KHEMNA

0
Khemna thuak teitei mi a hampha hi; ze-et a om nung in hinna lallukhu, Toupa’n amah itte kiang a a chiam a muh ding ziak in.- Jakob 1:1

Laisiangthou in khelhna chi a a gente ngeingaihlou a, khelhna a leng simlouh hun ah i khosa ua; sualna , gitlouhna, thangtatna leh siatnate a uang hiaihiai hi. Eden huansung a hoihlua hi a kilang khemna masa bang in, tuni tan in hoih hileh kilawm, nuam lua ding chihte a khem in i om tou lailai hi. Khemna in eite hon pel tuanlou ahihman in, khemna i tuaktou den a, hiai khovel i nuntak sungteng tuakzel ding hi. A thuak teitei mite hampha chi a i Laisiangthou in a hon sinsak ahihman in kuhkaltak a i pan a ngai!

Eden huansung a khemna pen hoihlua bangin kilang i chi ta. Gamdai a Jesu Khrist a khem a aom hun inleng, khemna tuak ahi chih thei kom in, a khemna tuahnate i sut detdet chiang a hoihthei lua hileh kilawm hi. Mihing mit a etlah huai leh khemna leng banglou thute a khem a om ahi. Tulai inleng a langtang – mit a muhtheih ngoihngoih ding in siatna om mahleh, hoihtak leh deihhuai bang in kilangte a khem in i om ua. Laisiangthou sim tamloute ading in deihhuai leh hoih, i sahkhua ginna toh leng kikalh lou chih theih maimah khong tam in tam hi. [Gen. 3:1-13, Matt. 4:1-11]

Adam leh Evi khem a aomlai un, thil haksa leh thil hitheilou ding a khem ahikei ua, thilnuam leh baihtak a hihmaitheih ding theigah omsa zang a khem ahi uh. Huai bang ngei in, Jesu Khrist khem a omlai in ‘suang tanghou suahsak ding’ chih hi masa hi, tui uain suaksak pa’n tuh suang-tanghou suaksak thei mahmah ding! ‘Biakinn tungzum a pan kikesak leh Pathian in angelte thu pe dia a dom ding uh’ chih ahi – Jesu Khrist mikhialte tan ding a hong pai ahi a, kikesak leh Pathian in angelte zang in a dom ding, huchilou in zaw, Jesu’n hong paina san semsuahlou in biakinn tungzum a kipan kia suk in si ding a, Pathian diktat lou suak ding hi. Banah, setan mai a Jesu kun leh khovel thupi leh gam tengteng pethei tham ding, a chetna di’n tulai khovel a milian-milalte Pathian phawk chih ding om louhdan a kipan theihtheih mai hi. Mihing in khemna douzou kei mahleh Jesu Khrist in zou hi. [Jhn. 2:1-12 ; Lk. 5:32 ] 

Covid-19 hii pi leeng ziak in mihingte i nuntak dan hun paisate bangkei mahleh, khovel a pai ngeingei in pailai – ni khat in dakkal sawm leh nih om a, khua: mial, vaak, vot, lum chihte a hunbi in tunglai hi. Ngeina bang a nungta theilou- buai leh beidong kisa sim mahlehang i khalam dinmun nelhsiah theih vual ahikei. Khemtu’ humpinelkai humhaam bang a khem ding zonga vialvak den ahihman in i pilvang sem poimoh hi. Buaina ziak a khemna, jolna, guktakna, diktatlouhnate’ Pathian mai a kisiamtan na tham chinglou hial ding hi. I niteng hinkhua ah ei gingtute’n eimah Kros pua a Khrist nungzuih gige ni! Haksat hun leh bah kisak hun inleng kuhkaltak in pang ni hang: zingchiang chiam i hikei a, Jesu Khrist hong pai phut thei gige, hong kik non ma a thil tung ding a agente a tamzaw tangtungta ahihziak in. [1 Pet. 5:8 ; Matt. 24:44]

Khemtupa’n a langtang a mi a khemte Adam-te nupa leh Jesu Khrist hi uh a, adangte bel mihing leh mihing, lungtang a suak, deihtelna zangkhial chihte tungtawn a khem ahi uhi. Eite leng i deihtelna bang, midangte tungton bang ahihkeileh lam chituamtuam akhem in i om ua, hiai khovel i nuntaksung teng i deihtelna leh thuzakte khemna hithei gige, pilvan poimoh mahmah! Dohsang tung leh mundangdang a Pathian thu kigente leng mihing biltai na ding leh zaknuamte tankia gen a, Laisiangthou hon sinsak pen leng genkha nonlou tamtak omta ahihman in, i thuzak leh zilte Beriah khua mite bang a Laisiangthou kituak na hiam chi a i sut detdet uh hunta hi. I nuntakdan ahleng khovel deihdan bang hilou in, Toupa deihdan toh a kituak in i nungta na hiam chih kivelchian gige poimoh hi. I mihinna in khemna douzoukei mahleh Jesu Khrist i neih chiang in khemna douzou ding in hatna kinei hi. [Nas. 17:10-15 ; Rom. 12:2] 

Vangam kai ding tanlel a piangthak kichi leng khemna thupitak hi a, vangam kai theihna ding in zaw i lut tum teitei a ngai hi. Hiai khovel a i haksatna leh buainate ziak in i ginna deldep sakmai kei ni, haksatna omlou in hatna kineilou a, khemna i douzoh tamsem leh khalam ah leng kihat sek hi. Khrist nung i zuihna ah phakchiam delh in i tai ding ua, bahlou a ma i sawnzel theihna ding a thuum in, Laisiangthou sim in, ginna a dingkip in, Itna ah om gige ni. [Luke 13:24, Phil. 3:13, 1 Kor. 13:13]

Hiai khovel a i omsung in khemna i tuak toutou lai ding! A langtang a hon khemna kia hilou in i deihtelna hon sukbuai sak chih bang, i kiim leh paam a i it leh ngaihte tungtawn in bang, i duh leh deih thilte bang in leh anuam leh limchi hileh kilawmte tungtawn in khem in i omtou zel lai ding. Himahleh khemna tuak teitei mite’n nikhat nichiang in hinna lallukhu, Toupa’n hon chiam i mu ding ua, huai hun chiang in kipahna bukim ta ding! Khemna i thuak teitei ke’n zaw tangtawn gimthuakna i tung mahmah ding! [Kil. 2:10]

-Liangsang Khuptong
 04072021-03

 
(Laigelh toh kisai kupbeh nuam omleh, Laigelhtu +91 70422 23744 ah thuzaak theih diing hi)

Leave a Reply

Your email address will not be published. Required fields are marked *

Book Appointment