Lunghimohna, lungkhamna leh dahna chihte tuh i pumpelh theihlouh uh leh avangkim a i tuah uh ahi mawk hi. Hiaibang i tuah chiang un, akhenchiah haksa law lou in i mualsuah thei ua, akhenchiang in lah, paw lah in i gimpih petmah uhi. Mi’n haksatna atuah chiang un, a omdante uh bang, “amah zaw uang deuh hi”, “haksatna enle i tuak thou vele” chih khawng kamteh in i na nei sek uhi. Ei tung a haksatna a hong tun chiang inlah, midangteng a sang a puaklah huaizaw leh naazaw hileh kilawm in i omzel uhi. Hiai in bang hon hilh a i chihleh lunghimohna, lungkhamna leh dahnate zaw thil houchik ana hilou hial ahi chih hon theisak mahmah mai hi. Mihing kibang kimlou i hihziak un hiai bang hunte ah mahni a thuaksiamna kipethei leh mahni a ana kikemdamthei i om uh a, khenkhatte’n lah puak siam mahmah lou leh paw lah mahmah in i om uhi. Huaiziak in, tua bang a haksatna paw dam theilou leh paw zoulou i omleh, www.theabundantlife.in hon thuzaak pah di’n i kingen hi. Hiai a houlimna ahihleh, I Laisiangthou pansan a houlimna ahi a, thuguuk leh min chihte kikembit hi. Hiaibang haksatna ei tung mah a leng hong tungthei ahihziak in, i phuutkhak chiang in panpihna nget poisakei ni. www.theabundantlife.in hon thuzaak pah diing in i kingen thakthak ahi.
Lunghimoh chih kammal i genchiang in bang pen i lungsim ah ahong lang masa a? A tamzawte lungsim ah bel i ngaihtuah mundeuh uh hiam, haksa i tuah mundeuhte ua pan lungkhamna i neihte uh hong om masa hi. I tuahdan uleh i tuahte uh a kibat louh ziakin kilunghimohna, lungkhamna chihte zaw khatvei a genkim zoh ding ahi kei hi.
I Laisiangthou ua lunghimohna kammal tanchinhoih laibute a Jesu’n hon sinsakna ahleng i muthei hi. Matthai 6:25-34; Luke 2:22-31 ah, “Bang ahia ka nekding, bang ahia ka dawn ding, chi in, na hinna thu uh leh, bang ahia ka silh ding, bang ahia ka ten ding, chi in na sapum thu uh lunghimoh kei un. Nekding sang in hinna a thupizaw ka hia? Silhlehten sang in sapum leng a thupizaw ka hia? Tungleng vasate en un; buh a tuh kei uh, a at kei uh, buh in ah leng a seklut sam kei uh. Himahleh na Pa uh van a om in amau a vak hi. Noute amau sang a nakpitak a manpha zaw hilou na hi umaw?”
Phillippite laibu ahleng hiai bang in i mu hi, “Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh Pathian kiang ah theihsak in om hen” 4:6-7.
Hiaite apan chiangtak a i muhtheih ahihleh dahna, lungzinna, mangbatna, lunghimohna leh lunggimna chihte khong i hinkhua ua i buaipih pen uh ahihlouh ding ana hi hi. Pathian inle tua bang a om ding in a hon deih kei chih chiangtakin i mu hi. Bangmah lunghimoh louhding chih mawk thil om thei ding mah adiam? I nekzonna ding? I laisimna ding? I damtheihna? leh I iit-i-ngaihte? lunghimohna himhim neilou ding mah i diam?
Hiai bang thilte’n awlmohna ziakin a sepsuahlam leh kisai khakna a hon tut ding ahi zaw hi. Lunghimohna kichi leh nnasep khiat chih a kikhe mahmah mai hi. Lunghimohna in ahoihlam sang in a hoihlou lam, aselam a thil ngaihtuahna a honpe ut mahmah hi. Lunghimoh ding i hauhluat chiang un i lungsim uh abah a, tua in i taksa uleh i damtheihna tanpha uh ahon sukha hi.
Bang chi bang a tua lunghimohnate apa’n suakta a, Pathian a muanna neithei ding i hia? Sawltak Paul in tua bang lunghimohna te’n thil hoih hontung lou ahi chih theilua ahi aman in bangmahlou a mangbang lou dingin a hon deih kei hi. Mangbatna ichi hiam lunghimohnate’n i hunte uh mahmah bangleng atam zaw hon laksak hi, thil phatuam loudi suangtuahtuahna, lah sepsuah ding hilou in aselam ngaihtuahna a hon piangsak ut mahmah hi.
I tangtel te lak a Phillippite laibu a i sim mah bang in, “thil bangkim ah thumna ngetna leh kipahthugenna” tuh amanpha penpen ahi hi. Toupa kiang ah thum gige hileng hiai lunghimohnate apa’n suahtak theihna, lungsimnopna i neithei ding ua, tuate’n ngaihtuahna siang, Amah a lametna leh gingtakna ahon guan ding hi. Huchilou a mahni ngaihtuahnate zang a thil i lunghimoh sek chiang un kipahna, maitaina leh lungmuanna taktak om theilou ahi zaw hi. I lungkhamnate uleh i mangbatnate uh Toupa kiang ah thumna in lan khe gige leng lungmuanna i nei zaw ding uhi.
“Huan noute lak ah lunghihmawh ziak a kuan ahia amah dunglam tong khat a hihsang tuan thei?” – Matthai 6:27. I hondampa Jesu mahmah inleng lunghimohna in bang pi hon tut louhdan, thilphatuam lou ahihdan ahon sinsak hi. Lunghimohna in i hinna uh dakkal khatlel leng ahon behlap thei keihi. A lauh huai mahmah tuh lunghimohna atam luat chiangin lungsim lam mahmah bangleng hon hetkha ahihziakin ihmuttheihlouhna bang, BP sang leh atuamtuam ahon tungthei zomah hi. Tua ahihziakin lunghimohnate’n siatna ei a hontung thei ahih man in, tua bang lunghimohna i neihte uh thumna a Toupa khut ah nga leng lungmuan theihna i nei zaw ding uhi.
A poi mahmah khat ahihleh lunghimohna hauh luatna tuh Pathian a ginglahna i neih sek ziak uhleng ahi tangpi hi. Pathian i muang ding bang ua muang zoulou i hih ziak un hiai in bangkim a lungmuan theihlouhna, lunghimohna a dimna ahon tung hi. Tuni’n ah bang ahia i lunghimoh sek, bangziak a lunghimoh i hia? I lunghimohte’n bang ahon pia a chihte ngaihtuah a nei in tuate Toupa khut a kemsak zaw ni. Pathian ah muanna nei in, Amah a i mangbatnate uh nga in thumna atam thei pen nei gige ni.
“Kha Siangthou thilhihtheihna ziak a lametna na hauh theihna ding un, lametna Pathian, na gintak ziak un, kipahna leh kituahna chiteng in honhih dim hen.” – Romte 15:13.
Toupa’n simtute hon ompihin hon vualzawl chiat hen!
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; theihna bukim louh ziak a i gen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
19th May, 2021 | Weekly-Inspiration – 72