Belaam khat kum 6 vingveng a mang nung in muhkik in ana om hi. Kum 6 sung tak a mul kiat louh ahihziak in ana khangkhang hi. A mul buk gawp ahihman in, niinneng amul a baang teng toh gik petmah a, amah gik zah toh kibang phial hi chi uhi. Hiai belam in kum 6 sung a mul khan ziak a a taksa put gik behlap sak a ana puak kutkut pen a pu’n minute 20 lel sung in kiat khiak sak hi. A navaak huai diingdan i suangtuah thei mai di’n i gingta hi.

Huai belaam sawtpitak a mang dan a, eite leng, i Belampu- Jesu Khrist lak a kipat a ina mang sung in puakgik tampi ina kigot zel hi. huaibang a puakgik i na kigot ahihkeileh got a i omte pen hun tamlou chik in i Belampu in hon zonmuh chiang in, hon hawkkhiak sakthei ahihlam ei leh ei i kihilh angaih leh le kihilh ni. Ama kiang kan a i lungkimna dang omtuan mahmah lou ahihman in. Khovel a thilte (mihing dangte, sum leh pai, hihna leh thuneihna, taksa damna leh nopsakna leh adangadangte) ah lungkimna zong in mang sek mahle’ng le, Amah mah zaw ana hi gige hi i ngaih uh maw! Amah ngailua i hihlam kithei lou in, ei a hawm hukna di hiam ahihkeileh a bukimlou ompen bukimsakna di’n khovel thilte leh mite ah lametna nei in zon i nei ua hiven.

Amah ahi i bukimna diing chih i hon theih chiang in, A iitna lamdang in Amah lam a hon hiip tuntun ahi chih i hon theita uhi, Amah ki ngai petmah, lah Amah naih didan bang theizou nawnlou a leng omtheih tham hi. Huai belaam mang a mul a sahgop ziak in amah adia poi hik leh niin, leh natna hik khenkhat leng amul sah ziak in ana paai hi.
Tu lel dinmun a mahni leh mahni ki ning hiam thilteng ning kitel leh kipahna di leh kipahdi ziak theilou bang omkha i om leh, panpihna zon pen poi sa kei ni. I tangtawn hun pen Meidil a i zat di ngaihngam huai mahmah lou hiveh aw.

Pathian in miteng Vanggam a lut di deih ahih man in, a gaal ah hon sap thoh lou in, hiai leimun mah ah, Tangtawn Hinna lampi hong kawkmuh ding in Amah mah hong kuan hi. I sapum haksatnate leh hatlouhnate Amah mah in hong thuak in, Tangtawn Hinna Lampi zuih ding daan Amah mah in hon na hilh hi. I tenna mun leitung a, ei mimal tuahte tuak a, ei mimal thuak leh sih taang a hong thuak leh si ahih lam i ki phawksak thak apoimoh zahzah vei ki phawksak ni.

Ama lam mah naih le hang, eimah Damna leh Lungkimna mah ana hi hi. Huai di a mi a hon panpih thei dite panpihna i nget le poisak di hilou ahi. I gammang sawt leh i puakgik tam deuhdeuh himai. I puakgik te hawkkhiak na dia le hun chu lut zek sek mah le ahi. I kik baih leh hawkkhiak di tawm kia hilou, a hawkkhiakna di hun le lut tawm. Huai daan a, i kik baih leh i natna te damna dia hun le lut tawm himai hi.
I kiphelh khiak di, i suah khiak di om gige ahih man in, phelkhia in sut khe zel ni.

Toupa ngai a, Amah zuan utte, Amah zuan lel te hi’n Amah toh ton lelte hita leh, i poimoh bangchiat uh Amah lam ah hon pii nai semsem chiat ta hen, Jesu Khris min in… AMEN.

Bible Reference: Johan 10:11 ; Sam 42:1&2 ; Mathai 11:28 ; Jakob 5:16 ; Hebrute 4:14-16; 1 Timothy 2:4

 

– Chingngaihlian Tunglut

September 5, 2019/Article No. 02

(Laigelh toh kisai kupbeh nuam a omleh, laigelhtu +919892316430 ah thuzaak theih diing hi)

Leave a Reply

× Direct Appointment