I OMDAN IN TOUPA A PAHTAWI ZOU TAKTAK DIAM?

“Pathian thei a kichi ua, himahleh a thilhih un a nawlkhin nak uhi, kihhuaite, thumangloute, thil hoih sepding peuhmah a Pathian deihlouhte ahi uhi.” – Titas 1:16

Tuni’n hiai dotna saulou mahni chiat kidong masa leng i chi hi. Tua i omdan lellelte’ Toupa mitmuh in vualzawl tak leh kilawm hi ding in i ngaihtuah ngei hia? Toupa’n tua i omdan toh kituak a vai hon hawmsak ding hileh i kiman zouta na diam? Sianthouna toh Toupa deihdan a hinkhua zang i diam, ahihkeileh kihhuaite tak a eimah utdan a khosa lailai i hia le? Hiai dotnate’n i hihna uh, i dinmun uh Khalam ah hi’n salam ah hileh i omdan uh hon kithei sak chiat ding in i gingta hi.

Khenkhatte’ ngaihsutna bang in Toupa a kimuhthaknate i hon neih chiang un, Khalam a hatpah vevu ding, lungnuamtak a om ding, kipak gige ding leh hinkhua nuamtaka ompah dingdan in ngaihsutna a neih theih tham hi. Tuate chu awlawl a i muhtouh ding mah uh, a lou theilou mah ahi hi. Toupa toh i kituah nung inleng haksatnate, dahna leh lungkhamna a om thei hi himahleh, tuate a i om det ding uh ahi kei hi. Amah a lametna ngata i hihziak un, haksat hun hi’n, lungnoplouh hun ahleng lametna i thei uhi. Hinkhua ah haksatnate omzel mahleh, tuate i vualzoh uh angai a, Toupa a i kingak zoh peuh uh a poimoh hi. Toupa i neihnung Amah ah lam-etna hing om gige ahihziakin, kipahna, maitaina, lungnoptheihnate Amah tungtawn in i neithei uhi. Himahleh thakhat thu a tuate nei a, Khalam a hat pah ding i kisak nakpen uh i ngaihtuahna uh diklou ahi chileng, tua dan ana hi khinpah lou hi. Hotdamna i Toupa Jesu Khrist a i sang zohnung Khasiangthou in hon sungluahta ahihziakin awlawl a i theihsiam louhte theihsiamna, haksatna i tuahte Amah tungtawn a theihsiamna leh Khalam a pichinna i hon neithei tou panpan uhi.

Gingtu hinkhua zaw niteng a khan semsemna ahi a, tua in Toupa deihdan a om semsemna in hon zuiding a tua te’n Khalam a masawnna hon tun in i Pathian sutna, Amah deihdan a khan semsemna a hontung ding hi.

Tunia i gen ut pen “I omdan in Toupa’ a pahtawi zou taktak diam” chih ah i lut ding. Toupa deihna bang a i om theihna ding leh, Amah deihna bang a pahtawi a i om zohna ding in mahni hihnate leh i dinmunte uh  ki theihchet masak a poimoh mahmah hi. Tua ahihziakin thumapi dan a i hotdamna lam uleh i dinmunte uh saulou gen masa i hi zaw hi.

Jesu Khrist tungtawn a kimuhkhiatna, hotdamna i tannung un i mihingpihte bang chi bang in i pii a, i aw suakte uh, i omdan leh gamtat khawheite uh Toupa deihdan mah ahi na diam chih kidot gige hiam, mahni a kitheihthak sak a poimoh hi. I thugente mahni in i hinpih a ngai a, i omdan te’n Khrist nungzui diktak leh muanhuaite i hih dan uh a lah a ngai a, i aw suakte’ uh Toupa deihna bang a itna, lametna tuntu ahih ding ahi hi.  Pathian thu-awi leh gingtute hinkhua zat dingdan tuh tua bang a hih gige ding ana hi zaw hi.

“Pathian thei a kichi ua, himahleh a thilhih un a nawlkhin nak uhi..”

Deihtelna i bawlte, midangte i muhdan, nna i sepdan, i kampau leh aw-suakte, mi i itte leh a guk a mi i huat omte. Hiai thumalte mah bang in i omdante uleh i hihnate uh gelhkhiattheih ding tampi a omlai ding  hi. Tuate i gelhkhethei vek kei ding a, i gen ut pen ahihleh i omdan in midangte tung a nna a septheihdan, tua in midangte hinna a sukkhak dan gen sawm i hi zaw hi.

Gingtute a ding a poimoh gige leh i theih ding ua hoih tuh Pathian vanzat (Instrument of God)  hi thei gige i hih dan uh kitheih a poimoh mahmah hi. Banah, Pathian a dia Kumpi palai (Ambassador) i hihdan uh i kipom theih uh leng a poimoh nawn mahmah hi. Gam khat in gamdang khat a, gam hihna, gamsung thute represent ding a  palai a guan a asawl khiat mah bang in, ei gingtute leng Pathian a dia palai muanhuaite, Amah hihna puangzak ding, a thute gen kheding leh sa kheding a hon deih a hihdan i theih thakthak uh a poimoh hi. Hicia hinkhua zang maimai a, mahni nopsakna ding tan lel a i om sawm gige khak ding uh thil lauhhuai pi khat leng ahi hi. Toupa hon sapna houchik in ngaihtheih mahleh, a thupi in a lauh huai mahmah hi. Pathian a ding a palai i hih mah bang un, a thu siangthoute ah i ki diah kawt gige uh apoimoh a, midangte thudik a pi ding, lampi dik a paipih ding leh Jesu Khirst hotdamna a tan theihna ding ua i makaih uh i mohpuak uh leh nna poimoh tak ahi gige hi.

“Khovel tengteng ah pai unla, thilsiam tengteng kiang ah Tanchinhoih hilh un..” – Mark 16:15. I mohpuaknate uh hou ngaihtheih chii a hihlouh dan leh eimah deihna bang a lak chii a hihlouhdan leng i ki hilh uh a, i theihchian semsem uh a poimoh hi.

I Laisiangthou tangteel ah lut nawn leng, Paul in Titas kiang a laithon a khakna ah saptuam makai heutute a taihilh na ahi hi. Pathian min a thute gen a, Amah nungzui kichi hina pi hinkhua a lehlam in a zang uhi. Pathian a dia nungzui muanhuaite kichi mahleh uh, a nnasepte ua tuate muhding omlou hi ding hi. Tua te ziakin Paul in, Pathian thei a kichi ua, himahleh a thilhih un a nawlkhin nak uhi, kihhuaite, thumangloute, thil hoih sep ding peuhmah a Pathian deihlouhte ahi uh ana chi hi. Hiai tuh Jesu’n Laigelhmi leh Pharisai te a genna mi lepchiahte (hypocrites) cia agen toh a kibang hi. (Matthai 23:27-28) “….Pawlam ah mihing mitmuh in diktattak in na kilang ua, na sunglam u bel lepchiahna leh gitlouhna in na dim uhi.”  (Matthai 23:28b)

I omdan te’n gingtu taktak i hihna uh, Christian kammal in a gen Pathian thu-awi, Pathian ummi te i hih dan uh a lah a ngai hi. Pathian thu-awi leh Amah adia i hinkhiat nung mahni utdan a omom a, mahni deihdan leh utdan a  gamtat leh kho-hel chihte a om thei kei hi, huchi bang a om mi i hih lailai le zaw mi lepchiahte leh theihpihtu zuau leh muanhuai loute i hi ding hi.

1 Korinthte 11:1 a Paul in, “Hon enzuite hi un, keileng Khrist enzuipa ka hih mah bang in.” a chih in gingtute om dingdan bangkim a gen zou hi in a theihtheih hi. Hiai in chou na thupitak mai kei mahmah ah leng a hon tun hi. Jesu Khrist nung i zuihna a, a nungzui muanhuai lel a hun himai hilou in, ei a nungzuite leng midangte adia etton ding a om ding a hihdan chiangtakin a hon mu sak hi. I gen sek mahbang in gingtu hinkhua tuh niteng hunteng a Khrist bat semsem na khan semsem na ahi i chih mah bang in, hunteng in Khrist toh tonkhawm in kalsuan gige leng; i omdante, gamtat leh khawhel ah, i kamsuakte, mi i houpihdante leh i muhdante uh hong ki lamdang ding a, Toupa bang a omna, Amah batna i nei toutou ding uhi.

Tuni’n na deihtelna, i deihtel theihna ei ah a om chiat hi. Pathian in michih tuate’ hon piak ahihziakin midang in i deihtelna hon bawlsak theilou hi. Toupa deihdan a hinkhua zang a, hoihlou leh hiai zaw Jesu nung ka zuihna a hon subuai thei ahi, ka Kha leh ka hinna a dia siatna hontung thei ahi i chih omleh tuate a pan i pawt khiat a poimoh hi. Huchilou a eimah utna leh nopsaknate a hinkhua zang lai ding i chih a leh tuate eimah deihtelna ahi. Himahleh I tangtawn mun ding hiai leitung hilou a, denchiang a Jesu hongpai ciang a laktouh a i om louh khak ding thillauh huai pen in ka ngai hi. Tua ahihziakin tunia saulou a i thugelhte tungtawn in thupukna i laktheih om ding a, tuate tengteng Toupa hon houpihna hizaw ahihman in Amah deihdan a hinkhua zang a, nungzui muanhuai, Pathian kipahpih leh lungkimna hi thei ding in simtute Toupa’n hon ompihin hon vualzawl chiat hen!

Amen!

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 03rd March, 2021 | Weekly-Inspiration – 61)

Leave a Reply

× Direct Appointment