I THAWMHAUNATE TOUPA’N HON THEIHPIH HI

Thawmhauna chi khat michih in i neichiat uhi. Tua thawmhaunate bang chi bang in i langkhe sak a chih ngaihtuah tham a poimoh mahmah hi. Thawmhauna i chih chiang in eivuak i om chiang a i thawmhau na pen kia ahi pah kei hi. Mipi tamtakte lak ah hiam, i kiim-i-kiang ah midangte lak a i om inleng thawmhauna chikhat a om thei tham hi. Huchilou inleng midangte’ ziak in thawmhauna a kibehlap thei zawsop lai hi.

Thawmhau kisakna tuh hinkhua a natna chikhat hon suna theitu khat ahi mawk hi. Tua thawmhau kisakna a ziak tampi om ding hi. Tuate suiman ding i hikei a, himahleh a tangpi a michih in i neihtheihnate uh a ziak a om vek hi. Bangmah lou kisakna, tuam kisakna, phawkkhak a omlou kisakna leh poimohlou kisakna chihte a tam zawte buaina ahi a, hiai te’n thawmhauna a hontun zel hi.

Michih in hinkhua a i poimoh uh (Basic needs) a om hi. Kuahiam i it ding neih utna leh hon ngaitu ding i poimoh uhi. Hiai a itna i gen pen nungak leh tangval hinkhua a itna pen hi pah lou in, i Family te apa’n itna bang, midangte apat itna leh ngaihnatna i poimoh uhi. I hihna bangbang a hon theisiam theiding i deih uh a, kua hiam hon poimoh tu ding leh hon ngaina tu ding i poimoh sek uhi. Hiaite tuh i basic needs pen mah uh ahi a, hiaite a om mengmeng louh chiang in thawmhauna chi khat a om thei hi.

Thawmhauna akilat theihna chidang tampi leng a om a, hun leh thil omdan ah akinga tangpi hi. Social media ziak bang, khamtheih khong ziak bang, khelhna i va hih khak te ziak bang, gim kisaknate ziak bang, ihmutkham louhnate ziak bang, taksa hatlouh ziak bang leh thil dangdang tampi a om hi. Tuni’n hiaite gen a sui sawm i hi kei a, i Laisiangthou hon sinsakna dan leh deihna bang a tua Thawmhaunate bang a? Hiai hun a bang chi om ding i diam chihte gen ut i hi zaw hi.

I hondampa Jesu hinkhua ngaihtuah thakthak in, tuate i niteng hinkhua a ngaihtuah pi pen in neithei gige leng i ut hi. Amah thawmhau hun a tam dingdan chih hon ngaihtuah saksak hi, Gethsemani a athumlai khong bang, gamdai khong a hun azat lai khong bang leh sing khros a hong sih huntan in bang zahta in a thawmhau tel dia? A Pathian hih nate ki koihkhia a, ei mihingte tuah bangbang natna, thuakgimna, kipahna leh bangkim mihing in a neihteng nei a, tuate thuak ding in a hong ki pekhia hitel hi. Hiai a ngaihtuah ding leh i theih ding ua poimoh mahmah ahihleh, mihing bang a Jesu hong om ahihleh tua thawmhauna maw, haksatnate maw, bang peuh i tuahte uh aman hon theihpih lotel ding a, tuate ana tuahsa vek ahi chih i theih uh a hoih hi. Isai in hiai bang in ana gen khol hi, “….Amah mihingte muhsit leh deihlouh in a om a; dahnate neimi leh natna theimi ahi a; amah lak a i mai uh sel bang i hi ua, muhsit in a om a, en lah amah i ngaisang tuankei uhi.” – Isai 53:3.

Kumpi David inleng a thawmhauna ziak in Toupa kiang a panpihna a ngen hi. “….Kei lam hong nga inla, hon hehpih in; thawmhau leh haatlou ka hih ziakin, TOUPA aw.” – Sam 25:16

Tuni’n ah thawmhauna chituamtuam i nei ahi mai thei, ahihkeileh tua thawmhauna te’n hinkhua haksa sakna, kiningna leh lamet bei kisakna hon tung ahi thei hi. Himahleh hiaite ziakin lungkham leh bah in om keini. Toupa’n tuate hon theihpih vek ahi a, Ama tuahlouh om lou ahi chi thei ni. “…Aman a hon limsak gige ziak in na mangbatna tengteng uh amah ah nga vek un.” – I Peter 5:7. I hunte uh atam zaw a thawmhau i kisaknate uh Toupa’n Amah lam i ngatna ding uh, Amah i belh sem na ding ua honpi na ana hithei gige ahi chihleng phawk chiat ni.

“…Siampu Lianpen i hatlouh kitheihnate hon theihpih phalou nei i hi kei ua; eimah bang a lam tuamtuama khemna tuaksa, khelh bel khiallou, nei i hi zaw uhi.” – Hebrute 4:15

Mihing taksa melpu a omlai i hihziak un thawmhau hun hong om thei zel hi, himahleh thawmhau na hun neih gige chih bang leng adiklou om thei ahihziakin in ki etchian thakkhak apoimoh zel hi. Toupa hon sapna leh hon houpihna hun hithei gige ahihziakin tua bang hunte ah Amah kiang mah a kik pahpah leng, tua bang thawmhau kisaknate’n mun a nei tawm mahmah ding hi.

Tukal i Weekly Inspiration a i deih pen ahihleh, Toupa ompihna phawk sawm gige ni, eivuak a om ngeilou i hi chih mangngilh keini.  Hon ompih gige a, i hihna bangbang a hon pom Toupa Jesu Khrist i kiang a om gige ahi chih phawk in, Amah kiang naih gige in kipaktak leh lungsim nuamtakin i om ding uh.

“Bangchik mah in k’on donlou kei ding a, paileng k’on paisan kei ding” a chi hi. – Hebrute 13:5b.

Amen!

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 23rd  March, 2021)

Weekly-Inspiration – 64

Leave a Reply

× Direct Appointment