A TAKTAK HINNA

I theihlouh kal un i hunte uh ana pai zungzung a, tu kum bang bei ding kuan ah i dingta uhi. Tua natna hii ziakin khenkhat te ading in sawt sak na bang a om thei a, khenkhat te ading lah kipahna, innsug mite toh hun hoih zatna hun ana hi thei hi. Huchi ahihlouh inleng michih in hiai hun sung a i muhthak uh leh i theihthak uh bang hiam om ding iki gingta hi. Tuate Pathian hoihna, a thilhihtheihna i muh te bang ahi thei a, ahihkeileh haksatna buaina i tuahte tungtawn ua lametna thak, kipahna thak ahi thei hi. Khenkhat te a ding in khelhna apan kisikna leh ki bawl hoih na hun, Toupa toh hun zatkhawmna hun hoih ahi thei hi.

Hichi bang a i om lai un, tunia kei leh nang in hiai thute gelh khia leh simkhe thei a i om theihlai te leng i Toupa hon ompihna ziak ana hivek hi. Mitamtakte’n insung ah, tanau lak a sihna manna ana tuahlai ua, lungsim nuamtak leh innsung bittak leh kimtak a i om theih lai hampha lua ihi uhi. Haksatna ana tuah a, inkuan sung a sihna manna ana tauk kha leng I om tham ding uhi. Hichi bang a ana om khate ading in Toupa ompihna leh Amah Khamuanna amau te ading in i ngetsak ahi. Leitung a kuamah om denlou ding ihih dan uh hon paisan sa te apat in chiangtakin i theithei hi.

Tuni’n ah ataktak hinna bang hi hiam chih saulou in i en ding. Gen vantang a kiza leh i gen mun mahmah uh khat chuh Khovel sia lota chih ana hisek hi. Hiai a i gen ut pen uh bang tak ade aw chih bang hon ngaihtuah sak hi. Khovel sia hi zawlou in khovel leh a sung a omte, ei mihing te asia ana ki hi zaw hi. Khovel siatna ding in Toupa’n bangmah hihlou hi, i kiim-i-kiang a Toupa’ thilsiam te i et chiang in mihingte’n ut leh dah a bawl hileh ki lawm i bang ta uhi. Toupa thilsiam dan leh a om ding dan ua om sak thei nawnlou in thilsiam tampi tak huchin i koih uhi. Huchi ahi lai in Setan in leng mihingte mah hon thuzoh in, amah thunuai ah i tang den uhi. Eimah a hat hun tawk leh hoih hun tawk i na kisak lai un, Setan in i hinna uh atamzaw ana luah sek hi. I Laisiangthou a i muh mah bang in, “…. Amah zaw a tung a kipan tualthat ahi, thutak ah a omkei, asung a thutak himhim a omlouh ziak in. Zuauthu a gen in amah a ngei a gen ahi; zuauthei ahi ngal a, zuaupa leng ahi.” – Johan 8:44b.

Hiai ah bang i mu a, tualthahna, thutak a omlouhna leh zuauthei chihte i mu hi. Hiaite tuh tulai a i hinna ua hong lian mahmah te ahi. Gingtu khat i kichi sam uh a himahleh i theihlouh kal ua hiaite i va neikhak ding uh thil lauhhuai pi ana hi pen mah hi. “Khrist Pathian batpih leh a thupidan Tanchinhoih vak in amau a salhvak theihlouhna ding in, huaite ah hiai khovel pathian in a gingtaloute lungsim a sukmial sakta hi.” – 2 Korinthte 4:4. Hiai a i sim bang un khovel pathian (setan) in a gingtaloute lungsim a sukmial sak dan, Tanchinhoih in gingtute hon salhvak theihlouh na ding a nna asepdan i mu hi. Hiai in bangkim a Toupa a om leh Amah thute aki diahnom gige apoimoh dan hon sinsak hi.

Lungsim a hong om leh hong lian mahmah kasak a hon thathousak ka sak tuh, Pathian tanchinhoih genlou leh puangzak lou in cikchiang in gimthuakna nei ka hi i ki chi thei ding ua. I gingtu hihna uh zumpih a ngaihhun ale i ki zum pih ngam uh apoimoh hi. Hiai ka gen in Pathian Tanchinhoih i gupna uh zumpih hilou in khovel in hon et dan, hon zumpihna uh i sang theih uh apoimoh hi. Tua bang hilou a ahun zil a ki khek thei zel, ngum ngamlou leh dinpih ngamlou a i om khak ding uh thil luah huai ahi zaw hi. Hiai khovel dan bang a i om lai teng uh zaw gimthuakna taktak thuak kha ding leh nei ding in ka ki gingta kei hi. Pathian tanchinhoih i gen ngam angai a, i ding pih a ngai a, i hin pih angai a, i omna peuh leh i hih na peuh a i theihpih a ngai hi. Hiai bang teng i hih chiang un gimthuakna tuak i hi uh i ki chih leh genkhiallou ding in iki gingta hi. I hondampa Jesu nungzui masa te, Sawltak te’ thuakna khong ngaihtuah in nei zel ni. Tua te bang tuak lou ding i hi uh i ki chi ngam kei uhi, tua te maituah thei gige i hi uh a, mansa a i om uh apoimoh hi. Eimah hatna a zou ding i hikei uh a, Toupa ompihna apoimoh a, Amah toh i zou ding uhi.

Mihingte damsung tawmchik himahleh i hinsung ua i ut uleh i deih utuh lohchinna, kipahna, thupina leh nuamtak a khosak ding chih khong ana hi sek hi. Tua te mah zang in Setan in khovel nopsakna leh utna te’ zang in i lungsim uh leh i ngaihtuahna uh ahon la mahmah hi. Zing i thoh ua pat i ihmut matan uh tuh hiai hih ding, hiai bang aom ding, huai hih ding leh huchi ding ka hi chi in ngaihtuahna i nei uhi. Hiai te mah Setan in thei in, i nopsakna ding uleh iki pah theih na dingding un a lampi hon gelsak hi. I hinna adia hoih ding leh manpha ding a thil hih iki sak lai un hun tam zaw ah Setan vaihawm na ah ana ki lut kha sek hi. Hiai ah bang I sinthei a ichih leh Toupa toh hunteng a i ton uh apoimoh dan hon sinsak hi. I hinna ding taktak uh zaw hunteng a Toupa toh ton ana hi zaw hi. Mahni utna leh lunglutna te koihkhiat a ngaihhun a koih khiat theih apoimoh hi. Nopsakna te delh mahni himahleh haksatna te le tuah hun omding ahi chih mangngilh kei ni hang.

“Kiveng unla, ginna ah ding kip unla, kihihhang unla, hattak in om un.” – 1 Korinthte 16:13

Thukhitna ding in, mi tengteng in i thiltuah uh aki bang kei hi, khenkhat te hinkhua haksatak mite nopbawlna a hon zat uh i om thei a. Khenkhat te innsung kisia leh haksa tak a om a genthei tak a khosa mi tamtak leng i om uhi. Hiaite a mawk a i tung ua hongtung ahi kei hi, ei adia hoih zaw ding leh Pathian lam i naihsem na uh, Amah i hinna ua hong ki latsem na ahong hi zaw hi.  Hiai bang a om kha nailou a nuamtak a khosa leh lunggim na neilou iki chih khak lehleng pilvang ni, kipaktak a om den ding i hi ichi thei kei hi. Nang leh kei in sihna maituah ding ihi ziak in, i hunte zatdan ah pilvang ni. Khovel nopsakna te delhdelh mah lehang Toupa toh lou in zaw lungkimna taktak neih ahaksa lua hi. Setan thunuai a nopsakna te kipahna te i zongsung teng zaw lungnopna taktak ki neilou ding mah hi. Tua ahihziakin a taktak hinna zaw Toupa toh ton gige, hunteng a athu te a ki thunung theih na ahi hi zaw hi. Thakhat thu in kikhek zaw haksa mah ding hi, himahleh I Toupa Jesu Khris thilhihtheihna toh tua te i zou ding uhi.

Kihihhang in, Toupa ompihna toh hattak in om ni. Bangkim ah Toupa toh tonthei ding leh Amah ompihna lungsim a neithei gige ding in kei leh nang Toupa’n hon ompih chiat hen!

Theihna bukim louh ziak a gelhkhelh leh gelh kimlouh om te Toupa ngaihdamna i ngen a, I gen dik sun omte a sim khempeuh ading a thathak lakna, Toupa’ deihdan a kipiak semna ahong hihtheihna ding in a vualzawlna i ngen ahi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
18th November, 2020 | Weekly-Inspiration – 46



Leave a Reply

Your email address will not be published.

*
*
*

× Direct Appointment