EI A KHELHNA OMTE KAIKHE PAHPAH NI

Khovel bouruak in hoihlam nawt nawn lou mah a hidi ding a, hundang bang hileh loukhoh hun bang ahita ding hi. Himahleh tunitan in inlam a lou bawl Nu-le-Pate’ loukou theilou in a om uhi. Vuahtui lah deihbang in a zu zou kei a, nisa’ in khua a keu mahmah mai hi. Haichite’n chii hoih hon suang mah ding uh hiam chih ngaihtuah tham a ching mahmah mai hi. Nidang bang a khua hoih a, vuahtuite ahunhun a zu hile bel, tuhun khong loukhoh hun ahita hi. Lou a haichi kituhte, a diak a buhte’n chii hoih a hon suang theihna ding un akiim a loupate’ hihsiang angai a, tuate mah buaipih in i Pi-le-Pu, i Nu-le-pa te niteng in lou akuan zou hial uhi.

Haichite’n chii hoih a hon suang theihna ding ua akiim akiang hah angaih bang in mihingte nuntakna ah i hahzel ding uh, i kibawl hoihna ding uh leh i ki-etthak zel na ding uh a om hi. Tua tuh khelhna ahi. I piangthak zoh nung uh tua khelhna a kibual thei nawnlou i hi uh chih ahi pah kei hi. Khelhna atak a i va hihlat louh hang in, i lungsim ngaihtuahnate uah khelhna atam mahmah mai hi. Mit utna, sa utna lungsim leh mi i etdante uh Pathian a dia kihhuai tamtak a om nak hi. Ei mimal mahmah inle tua i thei lotham uhi, himahleh tuate hoihlou ahi chih theizen hina pi’n hiai utnate’ i kizou saksek uhi. Haichii tang himhim alian lua chih ding omlou hi, neu chikchik ahi ua tuate i tuh chiang un awlawl in amau khanlet di bang in hong khanlian uhi. Tua mah bang in akiang a loupa omte ahun taka akihahlouh chiang in hongtam deuhdeuh a haichi te hinna a sukha mahmah hi. Hiai haichi tang neuchik te leh akiang a loupate tuh mihingte khelhna toh a tehtheih mahmah hi’n kamu hi. A ziak bel khelhna i chihchiang in khelhna lianpi i va hih hiam, mi hon theihpihte vuak khelhna ahi kei hi. Khelhna i chihtuh thilneu chik a (I ngaihtuahna ua) hong kipan ahi a tuate bawl hoih sawm pahlou a, loupa hoihloute i bohkhiat mah bang ua i bohkhiat pah louh chiang un tua khelhnate hong piching in khelhna thupi taktak i hih nak uhi.

“Mihingte sunglam lungtang a kipan in, ngaihtuahna giloute a hongpawt nak hi: Kingaihna, guktakna, tualthahna, angkawmna leh enna, gitlouhna, khemhatna, bevenna, hazatna gensiatna, kisaktheihna leh, haihuainate ahi. Hiai thilgiloute tengteng sunglam a kipan a hongpawt a, mihing a hihnin nak hi” a chi hi. – Mark 7:21-23.

Chihleh bang chi bang a khelhna saltangna apan suahta theiding i hia? Amasa pen a ei a khelhna om ahi chih i theih uh a, khial mah i hi uh chih i kipom uh angai hi.  Loupa deih huailou te lakkhiat a paih ahi mah bang un, ei a khelhna omte i lakkhiat uh angai hi. Tua khelhnate thupha tawi a, kisikna leh tawpna na toh Toupa kiang a ngaihdam i et uh apoimoh hi. ‍“Khelhna ka neikei chi lehang eimah leh eimah i kikhem a, thutak eimah ah a omkei hi. ‍I khelhnate thupha i tawi leh, i khelhnate ngaidam ding leh i diktatlouhna tengteng silsiang ding in amah a muanhuai in a diktat hi.” – 1 Johan 1:8-9.

Khelhnate kisik a, hiai zaw hoihlou ahi ka Kha ading leh kataksa adia chi a thupha i tawi zoh chiang un tua bang a hon om sak theite apa’n i kihepmang ua, tuate i koihkhiat uh apoimoh hi. Hiaite koihkhe lou a lunggulhna lungsim i neihneih sungteng khelh utna, tua khelhna a puklut theihna i neithei lailai uhi. Mark ah i muh mah bang in, “Huan na khut in a hon hihpuk leh, tankhia in; melhem a hinna a lut nang ding in a hoihzaw, khut nih nei a gawtmun mei mittheilou a pai sang in, A than uh a sih louh a, meikuang mihlouhna ah. Na khe in a hon hihpuk leh, tankhia in, khe nih nei a gawtmun a paih a om sang in, khebai a hinna a lut nang ading in a hoihzaw hi.” – Mark 9:43-45.

Tulai in khelh utna lungsim neihtheihna atam mahmah hi. Nidang in bel Computer tungtawn khong apan khelh utna lungsim neih abaihlam zaw a himahleh tulai in tua bang vuak ahi nawn kei hi. Michih in i khut mahmah ua i tawi uh Mobile tungtawn in thilteng a omta hi. A buaihuai mahmah khat a theih leh tua bang lungsim neilou hina pi hiai khelhnate va muh abaihlam mahmah na tuh, Online a site tuamtuam na theih ngeilouh nava ette tung tawn bang, pop-up ads leh ads tuamtuam tua site sung aomte nava click khak tungtawn bang ahi thei hi. Hiai ads leh pop-up te nava click khak chiang in mundang ah a honpi ua tuate’n site hoih lou pipi ah ahon pilut thei uhi. Mobile tawi thei chiang te tuh laisiam pipi ngen le i hi ua, hiai site zaw hoihlou ahi chih theihtheihna i nei chiat uhi. Hiai bangte a i valut khak ahih taklele tua bang hun ah closed pahpah thei hileng lungsim sianglouhnate apa’n in i kivenbit thei zaw ding uhi. Social Media tuamtuamte leng i hazat mahmah uh a, hiai te tungtawn in lim hoihlou pipi muhding aomthei hi. Kuamah kihilhhilh ngai di zen a hiai bang a chia kidot chih le angai nawn kei a, i ut uleh thilteng i theithei ta uhi. Tua ahihziakin na thil hih, i thilhih, i muhte Toupa’ ading a siangthou hia? Amah mitmuh ah i omdan, i gamtatdante pomtak taktak ahina diam chih mahni a kivelchet leh ki-etchet apoimoh mahmah hi. I kiim-i-kiang ah siattheihna tampi lak a om i hi uh a, khatveivei tua khelhnate hon hip theiding a tam mahmah hi. Tua ahihziakin Toupa ompihna lou a eimah hatna a vualzoh i sawm le zaw denciang a zouzou mahmah lou ding i hi uh. Toupa toh ton gige apoimoh dan, Amah a kinga a i hunte atamthei pen Amah toh zatkhawm apoimoh dan, Laisiangthou simtam apoimoh dan leh thumna neih gige apoimoh dan hiai te tungtawn in i theithei hi.

Tuni’n simtute eimah hinkhua ki-en thak chiat in, ei ah kibawl hoihna ding omte kibawl hoih ni. Lou a loupa hoihloute kohkhiat a paih ahihmah bang un i hinna a khelhna  omte, hon suse thei omte lakhia in Toupa deihdan a hinkhua zang a, Amah ading a i hunte atamthei pen zang thei chiat ding in kisa thak chiat ni. Toupa toh hun zatkhawm nuam leh manpha hina e chithei gige ding leh, A thupina leh a ompihnate midangte kiang a gensawn mite hithei gige ding in simtute Toupa’n hon ompihin hon vualzawl chiat hen!

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

12th May, 2021 | Weekly-Inspiration – 71

Leave a Reply

× Direct Appointment