I LAMETNA UH BANG LAM AH I NGA A?

Hinkhua a lametna bei kisak na, bang hiam tung a lametna om nawnlou sakna bang, ahihkeileh hin thaman om nawnlou kisakna nei a hinkhua ana zang kha i om ding uhi. I lametna te adau hun bang, i thadah hun te hong om theizel mah hi. Haite tuh mihing i hihna tak ahi a hiaite om lou hileh I hinna uah bangmah ki poimoh lou ding hi. Hiai bang hunte ah bang chi’n i omdia? Bang hih ding i hia chih te saulou in i gen ding.

Ginglou mite’ lak ah a tam zaw te’n leng ginna khat anei chiat uhi. Toupa Jesu a ginna leh lametna neikei mah le uh khovel thilte ah a lametna leh ginna khat anei chiat uhi. Eite bel tua bang zen i hi kei uh a, Toupa neimite, Amah a lametna nei mite i hi uh a i hampha uhi. Tua bang ahihlai’n leng i lametna te uh Toupa ah hi zawlou in thiltuamtuam te a i koih khak hun uh a om sek hi.

Nidang a ka thiltuah te apan in hon gen leng, lametna Toupa a koih ka kisaksak lai’n midangte tung a ka lametna kana ngak khak hun a om sek hi. Tua te tuh aki bang vek kei hi, siamsinna a ka laisimnate tung ah bang, saptuam lam a makaih leh Pastorte tung a lametna ana neih khak bang, nekmuhna nasepna mun te ah bang, damtheihna ah ahihkeileh midaangte toh kikal ah lametna kana kioh khak hun a om hi. Toupa i neihma, Amah i muh taktak ma zaw hiai bang a om theih leh om abaihlam mahmah hi in ka mu hi. Toupa toh iki tuahnung inleng hiai te apan ki velchet gige apoimoh dan, Pathian adia hing leh Amah adia nna semsem i kisak lai a banghiam thildang a lametna i neih khak ding a lauh huai mahmah hi. I et a lametna i neih gige ding uh zaw i Toupa Jesu Khris kia ahi zaw hi.

Tulai a mitamtakte’ dinmun tuh hiai bang hi in i muthei hi. Khovel thilte tung a, maban a i khosakna ding te uh ngaihtuah in Toupa a muanna nei zoulou hileh kilawm in thildangte ah lametna i neinak uhi. Etsakna hoih mahmah a i muhtheih tuh, mihingte’n i khelhna te uh mualsuah sawm in eimah thahatna te zang in dou i sawm nak uhi. Hiai bang thil ahi theikei hi, Toupa ompihna lou leh Amah lou in tua te i zou mahmah kei ding uhi.

“Hoihna hih ka ut pen ka hih kei a, khelhna hih ka utlouhpen, ka hih zawnak hi.” – Romte 7:19.

Sawltak Paul in Amah vuak a bangmah hilou ahihdan leh, amah thahat a bangmah zoh ding omlou ahih dan athei hi.

“Thil ka hih pen, a dan ka theikei; ka thilhih zel pen, ka thilhih utlam ahi ngal kei a, ka thil huatlam tak ka hih zawnak hi.” –  Romte 7:15.

Hiai a Sawltak Paul in hon sinsak noptuh bangkim a Toupa a ki ngak gige apoimoh dan, Amah kia a lametna neih gige apoimoh dan chiangtakin a hon hilh hi.  “Mi liante gingta kei unla, mihing tapa panpihna himhim omlouhna gingta sam kei un.” – Sam 146:3. Midangte tung a lametna neih sang in Toupa a lametna neih gige apoimoh hi. “Mi liante gintak sang in Toupa a ginna koih a hoihzaw hi.” – Sam 118:9. Jeremia in mihingte tung amuangna neih a poidan chiangtakin hon hilh hi. “Toupa’n hichi in a chi: Mihing muang a, mihing ban hatna muang a, Toupa lehngatsan lungtang neimi hamse thuak in om hen.” – Jeremiah 17:5. Ei te’n I suan ding uleh i lamet ding uh zaw i Toupa Jesu Khris kiah ahih gige ding ahi zaw hi, mihing ah hilou in. “… sapum ah suanding i neikei uhi” – Philiippite 3:3b

Lametna Toupa a i neih lai inleng ngak zohna apoimoh nawn mahmah hi. Bangkim a thil i thei ut pahpah uh a, thil hongtung nailou di te’ bang i ngaklah thei mahmah uhi. Himahleh i niteng hunzatna ua ngak zohna leh thuakzohna i neih uh apoimoh hi. Toupa Jesu a i lametna ziak kia ua hotdam a om thei i hih mah bang un, khovel thil mutheih te a lametna i neihkhak chiang un i hih khial nak uhi. “…Lametna a hotdam i hi ngal ua. Himahleh muhtheih gige lametna zaw lametna ahi kei. Kuan a muhtheih gige a lamen a? I muhlouh pen i lamet lebel i ngak teitei hi.” – Romte 8:24-25

Pathian a lametna koih a, lametna taktak i neihtheih chiang un Amahmah in lametna hing honpia hi. Hiai te’n kipahna leh lungmuanna te hongpia a, bangkim a Amah a kinga a om i hihziakin lungsimnuam leh kipahna toh i om thei ding uhi.

“Kha Siangthou thilhihtheihna ziak a lametna na hauh theihna ding un, lametna Pathian, na gintak ziak un, kipahna leh kituahna chiteng in honhih dim hen.” – Romte 15:13

Hiai khovel a i hinna ding uleh mite bang a i khosaktheihna ding ua lametna  Toupa ah i neihlai un, i Khalam ua ding, tangtawn hinna i neihtheihna ding un Toupa Jesu ah lametna neih apoimoh pen hi. Amah kia ah ahi hotdamna i muh uh. Amah vang a siamtan a om a, i khelhnate ua pan a suahtakna hon pia thei i Toupa Jesu Khris kia ahih chih i gingtak ua, Amah a lametna i koih gige uh apoimoh hi.

“Midang kuamah kiang ah hotdamna a omkei, van nuai a mihing sak lak ah, hon hondam ding min dang a omkei” a chi hi.” – Nasepte 4:12

A tawp pen in Laisiangthou sim tam in Toupa a lametna diktak leh ei ah chii hoih ahon tuh hi. I lametna te a dau hun in, i thomhau hun in, khattang kisak khak hunte in Laisiangthou thu te in Khamuanna leh lungmuanna dik a hon pia thei hi. Laisiangthou thu i theihtam louh chiang in buaina ding leh patauhna ding i hau  mahmah hi. Hiai ziak mah in i lametna te uh ahi loulou ah i nga ua, tua te’n atawpna ah hoihlam, kipahlam sang in siat theihna, dahna leh lohsapna ahon tung zaw hi. Tua ahih ziakin Laisiangthou mahmah leng sim mun ni, i hunneihte uh atamthei pen Toupa adingin zang ni, Pathian pilna leh thilhihthiehna te tuh khovel thilte ah a om kei ah i Toupa Jesu Khris ah aom hi.

“…Kros thu zaw mangthang lelte adin haina ahi ngal a; ei hotdam lelte adin bel Pathian thilhihtheihna ahizaw hi.” I Korinthe 1:18

Amen.

Toupa’n i thugelhte tungtawn in theihsiamna leh Khamuanna i tangchiat uah honpiak i ngen a; theihna bukim louh ziak a igen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 13th January, 2021 | Weekly-Inspiration – 54)

Leave a Reply

× Direct Appointment