HOTDAM A OM KA HI: HIMAHLEH KHATVEIVEI GINGLEL KA HI

Na ginna leh na hotdamna toh kisai khatveivei ginglel kisa in, ka hotdamna dik zoulou adiam? chi in nang le nang na ki dawt hun a om hia? Tua bang na hih leh lau het ken nang vuak na hi kei a, midang atam zaw te tuah mah tuak na hi. Bangziak a ginglelh na nei I hia? Hiai ginglelh na tungtawn a I hotdamna dik hia diklou chih theihtheih na ding I Laisiangthou ah a om hi.

Kipahhuai mahmah khat ahih leh, mi khenkhat in Hotdamna ki chi pen bang hi hiam? Bang chi bang a omte hotdam a om uh a, bang ki chi theih uh a? Ka ginna bang a? chia buaithei te tung a I kipak hi. Hiai hotdamna nep bawl leh hou ngaihmawk lou uh a, hotdam in ka om taktak diam chi in a buaithei zaw un ki vel chian zel uhi. Himahleh tua bang ahih lai in, Jesu a hotdam a om I hi chih leng phawk khalou, ngaihleng ngaihsak lou a ut dandan  a khosa I om uhi. Tua bang te’n Hotdamna taktak sang khalou hina pi in, hotdam a omdan in ki koih den uh hi. Hiai ziak mah in I khalam dinmun ngaihsak lou in ut leh dah a khosa mi tamtak I om uhi. Tua bang mite hilou ding leh I hotdamna uh ki en chian zel ding in simtute I kichial ahi.

Hotdamsa hina pi bang ziak a ginglelh na lungsim I neih hun hong om hiam? Ahih keileh bang a I ginna tak chih I ki dotna hun a om sek hi. Sawltak Paul mahmah in leng ana gen hi.“Ginna ah na omna uhiam chih noumau ngeingei ki enchian zel un. Ahihkeileh noumau ah Jesu Khrist a om chih noumau ngeingei in na thei chian kei ua hia? Deihlouh na hih kei ngal uleh.” – 2 Korinthte 13:5. Hiai a I muh mah bang in, bang a I ki etchian na ding? I niteng hunzatna a ei a I hinpihte’ bang a chih ahi. Tulai diakdiak in I hotdamna leh I ginna hon sudai thei gige thil tamtak a om hi, hiai bang dinmun om thei te apan eimah I ki etchet zel a poimoh mahmah hi. Gingtu I hih na ah, niteng ah I hih ding ahoih leh hoihlou, lampi dik leh diklou a om hi. Hiai te a pat koi lampi tawn ding I hia, bang pen hih ding I hia chih mahni a I ki thudot a poimoh gige hi. I hinkhua zatdante Pathian deihlouh dan ahi hia chih I ki vel gige a, ginna a om taktak ka hi hiam chi I ki dot gige ding ahi.

“…. Angkawmna, kingaihna, thanghuaina, hukna, milim biakna, bumna, huatna, kinakna, hazatna, hehna, kilanna, omtuamna, gintuamna, deihgohna, tualthahna, zumun nopna, zukhamna,” – Galatiate 5:20-21a. Hiai te tuh I niteng hunzatna a hong hih nin thei thil te ahi uhi. Hiai bang thilhih chingte’n Pathian gam a tangkei ding uh chih ahi. Hiai sa thilhihte a ki bual theih na a tam mahmah a, eimah hatna a zoh ding thil leng ahi kei hi. Himahleh Toupa ompihna toh hiai te apan I ki venbit thei gige hi, Amah toh hunteng a I om khawm apoimoh mahmah hi. Hunteng a Toupa toh tonkhawm lou a eimah utdan a I omkhak chiang in hiai sa utna te ah lut abaihlam mahmah hi. Hotdam a om I ki saksak lai un, I hotdamna uh ana dik zoulou ahi khathei hi, hiai bang sa utna te toh I khosak det le zaw Pathian gam I lut kei hial ding hi. Himahleh hotdamna taktak I sang zoh chiang in I hinkhua a kikhek na hong om ding a, ei ah khagah tuamtuam Toupa apat I nei ding hi. Kha nasepte tuh i hinna ah hong ki langkhe vuak hilou in, I mihing pihte’ mahmah in leng ei a muhding hon nei lai ding uhi. Tua kha nasepte tuh “,…itna, kipahna, lemna, thuaktheihna, migitna, hoihna, muanhuaina, nunnemna, kidektheihnate a hizaw uh .” – Galatiate 5:22-12a.

Hotdamna tangsa himahleh buaina leh lungmuan louh na I neih hun a hong om thei tham hi. Inkuan khosakna ah, I nasepna ah leh I thilhih te ah haksatna I tuak thei tham a, hiai te’n I ginna te ahon subah thei hi. Hiai bang hunte in Pathian kiang ah lungmuanna bukim I ngen thei hi. Pathian a I gingtak nak leh I tung ah hih theihlouh Aman neilou hi, hiai hun haksa te ah Toupa ompihna leh panpihna I ngen thei gige hi. “Huchi in naupang’ pa’n khitui toh, “Toupa, ka gingta hi, ka ginlahna hon huh in” chi in a kikou khia hi.” – Mark 9:24

Khalam vai toh kisai leitung a mihingte dinmun khenkhat I muhtheihte ahih leh.

  1. Hotdama om a, amau mahmah leng ki theichiante
  2. Hotdam a om a, himahleh lungbuaina nei te
  3. Hotdam a om kisa, himahleh hotdamna taktak neilou te
  4. Hotdam a om nailou ka hi chi a amau leh mau mah leng ki theite

“Toupa, Toupa, honchi napeuh van gam ah a lut kei ding uh; ka Pa van a om deihlam hihte a lut ding uhi.” – Matthai 7:21.

Bang pen ah I om kha a chih I ki etna hong hileh I chi thakthak hi. Hiai te lak a alauh huai penpen tuh hotdam a om kisa, himahleh hotdamna taktak ana neilou I hih khak ding ahi. Hotdama om a, ei mahmah leng ki theichiante I hih ding uh ahi.

Hotdamna chiantak nei nailou I hih lehleng hon hilhchianthei leh hon panpihthei dingte I houpih apoimoh mahmah hi. Tu a hunlai ahih man in zekai kei ni, tu hun tu eite adia hun hoih leh hun manpha Toupa’n hon piak ahi chihleng manghilh kei ni. “Hun kipahhuai ah k’on ngaikhia a, hotdamna ni ah k’on panpih” a chi ngal a.” – 2 Korinth 6:2. I maban ding theilou I hih ziakin denchiang a sihna I tung uah hongtung thei gige ahi chih leng phok thakthak ni. “Huan mihing ading in khatvei sih seh ahi, huai nung in vaihawmna a om ding hi.” – Hebrute 9:27.

I dinmun uh bang hi hiam chih iki thei chiat uh a, Pathian kiang mahmah ah leng theihchet na I ngen thei lai uhi. Tua ahih man in simtute kei leh nang ki enchian thak gige ni. Toupa hatna muang in Amah ah ki tulut thei gige ding in I biak Pa Pathian in hon ompih in hon vualzawl chiat hen. Amen!

  • Thangginom Hangshing

    (Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
    16th September, 2020 | Weekly-Inspiration – 37.



Leave a Reply

Your email address will not be published.

*
*
*

× Direct Appointment