BANGKIM A KIPAHNA

Thumapii:

Lungsim hon hihnuam, i phattuam pih leh lawk pih thil i muh leh i tankhak chiang in kipaak ihi i kichi sek hi.
Khovel in thil hoih hon piakte a kipat lungput i neih sek pen kipahna ahi chi mahleng, gui tunglou ahih chih mi tamzaw te’n i chian uhi. Lungsung tawng apat suak kipahna pen kipahna diktak ahi i chi thei a, deih mahmah lengle khovel in hon pe thei lou ahi chih leng theihna chiang i nei uhi.
Huai kipahna i lunggulh mahmah, kipahna diktak ahihleh, Toupa a kipahna i muh pen ahi a, khovel thil a i muh ahihlouh ziak mahtak in khovel thil hoihlou te’n hon deng chiang inleng bei tuanlou hi. Huchibang kipahna ahi ei Khristiante’n i zon a, i delh diing a poimoh (Philippite 4:4 ; 1 Thessalonikate 5:16). Huchibang kipahna in hatna leng hon guan hi (Nehemiah 8:10). Huchibang kipahna in Khristian i hihna ei mah kitheihdan hi’n mite hon muhdan hitaleh kilangkhe sak hi (Galatiate 5:22-23). 
Dinmun hoih chiang a kipak pah a, dinmun siat chiang a dah pah a, hehna in a zuih ngal sek pen khovel thil a iki ngak luat ziak hisek hi. Khovel a i dinmun pen kikhek zel ahihziak in, i kipahna dia khovel thilte a kinga i hihleh, daihsawtlou diing chihna ahi.

 

Bangkim a kipah chihmawk thil hithei adiam?:
Kipahna i chih, i dinmun a hoihlouh chiang a le kipahtheih taktak mah ana hi diam? Dinmun dungzui hizaw lou a, ahi bangbang a bangkim a kipahna neih theih taktak mah adiam?
Khovel omdan i na ngeinasehsa teng khek danglamtu, a huphurhhuai Covid-19 hiam ahihkeileh cancer hiam, sihna hiam ziak in, ‘Toupa ka kipaak’ i chi thei diam, i chi ngam diam?
1 Thessalonikate 5:18 ah, ‘Bangkim ah kipahthu gen gige un; huai tuh noumau lam thu ah Khrist Jesu ah Pathian deihlam ahi ngal a’ chih i mu hi. Huaidan i Laisiangthou in hon sinsak ahihziak in, Toupa Jesu i hondampa leh Kumpi a sang ihih a leh, Pathian deihlam i hih ngai a, huaite lak a khat ahihleh bangkim a kipahthu gen ahi. Jesu Khrist in A ma a om kipahna ziak in Khros ah zahlaakna A thuak ngit-nget chih Hebrute 12:2 ah i mu hi. I hondampa nungzui diing chi i hihleh zaw, en leng i ma a om kipahna ziak in Khros’ zahlaakna i thuak sam poimoh chihna himai lou hiam?
Laisiangthou hon sinsak kipahna zaw, khovel thilte, khovel a i dinmun dungzui leh mihing suangtuahdan ana hi mahmah lou hi. TOUPA a kipahna zaw, sunggil a kipahna ahi a, khovel theihdan a kipahna, a pawlawng a sawt daihlou a kipahna pen hilou hial hi.

 

Thil hoihloute ziak a kipahtheih adiam?:
Covid-19 tungtawn a Pathian hoihna mu leh a thuumna uh dawn a om tamkhop i omdu’n ka gingta hi. Amaute’n Covid 19 ziak in Pathian kiang ah kipahthu gen diing uhi.
Mi khenkhat a di’n huchi mah leh, mi tamzawte adi’n haksatna leh mangbatna tampi tun hi.
CoVID 19 sese lou, cancer hiam, sihna leh tuahsiatna damsung daih ding a liamna hiam te ziak in Toupa ka kipaak chithei chet kei mah le’ng le, huaite ziak a Athupina tampi hon musak a, thil hoih tampi sepsuahna dia zang zel ahi chih i theih ziak in kipahthu i gen thei thouthou hi.
I kiim kiang a natna hiileng vei leh agau ziak a thuak tampi om vengvung lak a Toupa’n ei hon kembit ahihleh, kipahthu i gengen ding ahi. Huchia kepbit a om i hihleh, i muh leh zaak tampite enliam mai lou a banghiam khat leh nih hihtheih i neihte i hih diing ahi. Hiai hiipi ziak a thuak tampite panpih vek theikei mahleng, i panpih phakte panpih in, i thumpih theihte thumpih ni. Toupa’n panpihna pethei ding a hon vualzawl ziak a kipahthu i gen toh kiton in, taaksap neite a dia vualzawlna hi diing in pan la ni.
A thuakkhate adi’n leng, haksatna, dahna leh sunna tungtawn in Pathian iitna, hehpihna leh vualzawlna muhna hi diing in Toupa’n lemgelsak zel hi. I haksat hun a panpihtu leh awlmohtu diing hon petu Toupa ahihziak in i kipahna di om thouthou hi. Mite iitna, thuumna, thilpiak leh lam chituamtuam a panpihna i poimoh dungzui a hon musak Toupa mah ahiziak in, thupilua hi…. kipahthu gen ni.
Buaina, haksatna leh damlouhnate innsung a tuakkha lou i om hetkei uhi. Hichibang hun haksa a Pathian hoihna leh vualzawlna i don tuk un hun dang ah ki dong ngeilou hi. Haksat hun a Pathian iitna leh khotuahna let zen a i muhte ngaihtuahkhe lou leh mukhalou khawvel ah mi tampi om mah le uh, ei gingtute’n bel a thuah a huchibang vualzawlna i muh hun uh ahihziak in, Pathian i phat ahi.

 

Pathian nnasep huhtu di’n pang ni:
‘Pathian in bangziak a hichibang gentheihna a tun phal ade aw?’ i chih sang in, ‘Pathian in hiai natna hileng lak ah kei tungtawn in bang a sem mah de aw?’ chi thei zaw leng manpha law diing hi. Pathian in haksatna hong tun A phal ahihziakin, huchilak mah ah leng A nnasep pai thouthou hi. Hiai natna ziak a buaina tuamtuam i tuahte uh buaipih mahleng, hiai natna lak a Pathian in nna asepna ah ahuhtu a pan diing buaipih zaw ni (1 Korinthte 3:9).
Pathian nnasep khawmpihte hihkhak diing bang zaw kipahhuai lua hiveh aw maw!
Ei tanhoih ziak a midangte tansiatna ngainep thei kihilou hi. I tan se vek leh, a kikem a kihuai tuah diing ki-om lou dia, tang hoih vek chih lah ‘kiaksiatna khovel’ ah omtheilou zel ahihziak in, i tan khempeuh ah Toupa hoihna leh Thupina i muh diing kisam chih om tuanlou hi. Apoimoh mahmah chu, tanhoih tang i hih leh, panpihngaite panpihtu diing a seh a om i hi chihna ahi a, i batphaakna tantan ah thilhoih hop khen diing i neihte sim chip lou in i khut zankhe ni. Mite a dia vualzawlna hihna pen eimah a diing a vualzawlna ahihlam phawkthak ni (Nasepte 20:35 ; Luke 6:38). Piakna hi’n muhna hitaleh, leh, anih tuak a Pathian thupina kilatna diing a kipaaktak a i dinmun pom a semkhia i hihleh, Toupa nnasep huhtu a pangkha chihna i hi a, manpha lua hi.

 

Hunbi nuamlou himahleh hunbi manpha ahi:
Tu hunbi a Innkuan a hun tampi zangkhawm sauhsauh theite adi’n, hundang a huchibang hun om khollou ahihziak in, hun manpha suak hi. Hundang hileh i sinkhaklouh diing thil tampi hiai hiileng tungtawn in kisin thak hi. Biakinnte ah biakna neikhawmthei kei mah le’ng, online in thugen leh thugelh tampi ngaih senlouh leh sim senlouh piak in ki-om hi. Toupa’n i Khalam ann diuh giautau a hon koihlou ahihlam chiang mahmah hi. Online a thugenna leh biakpiakna, thugelh leh phatna Laa-te tungtawn in Hehnemtu leh Hehpihtu Pathian A hihna leh hon taisan lou ahihlam hiai hunbi haksa ah mi tampite’n chian uhi (2 Korinthte 1:3 ; Sam 23:4). Haatna leh khamuanna lamdangtak mai, ei-le-ei i kipiak theih louh, Toupa’n hon pe lai hi (Philippians 4:7 ; Isai 40:31). Jesu’n, a nungzuite(eite) adi’n haksatna-bei hinkhua leh dinmun hon chiam lou a, Amah a i kingak poimoh ahihlam hon theisak zaw hi (John 16:33). Toupa’n hon taisan ngeilou hi chih chiamteh ni (Matthai 28:20). Haksatna hon laakkhiaksak kei lehleng haksatna mun leh hunbi ah Ama’n hon ompih a hon pii ahihziak in, nuam ni (1Thessalonikate 5:16). Nuam gige a i omtheihna di’n leh bangkim a kipahthu i gentheihna di’n tawplou in thuum ni (Thessalonika 5:17). Tawplou a thuum i chih chiang in, thil dang bangmah hihlou zen a, asuun-azaan a khupboh a maimit si a Toupa kiang a thumna neih gige chih hi sese lou hi. Tawplou a thuumna ahihleh, Pathian’ Ta ihihlam kiphawk a, Jesu khrist’ sisan a tatsa ihihlam kitheichian tak leh khongeingai taka Pathian biakna hinkhua zat chihna ahi zaw hi. Amah toh atuam in hun zat bikhiah i neihte genlouh in, tup-le-ngiim kichiantak nei a lungsim leh kha a Amah toh i kizopna phawk gige kawm a Khasiangthou piina zui a hinkhua zat ahizaw hi.

 

Hunhaksa a eikia a thuak teitei ngailou hi:
Tu hunbi bang a hun chiangkuang lou takmai i tuah chiang in, ei utleh-utlouh thil leng hisamlou in salam, lungsimlam leh khalam ah bahna kituak thei hi. Hichibang hun in kingaisia, lungkia, patau, mangbang leh thangpai in omkhak theih hi. Huchia i omkhak leh i lawmte hon panpihthei dia i muante hiam ahihkeileh huchidan a hon panpihthei diing i theihngeite va thuzaak a va houpih poi sa kei ni. Gingtute eikia a pha kuamah ki-omlou hi. I dahni inleng ei hon khotuahte kiang khawng ah i dahnate i genkhiak leh kizaang tuam mahmah hi (Galatiate 6:2). Hon ngaikhia a khat leh nih hon genpih thei a, hon thuumsakthei dite kiang ahihzomah leh, i dinmun kikhek zok kei lehleng Toupa akipat khamuanna kingah thak zel hi (Philippite 4:7). I dahnate mi hilh haksa kisa mahleh, i kipahna mi i hilh diing nuam kisa deuh hi.
Dahna hi’n kipahna hitaleh, Khawvel ahaksa leh anuam kithuah ahihziak in, gingtute thil i ki koppih tuahna ah bangkim nuam tuam diing ahihlam Toupa’n thei ahihziak in, huai diing in thupiak leng hon notsiat hi (Galatiate 5:14 ; Romte 12:10&15). Hiai hunbi ah Toupa’n eimah ngei ah leh i kikoppihte tungtawn leh amau toh i kichimatna ah leng sep diing nei ahihman in, i lungsim a hong om mi a om leh, thuzaak teitei ni.
Kei ngei inleng hun haksa ka tuah chiang in ka lungsim a mi hong kilang omsek a, amaute kiang a ka haksatna hi’n ka kipahna ka koppih chiang in nuam tuam law mahmah hi. Thumna leh kihoulimnate tungtawn in Toupa’n amaute zang in hon khamuan thak in thil hon phawkkhesak thak zel a, tha leng kila thak thei zel hi.
(1 Thessalonikate 5:11 ; Hebrute 10:24-25 ; Johan13:34)
Khasiangthou in i hihdiingdan i khawphawkna, i phawkna leh suangtuahna zang a hon hilh zel ahihziakin, i haksat chiang in i lungsim a mi hong kilat leh amaute va houpih poisakei ni (Isai 11:2 ; Johan 14:26). Toupa’n hon piina i zuihna ah kipahna om gige ahi chih leng theisiam ni .
Toupa ah bangchi kipah di ahia leh?:
Philippite 4:4 ah Sawltaak Paul in, ‘Toupa ah kipak gige un: ka chi nawn ding hi kipak un,’ ana chi hi. Paul in Philippite kianga a laikhak Rome a suangkulh a tanna a kipat a agelh ahi chi’n Laisiangthou suute’n gen uhi. A khovel dinmun ziak a kipaak diing hileh, amah leng kipaak hetlou diing hi. Himahleh, ama’n kipahna diing tampi muthei hi; Philippite’n amah a dia a thuumsaknate uh leh panpihna thil a khaakte uah kipaak petmah ahihlam khawng gen a, aangmasialtak a Jesu Khrist’ thu gente leng Jesu Khrist’ thu mah gen ahihziak un kipaak thouthou ahihlam khawng leng gentel hi. ‘Kei hon enton un’ chi sek pa’n, Toupa ah kipaak gige diing in Philippite deihsak petmah ahihlam thukhak hi. Toupa Jesu Khrist’ tanchinhoih ziak a atuah teng lungkimtaka pomthei ahihlam leng gen hi. Amah kipahna khovel thil ahihlouhziakin, ‘kipaak un’ a chihna leng khovel thilte hilou a, ‘Jesu Khrist ah’ (Khalam thilte) chi se hi.
Eite adi’n leng, khovel in kipahna hon piak theih khovel a i dinmun leh thilte a kipat ahihleh, guitung ngeilou diing hi. Taangtawn Toupa a kipahna neih zaw, a mangthai diing khovel in a puakkhiakte hi hetlou ahihziak mahtak in, taangtawn daih hi.
Chiamteh tham ching ahihleh, Toupa a kipah i chih chiang in Amah hihna tektek leh nna A sepsate, A seplelte leh A seplai diingte mitsuan a kipahna chihna ahi.

 

Habakuk 3:17-18 ah hichi’n a na gen hi:
[17] Theipi kung pak pha kei in, grep guite ah a gah omlou in; oliv sepgimna vuaksuak in, loute’n nekding piangsak lou in; a huang a kipan ganhonte satkhiak a om in, huangsung ah ganta omte kei mahleh;
[18]Huchi’n leng TOUPA ah ka kipak ding, ka hotdamna Pathian ah ka nuam ding hi.
Hiai Bible chang nih a chian tak a i muh theih ahihleh, khawvel thil lam a hamphatna leh hauhna gentaklouh in, niteng hinkhua a dia poimohte natawm neilou a leng Toupa ah kipah diing chih ahi. ‘Kipahna diing neilou’ i kichih chiang inleng Toupa’n hon ‘HOTDAMNA’ ah i kipahna diing om gige hi chih achian mahmah hi.
Himahleh, Pathian ahoih a, i poimohte hon pe gige hi (Philippi 4:19). Kipahna’ng omlou pi a kipahsak sawm leh kipaak dia kisawl teitei i hi kei a, kipahna’ng omte a kipahdan sin a poimoh dan gen ut i hizaw hi. Kipaak gige diing a thu honpepa’n i kipah gigena diing tham thil hon guan lou chih omthei himhim lou diing hi. Kawlgit khatlel leng i Pa Pathian theihlouh a lei a kelou ahihleh, ei A Tapa’ sisan a tatsate i poimoh piaklouh in i om dua hia? (Matthai 10:29-31). Huai baan ah, khawvel mit leh theihsiamna a kipahna thukhat in koih phot leng, i poimohte natawm piaklouh a om Toupa’n hon phal ahihtaak lehleng, A Tapa’ Jesu Khrist Sisan a hon tatna ah i kipahna diing om thouhthou hi. Huchituk a tatna thupi a kipahna mulou i hihleh, thil dang ah kimu ngei tuanlou diing hi. Huai chimah le’ng, i theih di’a poimoh ahihleh, Pathian in A tate omze neilou a haksatna hon thuaksak hetlou hi (1Peter 4:1 ; 2 Korinthte 4:17). A tate gawt Pathian kipahna hilou ahi chih thei ni (Kahla 3:33). 

 

Thukhitna:
Lauhna hi’n mangbatna hi’n dahna hitaleh; hiaite tengteng i tuahna tungtawn a Amah lam zotna dia, Pathian in hon piina hi sek hi (Hebrute 12:5-11). Himahleh hiaite ziak a Pathian zong lou a, Amahlam zuan lou a, gamlat zawsop a, dah leh nguina a i zat leh kipahdan kisin thei ngeingei lou diing hi. Keimah mimal phawkdan in, kipahna diktak ka muhna ahihleh leh Pathian thu ka manna leh a nnasep ka phawkna ah ahi gige hi. A thu ka man tam a Amahlam ka mitsuan tam leh ka kipahna tam a, ka thuman louh deuh a, kei kia a pha ka kisak hun chiang in ka kipahna di tawm mahmah hi. ‘Pathianthu manna ah kipahna om ahi’ chi utdan kahi.
Khovel a khelhna ana luut ziakin, Pathian toh i kizopna tansa pen, Jesu Khrist’ sisan in zomkik nawn mahleh, khovel a khelhna a lutma dan bang suun zou ngei nawnlou ding hi. Pathian leh ei mihingte ki zopna diktak leh bukimtak zaw, Jerusalam thak ah chauh ki phawk pan diing hi. Huai hun chiang in i lunggulh mahmah lungsung tawng a pat kipahna bukim i neita diing hi. Huai ma teng zaw, ngak zou a kuhkal tak a pan kunkun diing himai hi. Ni khat tei i lungkimnatan leh Amah lungkimnatan a kipahna bukim toh kigawm kik nawn diing ihih ziak in, huai mitsuan in kuhkaltakin Amah lam naihzaw zel diing a masuan di’n pang ve ni.

 

Bangkim a kipahtheihna dia salam leh Khalam a hon vualzawlnate muthei diing in simtute khalam mitvaakna Pathian in hon pe chiat hen, Jesu Khris min in. Amen. 

 

– Chingngaihlian Tunglut
June 13, 2020/Article No. 22
(Laigelh toh kisai kupbeh nuam omleh, Laigelhtu +919892316430 ah thuzaak theih diing hi.)


Leave a Reply

Your email address will not be published.

*
*
*

× Direct Appointment