How Counselling Help

Mihing i hi ua, khovel a i omsung uh chu taksa, lungsim leh khalam a damlouhna i tuah zel pen ahi di mawng ahi.
Taksa lam a damlouhna i tuah chiang in Doctor prescription ngai sese lou in ei experience leh theihtelna zang in damdoi i ki nek mai zel uhi.
Natna khenkhat huchiin damthei zel mah leh, akhente Doctor ki etsak ngai sese om hi. A ‘symptoms’ dungzui in Doctor in prescription hon gelh a huchi’n treatment ki la hi. Hinapi in, natna khen khat a dam theih na ding in investigate masak ngai om hi. Test report-te dungzui in, treatment hoih pen a atheih Doctor in hon pat pih sek hi.

Huai daan in, niteng hinkhua a i thil tuahte ziak in i lungsim-lam leng anuamlou leh hon nasak thei thil hong om zel zel hi. A huchih chiang in ei-leh-ei hiam, innsung mite hiam, lawm khat leh nih hiam toh i gen veng/hih veng theih omsek mahleh, a veng thei hetlou thil khenkhat i pai/puak kenkun leng omkha thei tham hi. Hiai puakgik pen hon na-sak leh lungsim leh kha ah i khandaal suak sek hi.
I sa, i lungsim leh i kha a kikhen thei ahi kei hi. Mihing i hihna hiaiteng ziak a bukim ahi chih i thei hi. Hiai teng lak a khat a buai hiam aliam hiam a om leh, adang tegel hihkha pahpah ahih ziak in, pumpi a liam leh na a omkhak baihsam petmah hi. A lom a thil nuamlou i tuah chiang bang in i ningkitel in i hin bang le hon hih nuamlou thei hial hi. Huai ziakin, “buaina nei kahi” chih di zum kei ni. Suahtatna leh damna i muhna di’n, “buaina ka nei a, panpihna poimoh ka hi” chih poi sa lou in hon panpihthei ding counselor zuan ni. Pathian in i thumna hon dawnna dia counselor zot theih di bang ana om leng hi kha thei hi.

Counselling i chih chiang in ei deihtelna zang a i buainate a suahtatna leh haksatnate hihven theih na ding thil omte Counselor in hon etpih a suutpih ding chihna ahi. Pathian thu a ki tai hiam ki thuhilh hiam chihna hizo lou in, hotdamna thu kihilh chih leng hipah lou in, i natna leh buaina amasa pen in kikoih hi. Ahia lah, Christian i hihna uah, Pathian’ Thu, i houlimpihte’ deihtelna in ki gen kai thou thou hi.
Counselling/Houlimna hun pen boruak zalen leh bit theipen in Khasiangthou piina toh kizang sek hi. Huchih theihna di’n kihoulimna pen ‘accepting’, ‘non- judgemental’ a, mi tangthu pen 100% confidential in ki kembit hi. Apoimoh a, midang panpihna ding a amau tangthu gen angaih leh, Amau phalna la masa lou in koimah ah kigenkhe lou bikbek hi.

Buaina himhim i tuah chiang in, a buaina pen hong veng henla, huchi leh eilam pen veng ding in ki ngaihtuah pahpah hi. I kiim-kiang leh i thiltuahte i khek theihlouh, i ‘control’ theih louh chiang a le navaak tak a om theih ana hi. Aziak ahih leh, i muhdaan leh ngaihdaan a hong kikhek leh, buaina pen a suk ven di daan i ngaihtuah khak ngeilouh khong ki ngaituah khe thei a, a hih ding daan leh panlakthak ding dan ki mu thak hi. Khek danglam theih louh thilte pomsiamna ding in counselor in pan lak pih zel hi, Pathian’ piina toh.
I natna leh liamnate ziak a i haih thilte hon kawkmuh kia hilou in, mihingte hihtheihna baan a A hihtheipa, A thuneipa leh Thumna dawngpa khebul hon tunpih thei ding in Counselorte leng Toupa’n zang a, houlimna amau toh neih phatuam mah mah hi.
I hatlouhna, natna, dahna, hehna, thangpaihna hon ngaikhiaksak a lamdik hon kawkmuh thei ding in counselling ah suahtatna mi tampi te’n ana muta uh hi. TOUPA’ thilhihtheihna i muh leh i tan theihna dia, i hatlouhna pen i gen khiak poi sa kei ni. Ama hehpihna ei a dia huntawk gige ahi.
Toupa khebul hon tunpih theite zot poisa lou ding in i ki ngen in iki deihsak mahmah hi.

Isai:1:18
Toupa’n, Hongpai un, ngaihtuah khawm dih ve ni! Na khelhnate uh san-au bang in aom mahleh, vuk bang in a ngou ding; sandup bang in san khin mahleh belam mul bang in a om ding.

Galatiate 6:2
Na puakgikte uh kidawn chiat un, huchi’n Khrist dan thu na zui uh ahi ding.

Jakob 3:17
Tunglam a kipan pilna bel, a tu’ng in a siangthou phot a, huakhit in kituah a ut a, a nunnem a, a chihnuam a, hehpihna leh gah hoih in a dim a, khentuam a nei kei a, a lepchiah kei hi.

Sam 32:8
Na paina ah k’on hilh pil dia, k’on chil ding: ka mit a hon en gige kawm in k’on suangtuahsak zel ding hi.

РChingngaihlian Tunglut 

× Direct Appointment