BIT KISAKLOUHNA APAN SUAHTAKNA

0

Niteng hunteng in tuak kei mah lehang, khatveivei thomhau kisakna leh bitlou kisakna khat i neih hun uh a hong om zel hi. Hiai bang a bitlou kisakna te’ tuh bang hiam i hinkhua ua i taksap uh a om ziak ana hi sek hi. Neulai in mial lak a ka om chiang in lauhna khat ka nei sek hi, mial lak a banghiam om ding khong a ngaihtuahna ki nei in khomial nuai a om ding bang aki lau sek hi. I honglet nung un hiai bang lauhthong na te om nawnlou in, tua te’ hong ki kheng a, lohsap ding lauhna, mite deihlou a om ding leh a nial a om ding lauhna te khong leh mi khat suak lou a mi dangte eng vungvung a om a, hinkhua haksatak a khosak khak ding lauh nate in a hong ki kheng zaw ta hi.

Mihing te’n i hinna ding ua poimoh i neichiat uh a, tua te lak a i poimoh pen uh tuh i niteng poimohte uh nekding, silhding leh dawnding khong ahi hi. Khopi khenkhat ah omte’n bel i theiban kei maithei ua, khosakna haksatak a khosa a om, niteng nektawm ding ngaihtuah a om mi tamtak a om hi. Amau te’ haksatna tuh nek ding maimai muhlouh ding lau in, gilkial dangtak a om ding a lau mahmah uhi. Ei te’ bel tua bang zen in i om nawn kei uh a, Toupa min i phat ahi. Toupa vualzawlna ziak a nek ding te a lungkham a om ta dih lou phot i hih ziak un i kipak hi. Huchi ahih lai in hiai te ah lungmuang na khat nei mah le hang hiai te khen ah bitlou i kisakna uh, i lungnop theih louh na uh a om teitei hi. Tua te tuh mi kua hiam hih ding, dinmun khat nei a om ding leh mite’ theihphak na ding a bang hiam pilna siamna sang taktak neih ding chi in sum-le-pai, neih-le-lam te mah delh in lungmuang na taktak i nei thei kei uhi. Ei deihtelna leh i pil i siamte uh suang a hiai bang te i delh lai un, Toupa’ ah tuate om vek a, Amah ah tua te i nei thei vek hi.

“…Nam tengteng ka sing ding a, huchi in nam tengteng thildeihte a hongtung ding, huchi in hiai inn thupina in ka dimsak ding, sepaihte Toupa’n a chi. Dangka kei a ahi, dangkaeng kei a ahi, sepaihte Toupa’n a chi.” – Haggai 2:7-8.

Bangkim i taksapte uh, i poimohte uleh bitlouh i kisakna teng uh Amah Toupa’n a thei vek hi. Amah ah tuate a om a, Amah Jesu ah tua te i nei thei hi. I poimoh te uh hon theisuak pa vuak ahi kei a, thil bangkim siamtu, Amah khut a siam i hi zaw uhi. Toupa deihdan in om photphot leng Aman tua i buainate ua pan hon hunkhe ding a, alampi ding hon bawl sak ding hi. Ei te’ buaina lian pen ahihleh Toupa a i lametna te uh nga masa lou in, midangte tung ah i nga zaw nak uhi. Tua vuak hilou in i van neih te ua i ki nga lua ua, tuate’n i lungsim uh aluah zaw hi. Sum deih nate, inn hoih pipi te, dinmun poimoh te leh tulai a uang mahmah mobile leh social media tuamtuam te’n i lungsim uh hon la hi. Tuailai tamzaw te’ lah nungak ding leh tangval ding thu ah i buai mun mahmah nawn uhi. Hiai bang a i om ziak un lauhthongna, bitlouh kisakna te i neisek uhi. Toupa kiang a ngenngen hina pi, i ngetna te uh muang zoulou a eimah utna leh deihtelna a i om zel chiang un ei le ei haksatna i ki guang uh a, ki lungmuang zoulou ki hi zaw uhi.

Lungmuanna leh bubitna taktak tuh lampi khat kia ah a om hi. Tua lampi tuh Jesu kia ah aom hi. Amah ah bangkim nga in, Amah a muang ni. Bit kisaklouhna te apan i suahtak theihna tuh Jesu ang sung kia ah ahi zaw hi. Mihing deihtelnate ah lametna om zel sam mah leh tuate’n sawt a daih kei a, atawpna ah lungkhamna leh mangbatna a hon tung nak hi. Toupa’n ei adia hoih zaw ding thei ahih ziakin Amah ah ki nga peuh mahleng hiai in lungmuanna leh kipahna a hon pia zaw ding hi. Khovel leh mite et ah lohsam leh vuallel kisa in om mah le hang, ei ah kipahna thuguk leh lungnopna khovel leh mihingte’n a hon piak theihlouh uh i nei thei ding hi. I vaikhempeuh, i-sep-i-bawl khempeuh uh Toupa Min thupi na ding a hih a, Toupa ompihnate phawk gige a, Amah a ki nga zou gige ding in kisa chiat ni.

“….Toupa tung ah leng kipak in; huchi in na lungtang deihlamte a honpe ding hi.” – Sam 37:4

Toupa’n simtute hon ompihin hon vualzawl chiat hen! Amen.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 30th  Decmber, 2020 | Weekly-Inspiration – 52)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment