuaknate chu Pathian phal ichi thei hi. Huai lou dang khat ahih leh, mi’n ei mohna pang hetlou a hon bawlsiatnate uh khawng leeng ahi hi. Huchia thil i tuah sekte un gimthuakna hon tun sek mahleh, Pathian’ peen iitna Pathian ahihna ana kikhek tuan lou hi.
Pathian in A phal ahih leh, omzenei chihna ahi. Amah ngohlou a, hehna leh thangpaihna a ki-dimsak zawlou in, “Toupa, Na hon sinsak uut leh muhsak uutte, sin-thei leh mu-thei diing in hon panpih in” chizaw thei le’ng ki navaak in ki tawldam tuan mahmah diing hi. Huchi’n chi le’ng, Pathian thupina i muh diing a omte leng kimu kha thei ta diing hi.
Dikloutaka bawlsiatna hiam, gensiatna i tuah chiang a, i theih dia poimoh ahih leh, amau deihteelna zang a gamtaang ahi uh, chih ahi. En amau deihteelna’ zatdaan ah, i va khonung gen theih luat omlou hi. Pathian’ tate ihihna ah, ei deihteelna zang a ihihtheih omsun ahih leh, i dawn daan (response) ahi. I melmate iit diing kia hilou a, thuumsak diing a hon sawlpa’ nung zui ihih leh chu, i thukna/dawnna diing zaw i theihsa hi maw? (Matthai 5:38-39 & 44)
Jesu nungzuih i chih, hiai ziak khong a leng haksapi suak hi. I sa-leh-lungsim’ uutna tung a Pathian’ Thu vualzohsak peen Pathian’ Thumanna hi a, a minthang ‘KONGKAWCHIIK’ leeng ana hi hi. Bangteng hileh, ei deihteelna zang a, Amah tel gige ding a panpihtu muanhuai leh haat Pathian in hon khamuanna Laisiangthou mun tampi ah i mu hi (Psalm 46:1; Psalm 54:4; Psalm 145:18; Hebrews 13:6; Isai 40:31)
Huaiziakin, gimthuak diing Pathian in phal ahih leh chu, omzenei ahi chihna ahihdaan enchian zek lai le’ng ka uut hi:
1) Gimthuakna i tuah chiang in, ze-etna chihna hi a, I muh diing leh sin diing khenkhat om chihna himai hi (Jakob 1:2-4). Huai hun a, i muh leh sin diing a Toupa’n A deihte mulou a, phattuampihna leeng neilou a, phunna leh khasiatna kia a ina dim khaak leh poi law diing hi. I huchih leh, gimthuakna peen omzia a neihna beisak di hang a, athawn a thuak ihih khaak diing lauh huai hi. Kei hon lungmuan leh hanthawn sek mahmah ahih leh, Hichi daan a i gimthuaknate’n gah manphatak leitung ah suang di inchin, Van ah leng i gou kikholkhawm suak zomah lai hi, chih ahi (Matthai 6:20).
2) Khalam a kuhkalna diing a kisawizawina (exercise) ahi a, hiai kuhkalna in theihtelna tun a, theihtelna in lametna tun hi (1 Corinthians 9:25; Romte:5:3-4; Jakob 1:3).
Amah i bat deuh zel na diing leh Amah kiang i tun theihna ding a gimthuak ki hi (1 John 2:6; Hebrute 12:2). Huchilou a, nopsa kawm a, Amah suun deuhdeuh diing a kikhekna omthei hileh, Toupa’n gimthuaknate pal diing a hon phal hetlou diing hi .
3) Jesu Khris’ hotdamna i saan leh gimthuakna leeng i saan tel himai hi. A nungzui i hihlam a kilat na’ng leh Ahihna koppihtute i hihlam akilat na diing ahi. Tanvou manpha ahi hi.
(Matthai 10:38; Isai 53:3; Philippite 1:29; 1Peter 2:21)
4) A iitna leh ginomna a kilat na diing ahi (Romte 8:35). Pathian in A iitte sawi nak chih ithei hi (Paunaakte 3:12, Hebrute 12:6). Sawi a om ihih leh, Pathian in hon iitluatziaka hon sawi chihna ahi. Houchik in gen leng, mihing khat ihihna ah, hon tai diing neilou himai zen le’ng, khasiathuai lawlou di? Ki kingaise law di’n ka gingta hi.
5) Mi i theihsiamna diing a poimoh leeng hi. Mi i theihsiam leh, hanthawntu leh hehnemtu in pangkaitak in Pathian’ Gam adiing in ki pangkha thei hi (Romte 12:15 ; Hebrute 10:24-25; Galatiate 6:2). Theihsiamna i hauh leh, mi toh kingaihnat tuah baihsam hiven maw? Theihsiamna in iitna piangsak sek a, iitna in hehpihna leh zahngaihna pawkhe zel a, I Toupa Jesu Khris in Thu hon piak, i innvengte ei iki iittuk a iit diing, chih taangtungsak ki suak zel hi (Matthai 22:39). Hiai i taangtunsak chiang in, i Toupa Pathian peen, i lungtang tengteng, i kha tengteng leh i lungsim tengteng a iit ihi chih aki latna leng ana himai mah hi (Matthai 22:37).
I leitung khualzin sung in ei mimal deihteelna zang tou charchar di ihih ziakin, hiai i deihteelna peen, thilhihtheihna (power) Toupa’n Amah teelna diing a hon piak ahihman in pilvang thei peen in zang le’ng, a manphatdaan dungzui a kizang kha diing hi.
Hiai deihtelna (freewill) ahihleh, mihing i hihna tektek, A Hu(breath) hon hatkhum a kipat a Pathian in hon thop ahi. Thil hihtheihna haattak (powerful) ahihman in Setan khemna natawm akipat a kihepkhiaktheihna, ‘IE! ‘, ‘NO!’ chihtheihna diing leh, Amah teel theihna dia hon piak ahi hi. Mangngilh kei ni hiai thutak!
I zatkhelh leh leeng, A hon iitna peen a ngeingei hi thouthou hi. Ei deihteelna i zat diklouh hiam, zatbuaiziak hiam a Amah hihna ana kikhek mahmah lou ahi chih chiamteh ni. Amah ngoh bang baihlam sek na inchin, hoihtak a ngaihtuah detdet peih hile’ng chu, i gimthuaknate atamzaw ei leh ei i ki-got ana hi. Zahngaihna leh zaidohna a dim Pathian ahih ziakin, ei leh ei i ki-got gimthuakna hileh leng atamzaw honna hepkhiaksak hiam, hon hunkhe sek hiam hi zomah hi. I gensa mah bang in, Akhenchiang in sinlai i neihtheihna diing in i thuak zek phal sek hizaw hi.
Thil tengteng siamthak a aom ma chu, gimthuakna chi tuamtuam thuak zelzel ding ihih man in, ki siingsa thak in pan la thak ni maw? Toupa’n Ama’ Galvan (Ephesate 6:13-18) hon piak peen leng zang changkaang sam le’ng chih huai hi; ap leh tui-ek gawp khong a ana om louh na diing in. Amah nungzuihna a mite muh diing a gah suangthei (Galatiate 5:22-23) a om diing a hon deih himhim leeng manpha law khin hilou maw? Ama’ sianthouna leh hoihna ei mikhial leh niinte tungtawn a langsak uut hitel eivoi! Khovel mial taanvak ding a mohpuakna thupitak leh saangtak piak a om kihi zomah lai hi (Matthai 5:14). 
Gingloumite vangtah daan chu maw, a gimthuakna un khovel hinkhua kheel a omzia nei ahihlam theilou ua, manpha ahihlam leng theilou diing uhi. Mihing hihna ah, haksatna atuahte uh tungtawn in sin khat-le-nih nei zeel mah le uh, asinsaktu a omlam theilou ua, iitluat ziak a sinsak a om ahihlam uh leeng kithei lou lai diing uhi. Hamsia uh a, hehpihhuai petmah uhi. Alehlam ah, ei hotdamsate I hamphat dan uh chu maw, gimthuaknate ei a dia, a thawn om lou himhim chih gen thakthak lai ni. I lampai dikna diing a sinsakna ahih kei leh Pathian’ Thupina i muhna diing ana hi gige hi. A hon iit ziak mah in i gimthuakna pen athawn in koih lou hi. Mihingte siatna leh khelhna a dim ihi ua, i tung ua tung gimthuakna khempeuh Khelhna ziak himah leh, Toupa’n a zahngaihna ziak in i khelh gahte natawm vualzawlna hon suahsak zel hi. Huaiziak a, i theih dia poimoh ahihleh, gimthuakna pen ei mimal ah hi’n, ei tungtawn ah hitaleh, Pathian’ Thu leh Tup tangtunna diing hizaw hi. Gimthuakna pen, A Hehpihna ziak in, Amah dungsuun i suahtheihna diing in vanzat manphatak in hon bawl sak sek hi.
Pathian’ tate a dia gimthuakna poimoh ahi chih pom in, Amah lam a hon sapna, hon kaih-naina leh A thupina i muhna ding hi gige ahi chih i lungtang ah vom ni. Gimthuakna tengteng theihsiam zoh seng di hikei mahleh, Gimthuaknate tung a Thuneipa muang ni. A mai ma ah thunuailuut in kipekhe le’ng, Ama’n ei phattuamna diing leh Ama’ Min thupina diing in soiseelna bei’ iitna leh thil hihtheihna bukim toh Nna sem gige ahihlam kimu semsem diing hi.
Gimthuaknate tuak a, haksa i sak mahmah hun chiang a leeng, Amah muang ngam diing in, Toupa Pathian in, i ginna uh hon hihhaatsak chiat hen aw, Jesu Khrist min in. Amen.
– Chingngaihlian Tunglut
November 08, 2019/ Article No. 12
(Laigelh toh kisai kupbeh uam a om leh, +919892316430 ah thuzaak theih diing hi.)


Leave a Reply

Your email address will not be published.

*
*
*

× Direct Appointment