DAMSUNG SAWTNA LEH GIMTHUAKNA

Sam 90:10
Ka damsung kumte uh kum sawmsagih ahi a, hatna ziak in kum sawmgiat leng ahi thei hi; himahleh a sawtna tuh sepgimna leh lungngaihna lel ahi a; a mang pah a, kou leng ka leng mang zel uhi.

‘In the Now’ kichi Facebook page khat in a hon khahkhiak video khat kana mukha hi. Huai video ah, Japan a teekte/upalamte haksatna a hon taaklang uhi. Ka lungsim a khoihkha mahmah a, hiai i chaangtel ka lungsim ah hong suak hi.
Video tomchik a hon taaklatdan un, Japan ahihleh, Khovel a teeksia tamna pen ahi chi uhi. Khovel mundang a omte toh teh a Japanese-te damsawt zaw tham ahihdan khawng uh hon gen zel uhi. A damsawtna uh amau adia, i changteel in agen bang a ‘sepgimna leh lungngaihna lel’ petmah hi in hong kilang hi.
Japan a teeksia tamtakte amau kia a khosa hihtuak ahihman un, nek-leh-taak kaikhawm hi’n khosakna hitaleh, nep hetlou diing in i ngaihtuahsak thei hi; tangkhat kisakna (loneliness) genkha kei phot le’ng. Mahni kia a teeknung-vuainung a khosakna haksa tak mah zaw hidiing hiven, suangkulh (jail) a kikhum teelzaw bang hong pung hiaihiai in gen uhi. Suangkulh luuttheihna di’n daan toh kikalh gitlouhna (crime) tup leh ngim mawng in hih sek uhi. Teeksia ahih chiang un, daan toh kikalh a thupilua a hihzoh luat di uh omlou ahihna ah, lamsiik a dawr neu chikchikte khawng ah vante vagu sek uhi. Huchi in, Policete’n a hon man ngei ua, sorkar dan dungzui a thutankhum in hong om ua, suangkulh ah koih zel uhi.
Huaibang a suangkulh taangkha khat in a genna ah, “Jail ah nikhat in hiseelhuai taktak nek diing thumvei hon pia ua, mi kihoupih diing bang om uh ahihman in tangkhat kisakna leng kiam mahmah hi” chi hi. “Zaleena kimansuah mahleh, thildang a lungkhamna diing himhim omlou hi” chi pawl bang om ua, suangkulh tan teelzaw tel uhi.

Ngaihtuahna a hong suak ahihleh, hiai teeksete’n a hinkhua ua, a huntawplam uh huchi a zang ua, a sihnung ua a taangtawn hun uh koi ah a zang d’ua aw? Thukhenna Ni chiang a Pathian in diktak a vai hon hawm chiang in, taangtawn gawtmun/meidiil ah paih a om zomah lai diing bang omkha tham diing un ka ngaihtuah hi. Ngaihtuahna paisausak mah ni.

Huchi ahihlai in, Jesu Khrist’ hotdamna ana saangkha khempeuhte chu, teeklam leh hun nanunglam in haksatna leh gentheihna toh hinkhua  zang mahle uh, taangtawn nopsakna leh kipahna, thil sia leh gilou himhim omlouhna, gentheihna leh zawnna omlouhna, tangkhat kisakna leh chatvaihna omlouhna, khelhna leh thuakna omlouhna, natna leh sihna omlouhna, Pathian’ Kumpigam thupitak ah mun leh tan nei in, nunnuam in leengta diing uhi.

Mi hampha diak a ka koihte ahihleh, a teek nung ua leng navaak leh tawldam tak a, Bible khawng sim hiauhiau leh Pathianthu khawng mah suutna a hun tampi zangthei laite ahi uhi.

I damlai leh hatlai hunte mansuah lou leh mangthaisak mai lou in, Pathian thute leh Pathian hihnate suutna in zang leng eimah in nuam kisa diing hi. Mi khenkhat in a haatlai un zu, khamtheih, khovel nopsakna leh sa-utnate piibawl in cheen ek ua, a teeklam un Pathian/Sahkhua hon zong ua, a hong muh ualeh, “Aw ka haatlai a tua ka muh bang a Pathian ana mu hileng!” chi naak sek uhi. A dahhuaina chu, taksa hatlouh nung a Pathian muh chu, awlmohnate sepkhiaktheihna di’a tha neih nawn louh nung ahihman in, sepkhiak luat neithei nawn lou uhi. Poisakna tampi nei d’un ka gingta hi.

Damsung sawtna i gen lailai in, taangtawn sawt diingdan leng ngaihtuahna ana pe zek ni. Pathian tate i hihleh, taangtawn hun ah kipaaktak leh bukimtak a Pathian pahtawina hun kizangta diing hitel chih ka ngaihtuah chiang in ngaklahhuai sak toh lamdang sak ka thuah hi. Pathian’ lemgeeldan leh vaisaidante zaw a deihhuai pen, a uthuai pen leh a ngaaklahhuai pen thilte ana hisek uhi. Taangtawn gam i theihkhak ngei leng hilou, i muhkhak ngeileng hilou, Pathian in ginna a hon piak dungzui a, “om mah ahi” chithei a, lametna toh mailam a Pathian’ gamchiamlam zuan a paithei kihi chih bang lamdang leh thupi kasa mahmah hi. “Ginna tuh thil lamette om ngei a theihna, thil muhlouhte theihchetna ahi” chi’n Hebrute 11:1na in hon na hilh hi. A hong chiang kuau khat hong om hi: Abraham inleng, kizungkalhkhe zen a Pathian’ thu mang a, A gente gingta a kalsuan khiakpih mai ana hi ahi. Toupa’n Abraham ginna pen diktatna a A simsak bang in eite’n leng, i Toupa Jesu Khrist’ kipumpiakna, sihna leh thohnawnna a taktak in mukei mahleng, a taktak mah ahihlam  Laisiangthou in hon hilh a, Khasiangthou in hon gingtasak hi. Huai i gintatna (ginna) pen i diktatna a hon simsak ahihman in Pathian tung ah i lungdam lua hi. Halleluiah! Gingta lel hang a, huai ginna ziak a i muh ngeilouh leh i lamet Vaan Kanaan ei a ahi chithei i hitel uhi. Lamdang in thupi lua maw! Ginna hon pia Pathian ka phat ahi. Amah kia thupi in Amah kia bangkim tung ah Tungnung hi.

Upatlam manoh i hihman un, i teektan dam di’a Toupa’n hon seh leh, hunlui leh hinkhua paisa ngaihtuahkik hun hong tung zelzel diing hiven. huai hun chiang a, kisiikna tampi toh “Pathian ana zong/ ana phawkkha / Pathian adi’n ana kizangkha hileng zaw!” chihna a hun tamzaw beisak diing bang lauhhuai kasa petmah hi.
Khovel vai kia khawng gen diing neilelte zaw mi hehpihhuai mahmah hi un ka koih hi.

Teek-kuun hun a hong tun chiang a, tangkhat kisakna, phatuam nawnlou kisakna, kingaihsiatna, lungleenna, taksa bahna leh natnate’n hon tuam chiang a, poisakna toh i sihni manoh a hun i neihlai sun teng i zatkhak diing uh lauhhuai kasa mahmah hi. Tulel a tuailai, haatlai, damtheihna hoihlai, damlai, lungsim navaaklai, kalsuan theilaite’n i suanlamte uh koihkhe ni hang. I kiim-i kiang a eikhamtawk a suukkhak theih diing Pathian in hon bawlsakte hungaih ni. Thathak la ni. Pathian munailou te’n le’ng zong pan ni. Pathian om gingta nawnloute’n le’ng, Pathian tung a lungkimlouhna/hehna i neih ziak khawng hitaangpi ahihman in, hon genchiansak thei diing mi zong in panla thak ni.

Gingtu innsung leh khotaang a omkha leh piangkha i hihman un, Pathian muhna leh naihna remchangzaw di’a hunlem bawlsak i hihna uh mansuah lou hamham diing in i kichial hi.

Jakob 4:14
Zingchiang in bang hong om ding ahia chih na thei ngal kei ua. Na hinna uh bang ahia? Mei sawtlou kal a hong dawk a, mangnawn lel zel bangphet na hi ngal ua.

Jesu Khrist mitsuan di’n panla le’ng maw, lawmte!

-Chingngaihlian Tunglut

April 17, 2021/NH_21

(Laigelh toh kisai kupbeh nuam a omleh, +919892316430 ah laigelhtu thuzaak theih diing hi.)

Leave a Reply

× Direct Appointment