ITNA A HONG DAI DING HI

0

Khovel thuthang tuamtuam te ngaihven a tuate zui a i theih tam deuhdeuh chiang in, buaina leh siatna munchih ah a om a, i zak ngeilouh uleh i theih ngeilouh uh thil lamdang pipi leng aom ta hi. Sawtlak Paul mahmah inle ana gen mah bang in ni nanungte a thil om diing dan ana genkholh te tu hun in atung lellel ahi chileng i khial di’n i gingta hi. Koi mun peuh a mihingte itna a aki taksap ziakin buai theih na chi tuamtuam niteng leh hunteng  a i zak ding uh a om zou den hi.

“Huan hiai thei in, ni nanung ah hun haksa pipi a hongom ding hi, Mi amau ki-itte, dangka deihtate, kiuangsakte, kisatheite, Pathian gensete, nu leh pa thu mangloute, kipahna dan theiloute, siangthouloute, itna pianpih neiloute, buaina bawlte, hekte, kidektheiloute, mi huhamte, hoih deih hetloute….” – 2 Timothi 3:1-3.

Hiai a i Laisiangthou tangtel 2 Timothi bung 3 na sung ah i dinmun uh hon gen kim vek mahmah hi. Mal khatkhat a sim a tuate ngaihtuahna pia chiat hileng, adiklou leh a om lou, a tunglou khat mah leng a om kei ding hi. I omdante uh, i hih na te uh chiangtak in hiai ah I mu thei uhi. Hiai bang thumal te a hihna neikha a, ahih keile hiaite a bawltu a om lellel i hih khak leh i ki bawl hoih uh ahun mahmah ta hi.  Toupa deihdante zong a, Amah a ki nga a , Amah i naih chiangin,  hiaite’ apan hon siangsak thei gige hi. Tua ding a Amah zong a, Amah kiang i zot kal hon ngakngak ahi chih leng i theih uh i deih mahmah  hi. Tua i Laisiangthou sim uh michih i kivel thakthakna uh hileh chih i ki ngetna leng ahi.

TV leh computer khong ah film tuamtuam ana en zel i om ding ua, a en ngeilou te’n le bangtan hiam ah theihtheihna nei i om chiat ding uhi. Mihingte’ bawl tawm film tuamtuam atak a om ngei dia i na koih het louh uh leh film maimai hi cia i na thulak khollouh te uh bang atak a om pawl a omta hi. Maban a om thei dingte cia ana bawl te uh bang tuni chiang in atak amuh theih ding a omta hi. Huchih ahih lai’n, mit a muhdia mulkim huai pipi, ki douna tuamtuam, thubuai tuamtuam leh ki thahna mulkim huai taktakte tua te apan in i en uh a, tua te ziak mah in i ngaihtuahnate uh le za gop, poisakna ding neithei nawnlou hileh kilawm in puaknatna, hehpihna, nuamsaklouhna chihte leng i neithei nawn kei uhi. A tak a tuate hongtung chiang in ahi di mong a ngaihsutna lungsim i nei ta uh a bang a, I mihing pihte uh itna, veina taktak leh khotuahna taktak muh ding a tawm hiai hiai hi. Hiai in ni nanung lam manoh hialhial mah ihih dan uh hon sinsak mahmah hi.

I huntamtak te’ uh hiai bang thilte et utna in hon la mang sek hi, a dah huai mahmah tuh Toupa adia hunpiak chihte, thumna hun, Laisiangthou sim hun, Amah phatna late ngaihhun leh Amah adia hunpiak ding chihte haksa i sa tou deuhdeuh uh abang hi. Tua lel ahi kei a, a lungkhamhuai leh hehpihhuai ka kisak na mahmah tuh, i Khalam ann ding ua Toupa’n Laisiangthou honpiak pen a nisim, a kal sim, a khasim leh a kumsim ale enlou, simlou leh ngaihsak lou mitamtak i om uh a, a puaknat huai mahmah hi! Huchi bang mi tamtak te i thumpih uh a, amaute adia lampi hilh tu apang a, i hih theih tantan a i awlmoh uh apoimoh mahmah hi. I mohpuakna uh om a i hihtheih tan te sem a, abante Toupa khut a i ngak tuh amaute adia i hih theih uh ahi pen hi.

“Thu gen in; a hun hi in a hunlou ah leng pangzel in; thuakzohna leh sinsakna toh theisiamsak inla, taihilh inla, haanthawnin. Thuhilhna dik a ngaihkhiak ngaplouh hun uh hongtung ding hi; a bilte uh a zau ziak in amau deihlam bang in heutute a kiang uah a khawm ding uhi: A bilte uh thutak lam ah a ngongsak ding ua, tangthu lam naih in a pialta ding uhi.” – 2 Timothi 4:2-4

Khovel thilte a i buai luat chiang un, i mihingpihte itna mahmah bang le tawm huaihuai adiam chih hun aom hi. Dik mah ahi chih i gingta hi, khovel thilte’n hoihlam sang in siatlam hon manoh sak ziakin. Laisiangthou mahmah inle hon sinsak hi. “Hiai khovel’ omdan toh kituak in om nawnta kei unla, Pathian’ deih lam, hoih sak lam leh kipahpih lamte na theihtel theih na ding un, na lungsim uh bawl thak a om in; hong lamdang zawta un.” – Romte 12:2

“Khovel it kei unla, khovel a thil omte leng it sam kei un. Mi kuapeuh in khovel a it leh Pa itna amah ah a omkei hi. Khovel a thil om tengteng, sa utnate, mit utnate, damsung thupina limte Pa a kipan ahi kei a, khovel a kipan ahizaw hi. ‍Khovel, a utnate toh, a mangthang lellel ahi. Pathian deihlam hihmi bel tangtawn in a om gige ding hi.” – 1 Johan 2:15-17

Hiai khovel omdan toh kituak a om i diam chih ei mimal mahmah leng kidot theihna ding a om hi. I kicheidan ah, i puansilhte hi taleh Toupa mitmuh in aki lawm diam? I thil ette, i film ette, i mobile a i thil ette Toupa toh enkhawm ding hileng i en ngam/I ut diam? I aw suak kammal te, midangte tung ah hita leh tuate Toupa mai ah i gen ngam diam? I thilhih hih te, i sep-i-bawl te Toupa toh hih a semkhawm ding chileng i ut diam? Mi dangte toh i kithuzakna a i thugelhte Toupa toh ki houna hileh i sim ngam/I ut diam? Hiai te houchik himahleh hiaiteng a dawnna hoih i piak theih leh khoveldan toh ki gamla ihi ding a, Toupa deihdan a om i hi ding hi. Huchilou a zumna di, ahihkeileh hiai pen zaw hoihlou ahi Toupa mai a i chih a om leh tuate a i ki bawlphat hun ahi kha ding hi. I hih peuh mah siangthoutak leh chitaktak a Toupa mitmuh a pomtak ahih ding ahi chih mangngilh ngeikei ni.

“Huan hihkhelhna a punding ziak in mi tamzaw itna a hong dai ding hi. Himahleh, a tawptan a thuakngap peuhmah, huai mingei hotdam in a om ding” – Matthai 24:12-13.

Khovel siatna uang deuhdeuh leh khelhna thupi deuhdeuh lak a itna te hong dai hialhial mahleh, ei Toupa Jesu Khrist a ginna neite adia hamphat huai mahmah leh kipahhuai mahmah tuh atawptan a thuakngap  te ading in hotdamna aom hi. Hiai hotdamna tuh nang leh kei a ahi chih thei in, lungkelou a Toupa adia thuakngam a, tan ngaite tanngam a, kipaktak a Toupa gam nna sem a, Amah adia gingtu muanhuai, salpha hi ding in simtute Toupa’n hon ompihin hon vualzawl chiat hen!

Amen!

Toupa’n i thugelhte tungtawn in theihsiamna leh Khamuanna i tangchiat uah honpiak i ngen a; theihna bukim louh ziak a igen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 10th  February, 2021 | Weekly-Inspiration – 57)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment