I KI MAN UH APOIMOH MAHMAH TA HI

0

Khovel paidan leh mihingte dinmun et in i maban uah lamet na koih ding chileng lamet ding a tawm mahmah hi. Siat theih na atam a, sihna manna, thubuai leh thuthang hoihlou tuamtuam niteng a i zak louh un leng i muh ding uh a om den hi. Hichi bang lak a gingtute’n lamet na leh lungmuanna i Hondampa Jesu tungtawn ah i nei thei uh a, Amah vang in i bit thei uh a i hampha mahmah uhi.

Mawltak in genleng, kisikna taktak ana neilou a tu damsung kia a i hinna ding uh ngaihtuah a khosak i sawm chiang un i lametna uleh i thil etdan uh ana dik kei sek hi. Hiai khovel zaw i inn uh hilou ahi chi in i gen ua tua mah miteng in i chithei chiat uh hi. Himahleh bang chi hiam a hiai lam mangngilh a nei pahpah i bang sek uhi. I sihnung ua i tangtawn hun ding uh ki ngaihtuah tawm mahmah lai a, hiai thute ah i ki khamuan uh a, i ki thu hilhhilh uleh i gengen uh leng apoimoh mahmah ta hi.

“…Tu damsung kia a Khrist tung a lametna i neih in zaw mi tengteng lak a mi hehpihhuai pen i hi ding hi.” – I Korinthte 15:19.

Toupa a i lametna ngak gige apoimoh a, i niteng hunzatna uah Amah toh ton gige akul hi. Toupa nei i hi iki chi a himahleh eimah utdan leh deihtelna a kal i suan nak chiang un lungkimna leh kipahna taktak a om thei kei hi. I lametna te uh Toupa a om nawnlou a hiai khovel thil te a i koih luat ziak un eimah leh eimah bang leng haksatna i ki guan nak uhi. Tawldamna Toupa’n kei kiang a om ahi chih thei gegu hi na pi Amah i naih zou sek kei uh a, Setan inleng tuate lungsim a hon ngaihtuah sak theilou in khovel thilte mah a lametna nei ding in ahon pi zel hi. Tua ahihziakin Toupa toh ton gige a, Amah galvan chikim aki thuam gige apoimoh hi.

“….Kha Siangthou thilhihtheihna ziak a lametna na hauh theihna ding un, lametna Pathian, na gintak ziak un, kipahna leh kituahna chiteng in honhih dim hen.” – Romte 15:13

Toupa toh ton a i hunte i honzat chiang un, nuam sa den ding leh kipahna a om den ding ihi uh chih ahi kei hi. Haksatna i phut tou uh a hong om ding a, tua bang te thuak ding  aki man a i kisak a hong poimoh hi. I lametna Toupa a om ahih ziak in, hiai bang hunte aleng kipaktak a i om theih ding apoimoh hi. “….Na lametna uah kipaak unla, gimthuakna ah kuhkal unla, thumna ah tawlnga kei un.” – Romte 12:12

Toupa hongpai ding kuaman a theikei a himahleh eite ki man sa a om ding in a hon hilh hi. Tu hun a Toupa hongpai ding dan in ngaihtuah gige in, ki man sa in om gige leng bang zahta in nuam i sa ding ua. Ei a ki bawl hoihhoih na ding om zou gige ding inleng a gingtak huai kei hi. Mansa a om ding i hih ziak un hiai te’n khelhna hoihlou te ah hon ki bual sak kei ding a, Toupa tuak ding in siangthou tak leh kipaktak in i hunte uh i zang zaw ding uhi. Sawltak Johan in agen bang in, “…. Amah tung a lametna nei peuhmah amah a siangthou bang in a kihihsiangthou hi.” – 1 Johan 3:4.

Neulai in nu-le-pa te’ nasem in a ki loh khong in a kuan sek uh a, ei skul kai tawp chiang a insung nna hiam ahihkeileh i siamsin na a i homework te khong ana hih a, tuate zou ding in ahon thuhilh zel uhi. Hih ding a ahon thuhilhna te uh hih lou a, I homework te khong i na zohlouh chiang in nu-le-pa te hongtung ding kal bang aki lin thei mahmah hi. Himahleh hih ding omte zou a, ki mantak a i na om chiang in amau te hongtung kal bang aki ngaklah mahmah a, bang hiam hih khaklouh om ding bang lau in a ki om zaw a hongtung kal uh ki ngaklah mahmah hi. Tua mah bang in Toupa a lametna te nga a, Amah deihdan a i khosak chiang in i omdan leng anuam a kipahna leh lametna Toupa ah i nei hi. Hiai ah bang gen nuam a i hiam i chih leh Toupa hongpai thei gige ahih ziakin mansa a i om uh apoimoh mahmah hi, Amah toh kituak dia i om theih uh a poimoh ta hi. “….Huaiziak in nou leng kiging gige in om un, na ginlouh dak ua Mihing Tapa a hongpai ding ziak in.” – Matthai 24:44

Toupa hongpai hun chiang in tulai a i buaipih mahmah te uh Social Media tuamtuam a mi thugelh, mi thu post te i va en in i va man kei hial ding a, Toupa a hongpai ahi mai ding hi. I hun zatdan uleh i hun mandan te uhleng i ki etthak uh a, i dinmun uh i ki vel thak uh apoimoh hi. Tu hun nanung ahi i chi ua himahleh Toupa hongpai ma in sihna tuak hileng ei adia khovel bei ahi ding hi. Hiai in Toupa hongpai na ding kum tampi om ding bang hileleng gingtute’ mansa a i om gige uh apoimoh dan hon sinsak hi.

Tu hun in haksa tak a hing leng i hithei a, thuak gimna tuamtuam mi chih in i na tuah uh leng a om tham ding hi. Himahleh i ginna uleh i lametna te ua ding kip ni, Toupa ah ki hat thei gige ding in panla ni. Hiai khovel ah natnate, sihnate leh haksatna te tuak tham mah ni, himahleh hiaite ziak in Toupa ah i muanna nungtolh sak kei hial ni. Nikhat ni chiang a tua bang te om nawnlouh na a, kipaktak leh nunnuam tak a Toupa toh om khawm ding i hi ziak un. Thuakgimna te leh haksatna te i neih hunte hun hiai thute in ki khamuan zel ni, “…Toupa ngakte’n zaw a hatna uh a thaksak nawn ding ua; muvanlai bang in kha in a lengtou ding ua; gimlou in a tai ding ua; bah lou in khe in a pai ding uhi.” – Isai 40:31

Tuni’n nang leh kei Toupa tuak ding in mansa in i om ding. Ei a khelhna i na hih khak i theih omte Toupa kiang ah ngaihdam ngen in, siangthou tak in i hunte uh zang ni. Toupa nung i zuih na uah, Amah deihdan a i khosak na ah vuallel kisak hun om kha thei hi. Himahleh hiai te zaw khovel in hon etdan leh hon muhdan ahi zaw hi. Lunglel leh vuallel kisa keini, Toupa toh ton a pai khawm i hih ziak un denchiang in thupitak a pahtawin in om zaw ding uhi.

“….Huai thu ziak in ka bah kei uhi; i pawlam mihing zawngkhal hiaihiai mahleh, i sunglam mihing pen niteng a bawlthak zel in a omzaw ahi. Ka gimthuakna neukha uh tu mitphiatkal sung kia a om ding in, thupina thupitak tangtawn a ding in a hon bawlsak hulhul ahi; Thil muhtheihte enlou in, thil muhtheihlouhte ka en zaw uhi; thil muhtheihte zaw sawtlou kal a ding ahi a, thil muhtheihlouhte bel tangtawn a ding ahizaw hi.” – 2 Korinthte 4:16-18

Toupa’n saulou chik a i thugelhte hon vualzawl sak henla, theihna bukim zohlouh ziak a genval leh gen khelh omte a ngaihdamna i ngen a. I gendik leh ahoih omte i tanchiat ua ding a Khalam Khanna leh Toupa vualzawl hong hileh i thumna lian pen ahi. Amen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi)
16th December, 2020 | Weekly-Inspiration – 50

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment