Tulai khovel dinmun i thei chiat ua, koi mun peuh ah buaina, natna leh sihnate’n munteng aluah ta hi. Thuthang (news) i etmun leh kilchih ah buaina ngen, sihna koi mun peuh a om ahih dan i theithei hi. Khatveivei bang thuthang tuamtuam va et-tam luat in i ngaihtuahna hon thomhau sak zou adiam ka chih hun a om hi. Hiai bang thute bildoh a i simsim bang in I Khalam a ding Laisiangthou thute mah buaipih zaw leng ki bit ding a, i ngaihtuahna leng nuam in thoveng ding hi.
Awle Pathian bangkim tung a thunei Pa’n, bang ziaka hiai bang haksatna i tung a om sak adiam? Hichi bang hun haksa i tuah chiang a bang ziaka dai dide ade aw? Bang ziaka a aw za thei pahpah lou i diam? Hiai bang dotna te ei mahmah in i maituah ahih kei lehleng midang tungtawn a pat i zaktak ka lam-en hi. A hihleh hiai bang dawngna pe ding hileng, hiaite tu pianken apat leitung a siatna ana omsa, aki bang miteng in i maituah uh ahi chi mawkleng Laisiangthou thu toh aki tuak diam? Tua ding a Laisiangthou thu toh saulou i theih dandan a kikup sawm ihi.
Gingtu khat i hihna ah hichi bang dotna te a dawngna ding toh mansa a i om a poimoh hi. I ginna bang a chih’ midang te’n ei apat amuh ua, a hon chep theih ding ua i om apoimoh mahmah khat ahi. Tunia i kikup utpen ei mimal ngaihtuah na a adawngna piak theih chii thil ahi kei hi, Laisiangthou pansan a Genesis thu hoihtak a i theihchet a poimoh mahmah hi. Genesis i sim a, i theih bang in Pathian in khovel a siam in hoih asa mahmah hi. Khovel luah dim dingin mihingte Amah ki batpih in a hon bawl hi. Kipaktak leh nuamtak a om ding lai mihingte thumanglouhna ziak in leitung tuh hamsiat in hong om a, sihna, haksatna te i maituah ding mah uh ahih dan Genesis 3 na ah i mu hi. Hiai ziak in i tung a thil hongtung peuh mah a ziak (reason) om a na hi zaw hi. Pianken (natural) a hong om hilou ahih dan chiangtak in hiai ah i theithei hi.
“Adam kiang ah, “Na zi thu na man a, singgah na ne ding ahi kei, chi a, k’on thupiak na nek ziak in leitung nang ziak in hamsiat in a omta hi. Na damsung teng in gimtak a sem in a gah na neta ding hi.” – Genesis 3:7
“Thilsiam tengteng tutan in thum leh nauvei na thuak in a om uh chih i thei ngal uhi.” – Romte 8:22
Hiai bang thil ituah te tungtawn a i zilding tampi om hi. Sihna i tung a hongtung teitei ding ahi a, hiai in khovel a omden ding ihih louhdan hon thei sak thakthak hi. Sih Khamuan na nei a, Toupa tuak ding a mansa a i om a poimoh hi. I khelhnate kisiklou a, i ut i deihte i hih lailai leh denchiang in hong kikhel pen mah ding hi.
“Huan Siloam insang in mi sawmlehgiat a delhlupte leng Jerusalem khua a om tengteng sang in migilou zaw hi un na gingta ua hia? Hilou e, k’on hilh ahi, nou leng na kisik kei uleh huchibang mah in na mangthang vek ding uh” a chi a, a dawng hi.” – Matthai 13:4-5
Mihingte thumang lou in, i ut dandan in om mah leng Pathian tapa Jesu Khris tungtawn in hotdamna bukim i tang thei uhi. Hiai kankan a hamphathuai khovel ah om lou leh om ngei nolou ding tangthupha/thulamdang kipahhuai ahih dan i theih thakthak uh a hoih hi.
“Kawlgit nih dal dangka khat in a zuakzel uh hilou hiam? Himahleh a lak ua khat leng na Pa uh theihlouh in lei ah a ke kei ding hi” – Matthai 10:29
Pathian in kawlgit neucik te hicia a awlmoh leh mihingte bang chituk in hon khotuah in hon awlmoh dia, kipahhuai lua hilou maw? “…lau kei un; kawlgit tampi sang in na manpha zaw uhi.” – Matthai 10:31b. I hinna tuimel bang mai a thengpah ding ahi a, sihna om taktak ahih dan i phok thakthak hoih hi. Denchiang mahmah a sithei, zing chiang, khanawn ale sithei ihih dan i theih poimoh hi.
“Aw, pil le uh hiaite a theisiam ding ua, a tunung thu uh ngaihtuah ding hive un!..” – Diuteronomy 32:29.
“Zingchiang a bang hongom ding ahia chih nathei kei uhi. Na hinna uh bang ahia? Mei sawtlou kal a hongdawk a, mangnawn lel bang na hi uhi.” Jakob 4:14
Tua thupukna i lak pen a tawpna hi kha thei hi. Sihna in hon ngak ahi chih manghilh kei ni. “Huai mah bang in mihing a lum a a thoukei hi: vante a om nawnlouh matan, a khanglou kei ding uh, a ihmu uh leng a halh khe sam kei ding uhi.” – Job 14:12. I sihchiang a thoukik thei nolou ding i hih ziakin tu a hun a omlai in Toupa kiang zuan ni maw.
I thugelhte apat iki theihchian semsem na ding in Luke 13 na sim chiat dingin iki ngen hi. Simtute tengteng Toupa’n i thugelh te tungtawn in theihsiamna hon pia in hon vualzawl chiat hen.
– Thangginom Hangshing