Text: Johan 15:1,2; Matthai 7:21.
Thumapi:
Tukha a i sermon pansan ding in Johan Bung 15 sung a Grepgui dik leh a hiang kizopna leh gahsuahna thu ka hon tel hi. Hiai thu a hihleh Toupa Jesu’n khalam thil etsakna nei a agen ahi (allegory). Hiai gentehna ah character thum poimoh mahmah te a hihleh- Pathian, Grep neitu leh kemtu etsakna; Jesu, Grepgui dik etsakna leh gingtute, a hiang etsakna a kizang ahi. Grepgui leh a hiang kizopna bangchituk a poimoh ahia? Kizopna neilou gingtu piangthak om thei diam? a hihkeileh gahsuang theilou gingtu piangthak kichi om thei mah ahi diam? Gahsuang i hih theihna ding in bang poimoh ahia? Hiai apan in Jesu khrist’ nungzui chetna ding a poimoh kigente enkhawm suk leng i chi ahi.
Johan bung 15 pumpi etkhawm uthuai himahleh, hong sau lokha ding ahihman in tang 1 leh 2 kia etkhawm ding in ka hong kisa hi. Johan 15 malam ah Jesu leh a nungzuite inntung pindan ah hun a zatna thute i muthei hi. Hiai mun, inntung pindan sung ah Jesu’n a nungzuite sinsakna a thu kia hilou a lahkhiak (action)in leng a na sinsak hi. Etsakna ding in Jesu’n a nungzuite khe a na silsak hi. Huai lou in thupiak thak bang a na pia hi. Huai tuh Jesu’n hon it bang in ki-ittuah ding. ki-ittuah a i om uleh mi tengteng in Jesu’ nungzuite i hi uh chih hiai ah hon thei ding uhi. Huanah khamuanna thu bang, thuchiam tuamtuam (promises) Jesu’n a nungzuite kiangah a na gen hi. Hiai thute a genkhit in inntung pindan apan in kidron lui gal a om Gethsmane Huan lam manoh in hong pai uh a, a thugen hon sunzom nawn hi.
“Kei grepgui dik ka hi, ka Pa a kempa ahi (t.1).”
Grepgui dik, Pathian in Thukhun Lui ah Israelte genna in a na zang hi. Israelte apan lametna lianpi a na nei a, duattak in a na kemtou a a na khoilian hi. Himahleh Israelte’n Pathian in a tel nasan phawk banlou in kisaktheihna leh kithupisakna in zang ua Pathian lametna tan tungzou lou uhi. Midangte a dia Pathian hing theisaktu, musaktu leh Pathian lam naihsaktu ding a Pathian in a lamet et maizen toh a mohpuakna uh a na zoulou uh a Pathian mel liahtu hong hi maimah a hihman un Pathian in a Tapa khovel ah hon sawl ngai hi. A Tapa Jesu khrist Grepgui dik tungtawn in Pathian leh a hihdan i Laisiangthou ah i mu hi. Isai 5:3, 4 in, Tuin, Jerusalem a omte leh Judah mite aw, “Hehpih in kei leh ka grephuan kal thu hon ngaihtuah dihve ua. Tua grephuan ah ka hihsa a kan a val a tung ah hih nawn lailai ding bangbang om ahita mai a? Bangziak in ahia, grep gah a gah ding a ka lamet et toh, grep taklou a gah maimah?
Khovel ah Grepgui kichi a diklou tampi om hi. Mi tampi’n, ‘Khrist ka hi, chi in, keimah minlou in a hongpai ding uh, mi tampi a khemzoh ding ziak un.’ Zawlnei taklou tampi a hongpawt ding ua, mi tampi a khempuk ding uh (Matt 24:5, 11).
“Kei a hiang gahlou peuhmah a lamang (t.2a).”
Jesu’n hiai a gen in a lungsim a om dia ka ngaihtuah a hihleh Judas Iskariot ahi. Bung 13na ah inntung pindan sung ah Jesu’n a nungzuite kiang ah, a lak ua khat in zuausan ding a hihdan a na gen hi. Juda Iskariot in hiai thu a zak in pawt khiaksan hi. Juda Iskariot in Jesu nung a na zui den a, Jesu thugen leh thuhilhna tampi zong a na za a, a thillamdang hihte leng a na mu hi. Himahleh a tawpna lam ah hong langpan maimah hi. Juda Iskariot bang bang gingtu tampi ki-om hi’n ka thei hi. Reservation om kawm pipi a Khrist nungzui a hihkeileh lametna dang nei a Khrist nung a na zui tampi ki-om ding in gingta kahi. Eilak ah kamuh dan in Juda Iskariot bang a Khrist nungzui tampi te’n khalam sang in salam metna ding zong zaw uhi. Juda Iskariot iplah huai mahmah a hih bang in nangle iplah huai mahmah hikha thei na hi. Jesu’n Juda Iskariot thilsawm poi asa mahmah a, piang kei zawleh amah a dia hoih zaw ding ahi a na chi hial hi. Mark 14:21 ah Jesu’n, Mihing Tapa a tanchin a gelh bang tak un a pai ding: himahleh Mihing Tapa mansak ding mipa tung a gik hi: Huai mihing zaw piang kei leh amah adin a hoihzaw ding” a chi hi. Nang leh kei toh kisai Jesu’n in i tungthu gen di bang hileh bangch’n hon gen dia?
Juda Iskariot toh kisai gensau zek lai le. Jesu nungzui sawm-leh-nih te lak ah telkha mahleh Jesu, Pathian Tapa, Messia ahi chih gingta lou ahi. A lawm dangte’n, ‘Toupa’ a chih theih lai un ama kammal a ‘Toupa’ achih lam kithei khalou hi. Huai sang in ‘Rabbi’ chi’n in sam zaw hi. Huai om dan tuh sinsaktu tanlel a koih a hih dan chiang hi. Khalam a pianthakna neilou a Khrist nung a na zui chihna ahi. Huan ah Jesu nungzuite min akivolh suk chiang in ama min a tawpna a kigelh sese bang inle gen nei ahi chi uhi (Matt. 10:2-4; Mark 3:16-19; Luke 6: 14-16). Jesu toh kinaih diak te(personal closed relationship) min kigelh masa sek a, a tawpna ah Juda Iskariot min tuang zel hi. Mundang khat ah Nungzui Johan in Juda Iskariot a hihna leh a ngaihtuahna hichi’n hon gen khia hi. “Hiai thaunamtui bangdia makhai za thum a zuak a migentheite kiang a pe zawlou uh ahia?” a chi hi. Mi gentheite a awlmoh ziak a hiai thugen ahi kei; guta ahi a, dangka ip a kem a, asung a koih a lak zel ziak ahizaw hi (Johan 12:5-6). Eilak bang ale saptuam sung nasan a guktak poisalou ki om hi. Sum leh pai a gen baang semtu, upa leh committee bangle ki om zeuhzeuh a hihna ah Saptuam sung polam nana a tuh posaklouhna lian mahmah ding ahihdan chiang mahmah hi. I piankum guk akipan tou pah i hi chiang ua. Koilam lam hiam ah gutakna toh kisai in ki-awkkha vek ding in gingta ing.
Mitampi te’n a gintak uh a hihleh Jesu’n a mite (Judate) Romete vaihawmna nuai apan suahtakna muhpih ding chih ahi. Juda Iskariot inle hiai lametna nei a Jesu nung a na zui hikha ding hi. A bullam bang zui fuh kisa sim ding in ka gingta a aziak tuh Jesu’n thillamdang tuamtuam a hih mutou zel a hihna ah Jesu leh a nungzuite tanpha mi theihphak hong hi uhi. A tawplam in tuh Jesu’n a sih ding thu, a paisan ding thu hon gen chiang in zui khial kisa mahmah ahi ding a, zuau san in taisan maimah hi.
Salam thil kia lamen a Khrist nung i nazuih khaknate bang bang om hiam kivel chianni.
1. Dinmun deihziak
2. Thuneih ut ziak leh mizahtak ding ut ziak
3. Mi phawk khak hih ut ziak
4. Kisuk lar ut ziak
5. Hauhsak ding utziak
6. ……(aban ngaihtuah zom in)
Jesu’n, mi kei a a om gige kei leh, hiang bang a paihkhiak in a om a, a vuai hi; huan a tawm ua mei ah a pai ua, a kang hi achih bang in Juda Iskariot bang bang gingtu i hihkhak leh paihkhiak in i om ding uhi. Hiang, grepgui a a om gige kei leh amah in a gah theikei bang in, eite leng Jesu toh kizom khalou a, Amah ah i om gige kei uleh, i gah theikei ding uh a, gingtu min toh tangtawn meidil a paihkhiak in i om ding uhi. Upa form silh in Pastor form silh hial lele Jesu toh kizom khalou i hihleh tangtawn meidil ah paihkhiak in i om ding uhi. Bible thu thei in, thugen siam in, thum siam mahmah lehang leng Jesu toh kizopna I neih keileh paihkhiak in i om thouthou ding uhi. Thilpiak leh thohlom tampipi pia in, pahtakman leh memento tampi sang mah lehang Jesu toh kizopna i neih keileh ei a dia a thawnlel ahi. Thum dam theihna nei in, dawi hawlkhiak theihna nangawn nei mahleng van a i min gelhlut in om keileh ei a ding in a thawn lel suak hi. Matthai 7:21 ah, Toupa, Toupa, honchi napeuh van gam ah a lut kei ding uh; ka Pa van a om deihlam hihte a lut ding uhi.
A gah peuhmah a gah tamsemna ding in a hahsiang hi (t.2b).
Gahsuang ding a Jesu nungzui i hihna ah gahsuang theilou i hih leh Jesu toh ikizopna lam awlmoh huai mahmah ding hi. Khenkhatte lunggimna ding tanlel a gingtu om a, phun na ding nei tan lel a gingtu leng om uhi. Lungkimtheih hetlou gingtu i chihte bangle Jesu toh kizopna a neih louh ziak uh hi nuam mahmah uhi. Hiang, grepgui a a om gige bang in eite leng Jesu toh kizom gige leng Jesu apan gah hong suak khe singseng ding hi. A gah potu(bearing) a hiang ahi. A gah pen a hiang apan hilou hong kipatna a guipi ahi. Huai mah bang in gingtute gah pen ei apan hilou Jesu apan hizaw ahi chih mangngilh kei ni. Huai a hihleh gingtute a ding in kisaktheihna ding khat le om lou hi. I theihsiam zawk sem na ding in khat ka hon gen lai di, electric current toh kibatna om hi’n kathei hi. Mei a hong vak na ding in a bul, a switch poimoh mahmah hi. A switch apan in hong ki-on chiang in a current a hongpai a a bulb in meivak hon pekhia hi. A switch ki-on mahleh a bulb apan mei hong vak keileh a bulh/tube a sia hiam hiding ahi. Hiai bangbang in khatvei vei gingtu gah/vak muh ding omlou hi. Jesu apan khasiangthou nasep hong luangkhe ut lua hinapi’n en i na daal kha sek uhi. Bangchi bang a daal kha sek i hi ua le? Sawltak Paul in, sa deihdan zaw Pathian douna a hi a, sa a omte’n Pathian a kipaksak theikei uhi. Huaiziak in sa deihdante i thah zel ding uh ahi achi hi. Hiai sa deihdan i thah ding tuh, angkawmna, kingaihna, thanghuaina, hukna, milim biakna, bumna, huatna, kinakna, hazatna, hehna, kilanna, omtuamna, gintuamna, deihgohna, tualthahna, zumun nopna, leh zukhamna (Gal. 5:19-21).
Sawltak Paul in valnou Timothy kiang ah hich’n a na gen, “Inn thupi ah tuium-belsuan dangkaeng leh dangka a bawlte kia a omkei a, sing leh bellei a bawlte leng a om hi; khenkhatte manphataka zat a om a, khenkhatte manphalou deuh a zat leng a omsam hi. Huaiziak in mi huai thilgiloute lak a a kihep leh, tuium-belsuan manphataka zat ding, siangthou, Toupa inn a zattak, nasep hoih chiteng dia mansa, ahi ding hi (2Tim 2:20-21)”
Tamsem a i gah ding a Pathian in a deih a hihleh, itna, kipahna, lemna, thuaktheihna, migitna, hoihna, muanhuaina, nunnemna, leh kidektheihnate a hi. Hiaite khatvei thu in i gah muh ding ompah kei mahleh. A gahna dia a neitu/kemtu hih dandan thumangtak leh dohzoutak a om nakleh a hun hong tun chiang in gah muh theih in hong om ding hi. Theigah bangle khakhat khanih a gahkhe phengphung a ompah a hihlouhna ah awl a hong gah ding ahi. Grep bang a hong gah na ding in kum thum bang hunla achi uhi.
Grep a hong gahphat na ding in a kemtu in a hoihloute a tankhia a, a zaam na ding a zaam khaloute bangle a bawl hoih a, khenkhat a botkhia hi. Hiai hun grep hiang a ding in hun haksa, nat thuak kisakna hun suak hi. Hahsiangna (prunning) kichi i tuah hun in nuam kei mahleh a gah manpha ahi. Hahsiangna himhim thuaklai in kipahhuai in a langkei a, khasiathuai in a lang hi, thuaknung in huchi a hahsiang a omte ding in gah khamuan huaitak leh diktatna tak a suahsak zel hi.
Thukhitna: Gahsuang ding a Khrist nungzui i hihdan mangngilh kei ni. Gahsuang theilou i hihleh Jesu toh i zopna etthak ngai ding hi. Jesu hon lametna tan a gah louh i hileh ei pan tankhiak leh bohkhiak ngai, hahsiang ngai om ding ahi chih thei ni. Jesu toh kizopna hoihtak i neih chiang in Jesu batna ah i gah khia hi. Khalam a si Jesu nungzui kichi Juda Iskariot apan sinlai hoihtak lak ding muta i hihna ah ama hihkhelhte leh a lampi totte i zuih teitei lai leh paihkhiak in i om ding ua kisikna a lian mahmah ding. Pathian in itna, kipahna, lemna, thuaktheihna, migitna, hoihna, muanhuaina, nunnemna, leh kidektheihnate a gah ding in hon panpih hen.
- Pastor M. Thangkhenmung